Ao sauni ai le Iuni Lakapi a Samoa e fa’alauiloa lana fa’aiuga mo se tasi e avea ma Faiaoga o le ‘au ta’ito’a 7 a le Manu Samoa i le vaiaso nei, ua fa’aalia ai finagalo eseese o ni isi o paaga a le ‘au ta’ito’a 7 a Samoa i se tasi latou te manatu e talafeagai mo le avanoa.

O le faaiuga o le vaiaso na te’a nei, na fa’alauiloa mai ai e le Iuni Lakapi a Samoa lo latou filifilia o ni sui se to’a 3 mai le to’a 29 sa tusi talosaga mo le avanoa faiaoga, e fili mai ai se tagata agava’a e avea ma faiaoga o le ‘au ta’ito’a 7 a le atunu’u.

O igoa e to’atolu na fa’alauiloa e le Iuni Lakapi a Samoa e aofia ai le ali’i o Waisale Serevi mai Fiti, lea foi ua ta’uta’ua ona tala e fa’atatau i le ta’aloga lakapi ta’ito’a 7, o le ali’i o Ben Gollings mai Enelagi, ma le susuga a Muliagatele Brian Lima o Samoa.

O le to’atele o le atunu’u na fesootai mai i le Samoa News ma fa’aleo o latou finagalo e fa’atatau i lenei mataupu, na taua ai e ni isi o latou finagalo, ina ia tu’u le avanoa i le susuga a Muliagatele e avea ma faiaoga, ae o isi sa latou taua, e lelei pe a tuu le avanoa i sui mai fafo e fai ma faiaoga o le ‘au a le atunu’u, atonu e tula’i mai ai se suiga lelei i le ‘au.

“Ou te lagolagoina le tu’u pea o le avanoa i tama fanau a Samoa e pei o Brian Lima poo Uale Ma’i fo’i e avea ma faiaoga o le ‘au, o i laua na ua lava lo la iloa i le ta’aloga, ua malamalama fo’i i auala e fesoota’i ai i tama ta’aalo, e leai se mea e ala ai fua ona aami e Samoa isi faiaoga mai fafo e taitaia le ‘au a le atunu’u,” o le saunoaga lea a le isi tama matua i le Samoa News.

Ae na taua e le isi molimau e fa’apea, e sili atu le filifili o tama fanau a Samoa e avea ma faiaoga, e le gata e lotonuu ae toe malamalama ai metotia ma auala e siitia ai le ta’aalo a le au a le atunuu.

E to’atolu isi molimau sa laua lagolagoina le tatau lea ona tu’u le avanoa i se isi tagata mai fafo e avea ma faiaoga o le ‘au ta’ito’a 7 a le Manu Samoa. E mafua lea tulaga ona na taua e le isi tootoo e faapea, “afai o lea ua selesele e Fiti le suamalie o le avea ma siamupini ona o le faiaoga mai Enelagi o loo avea ma faiaoga o le latou ‘au ta’ito’a 7, aisea e le mafai ai fo’i e Samoa ona faia lea tulaga.”

Ae na saunoa le isi tootoo, e le manatu fa’atauva’a i le maualuga ma le tomai ua mafai ona ausia e alo o le atunuu e pei o Muliagatele ma Uale, peita’i lona taofi, e le’i tele se taimi o Muliagatele e taaalo ai i le ‘au ta’ito’a 7 a le atunu’u, se’i vagana ai lava le Manu Samoa ta’ito’a 15, ae o Serevi ma Gollings, ua iloga matati’a sa laua fa’atutu i taimi ao ta’aalo i ‘au a laua atunu’u.

“O Serevi o loo fa’aigoaina o le Tupu o le Lakapi Ta’ito’a 7 i le lalolagi, ae o Gollings o loo avea ma tagata e pito sili ona tele ‘ai sa ia maua i le ta’aloga ta’ito’a 7 i le lalolagi o le taimi nei, o ni alii fo’i ua lava lo la tomai i le ta’aloga, aisea e le tu’u ai le avanoa se’i avea se tasi o i laua ma faiaoga,” o le manatu lea o le isi tootoo.

I se pepa o fa’amatalaga na fa’amatu’u mai e le Iuni Lakapi a Samoa, o loo taua ai le tofia o se Komiti Faapitoa latou te iloiloina se faiaoga e agava’a mo le avanoa, ona tuuina atu ai loa lea o le fa’aiuga a le Komiti lea i le Iuni Lakapi mo se fa’aiuga fa’ai’u.

O loo i ai le fa’amoemoe o se taimi o le vaiaso fou e tatau ona fa’alauiloa aloaia mai ai se faiaoga o le ‘au a le atunu’u.

Na taua e le Pulesili o le Iuni Lakapi fou a Samoa ia Faleomavaega Vincent Fepulea’i i le pepa o fa’amatalaga e fa’apea, ua sauni le Iuni Lakapi mo le tuuina atu o le totogi i le tagata o le a filifilia e avea ma faiaoga, i le taimi lava e fa’amautuina ai le fa’aiuga a le Iuni Lakapi.

O le lu’itau muamua lea ua fa’amoemoe e fa’aee atu i tauau o le faiaoga o le a filifilia, o le tapenaina lea o le ‘au mo le ta’amilosaga ta’ito’a 7 a le Oceania lea e faia i Aukilani i le masina o Novema 2015, e saili ai se ‘au se tasi mai le Pasefika e ofi atu i Ta’aloga a le Olimipeka i Brazil i le 2016.

O le taimi nei, ua agava’a Niu Sila ma Fiti mai le Pasefika e tausinio i le Olimipeka, ina ua aofia i laua i ‘au e fa pito i luga i le fa’aiuga o le ta’amilosaga ta’ito’a 7 a le IRB i lenei tausaga.

O ‘au o le a tausinio i le ta’amilosaga e saili ai se ‘au se tasi mai le Pasefika e aofia ai Samoa, Ausetalia, Papua Niu Kini, Atu Kuki ma Tonga, o isi fo’i ‘au ia o loo naunau e fia tausinio i le Olimipeka.

I le ta’amilosaga a le Pacific Cup o loo fa’agasolo i le taimi nei, o le aso Lua o le vaiaso fou lea ua fa’amoemoe e saili ai e Samoa ma Fiti le siamupini o lenei tausaga, ina ua tutusa e ta’i 11 ‘ai i le fa’atulagaina o le kalena.