E 14-0 le palota na pasia ai e le maota o sui i le aso Faraile na tea nei le faletua o Dr. Oreta Mapu Crichton, lea ua tofia e le alii kovana ia Lolo Matalasi Moliga e avea ma Ofisa Sili o le Vaega o Oloa a le malo.

O lea fa’aiuga a le maota o sui, sa faia lea ina ua mae’a se iloiloga sa fa’atautaia e le Komiti o le Fa’agaioiga o le malo, lea sa fesiligia ai agava’a mo tomai o le molimau e tusa ai o le galuega ua filifilia o ia e le ali’i kovana e galue ai.

O le to’atele o faipule na maua avanoa e saunoa ai i le taimi o le iloiloga, sa latou fa’ailoa i le molimau, e leai ni a latou fesili e fa’atatau i ona agava’a, ona o ia o se tagata ua matua agava’a mo le galuega, se’i vagana ai nai fautuaga laiti e fia momoli atu i ona tafatafa, e fesoasoani ai i lana galuega.

Na fesili le sui fofoga fetalai ia Fetu Fetui Jr i le molimau poo a mai le tautua a lona Ofisa, ae na tali le tama’ita’i foma’i, “o loo lelei ma atoatoa le tautua a le aufaigaluega,” o lea na fautua ai loa Fetui Jr ia Dr. Crichton ina ia alofa i lana aufaigaluega, o i latou ia o le a pito sili ona tutu malosi e lagolago lona tulai mai.

Sa talosagaina foi e le sui fofoga fetalai ia le molimau, ina ia silasila toto’a i totonu o ni isi o le aufaigaluega ua tele tausaga o galulue, nia ia fai i ai se fa’atatau. Sa ia talosagaina foi le molimauina ina ia toe tatala se lala o le Ofisa o Oloa a le Malo i Manu’a.

I le i ai fo’i o agava’a o Dr. Crichton i galuega fa’a soifua maloloina, na fesiligia ai o ia e le afioga i le ali’i faipule mai Manu’a ia Vesi T. Fautanu, pe sa i ai sona finagalo e tusi talosaga e fia galue i le falema’i a le atunu’u, ae na tali le tama’ita’i foma’i, sa tele lava vaega eseese o le malo sa fia talosaga i ai, peita’i e fuafua lava fo’i i le finagalo o le ali’i kovana.

Ae na saunoa le alii faipule ia Vae’iaitu Filo Maluia i le molimau e fa’apea, e le faigofie le galuega o le a alo atu i ai e fa’atino, e le gata e fou o ia i le galuega, ae o le a tele fo’i lu’itau é te lua fetaia’i.

“Pau la’u fautuaga ia te oe, ou te le mana’o e vaaia soo oe i totonu o le maota lenei, e mafua ona sau soo le Fa’atonu i le Fono, e atagia mai ai e le o faia lana galuega,” o le saunoaga lea ali’i faipule mai le Ituau, ma fa’ai’u ai loa lana saunoaga i sana fautuaga i le Fa’atonusili tofia, mo se avanoa e toe tatala ai le Faleoloa a le malo ua leva tausaga o tapuni.

I le saunoaga a le afioga i le ali’i faipule ia Vailoata Eteuati Amituana’i, sa ia fautuaina ai le molimau ina ia toe silasila toto’a i tulaga o tauofoga o galuega a le malo, lea o loo maitauina sa i ai ni nai fa’aletonu i ni isi o tauofoga ua mavae atu, ma e tatau ona toe silasila toto’a i ai lona ofisa.

Mo se fa’ata’ita’iga e pei ona taua e le afioga a Vailoata, o fa’aletonu na tutupu mai i tauofoga o galuega mo le auala o le malae va’alele, lea ua mafua ai ona toso i tua le galuega.

O popolega e pei ona saunoa Vailoata, e avea le fa’aletonu o auala e faia ai tauofoga, ae i’u ane ai ua toe faia e tagata tagi e fa’asagatau mai ai i le malo.

O le vaiaso nei lea ua fa’atulaga e le maota maualuga e fa’ataunuu ai le latou iloiloga mo tofiga a le kovana fa’asaga ia Dr. Crichton.