FIA MALAMALAMA SANITOA I SE RIPOTI MAI LE KOMITI PONE

Ua talosagaina e le afioga i le ali’i faipule mai le itumalo o Tualauta ia Larry Sanitoa le Fofoga Fetalai o le maota o sui ia Savali Talavou Ale, mo se avanoa e talosagaina ai le Komiti o le Tamaoaiga o le malo (ASEDA), lea sa gafa ma talanoaga i Hawai mo tupe o le pone, ina ia tuuina atu sa latou ripoti i luma o le maota o sui, e fa’amalamalama ai tulaga o tupe ua fuafua le malo e maua mai i le pone.

Na fautua Savali ia Sanitoa, ina ia tu’u sina avaoa i le Komiti o le Pone ma le malo e tapena ai le latou ripoti lea ua faamoemoe e fa’ailoa aloaia i luma o le Fono Faitulafono i se taimi e le o toe mamao, atonu o iina e maua ai loa le vaega tonu o loo fia malamalama i ai ni isi o sui o le maota.

Na talia e le afioga i le ali’i faipule ia Sanitoa le fautuaga a Savali, ma toe tolopo ai loa le iloiloga sa fuafua a lana komiti i le vaiaso fou.

Na momoli e Sanitoa le fa’afetai i le ali’i kovana ia Lolo Matalasi Moliga ma le faigamalo, e tusa ai o le manatunatu i mea lelei mo le manuia o le atunu’u, atoa ai ma le taumafai

“Ae o le agaga moni o loo fia malamalama i ai lenei sui, atonu e faapena fo’i isi sui o le maota, pe fia moni se tupe ua faamoemoe le malo e maua mai i le vaega muamua lenei o le pone, a’o a fo’i atina’e ua fuafua le malo e fa’atino i le alagatupe muamau lea ua fuafua e maua mai,” o le saunoaga lea a Sanitoa.

Saunoa atili Sanitoa e fa’apea, o le vaega tupe lea ua ia fa’alogo e ono maua mai e le malo i le vaega muamua o le pone, e le o se tupe laititi, ae tatau fo’i ona silafia e le fono ma le atunuu le aofa’i o le tupe ua faamoemoe e toe totogi atu ai lenei pone (payments), ina ia malamalama ma manino le fono i soo se gaioiga o lenei fa’amoemoe.

O le isi mataupu na aofia i le saunoaga a Sanitoa, o le fausiaina o se faletupe fou mo Amerika Samoa, ina ia fesoasoani i le fa’aletonu e pei ona fetaia’i ma le atunuu mo le tele o tausaga, talu ona fa’alauiloa e le Faletupe a Hawaii lo latou tula’i ese ma le atunu’u.

TULAGA LELEI AUALA FESOOTAIGA I MANU’A

Na fa’ailoa e le faipule ia Vesi T. Fautanu i luma o le maota o sui i le taeao ananafi, ni isi o tala fiafia ua fetaia’i nei ma le motu atoa i Manu’a, i le televave ma le saoasaoa ua i ai tulaga o fesootaiga tau initaneti, talu ona mae’a ona toso le uaea a le Faalapotopotoga o Fesootaiga a Amerika Samoa (ASTCA) i Manu’a.

I le mae’a ai ona fa’alauiloa e Vesi o lea tala fiafia mai le itumalo, na tula’i ai loa le afioga i le ali’i faipule ia Vailoata E. Amituana’i, o le sui ta’ita’ifono o le Komiti o Fesootaiga a le maota o sui ma toe tolopo le fa’ataunuuina o le ilolioga sa fuafua e faia i le vaiaso fou, e fesiligia ai le ASTCA i le mafua’aga ua tuai ai ona soo le latou tautua mo Manu’a, e mafua mai i ni fa’asea na fa’ailoa e sui o le itumalo i le vaiaso na te’a nei i luma o le maota o sui.

Saunoa Vesi e faapea, ua matua fiafia tagata Manu’a i le tulaga vave ma le lelei o fesootaiga, e le tau toe mana’omia fo’i se iloiloga e toe faia.

Saunoa le Fofoga Fetalai ia Savali Ale, e tatau pea lava ona saili se taimi e aami ai le ASTCA se’i fesiligia i le tulaga o le polokalame lea o le Blast Project mo Tutuila nei, ona o loo i ai lava fo’i ni nai fa’aletonu i fesootaiga i ni isi o taimi.

TELE MANAOGA MAI ITUMALO MO MEA FIA FA’ALELEIA I AOGA

Ao lumana’i ai le toe amataina o aoga a le fanau i le faaiuga o le masina lenei, ua talosagaina ai e ni isi o faipule le Taitaifono o le Komiti o Aoga a le maota o sui ia Vaetasi Tuumolimoli Moliga, ina ia silasila toto’a i le tele o manaoga o loo tula’i mai  ni isi o aoga i le atunu’u, mo mea e mana’omia le fia fa’aleleia.

Saunoa le faipule tama’ita’i mai le Tuala-uta ia Vui Florence Vaili Saulo e faapea, o loo tele naua vaega e moomia le fia fa’aleleia mo aoga a lona itumalo, ma ua tatau fo’i ona valaau se iloiloga ma le ofisa o aoga, ina ia mautinoa e fa’aleleia manaoga uma nei a’o le’i oo atu i le taimi e toe a’e ai aoga.

O le talosaga lava fo’i lea tasi sa fa’aleo e ni isi o faipule mai le Falelima i Sasa’e, i le i ai lea o ni isi o manaoga o loo moomia le faaleleia i aoga a nuu ma itumalo, e pei o le faatutumu o avanoa faiaoga, fa’aleleia o nofoa ma laulau mo fanau aoga, aemaise ai o nisi o vaega e tatau ona fa’aleleia mo le fale’ai.

Na fa’ailoa e Vaetasi i se tasi o ana saunoaga i luma o le maota e fa’apea, o faipule uma o loo i ai manaoga mo a latou aoga, ia tusitusia uma i lalo ma faaoo atu ia te ia, o le a latou fesootai ma le Ofisa o Aoga mo le fa’ailoaina i ai o nei manaoga.

Talu mai le masina na te’a nei, o loo galulue pea matagaluega taitasi a le malo mo le fa’aleleia o faleaoga ua mae’a ona tofia i latou e le kovana e galulue ai, i lalo o le polokalame o le Fa’atamafai o Aoga sa fa’atula’i mai e le ali’i kovana i le tausaga na te’a nei, ina ia fesoasoani ai le malo i aoga mo le fa’aleleia o faleaoga e a’oa’oina ai fanau a le atunu’u.