Na taua e le peresetene o le Senate i le taeao ananafi i luma o afioga i Senatoa, lona fa’anoanoa tele ina ua ia maua le tala, ua le talia e le Fa’atonusili o le Ofisa o le Paketi a le malo se talosaga sa tu’uina atu i ai e le afioga i le ali’i senatoa ia Laolagi Fonoti Savali Vaeao, ina ia tapena tusi paketi e tuuina mai i le taimi e iloilo ai e le Fono le Paketi a le malo.

O le teena ai e le tama’ita’i fa’atonusili o le Ofisa o le Paketi ia Cathy Aigamaua-Saelua o le talosaga a le Senate, na talosagaina loa e Laolagi, o ia fo’i lea o le ta’ita’ifono o le Komiti o le Paketi a le Senate se fesoasoani a le ali’i peresetene ma le Fofoga Fetalai o le maota o sui, i se avanoa latou te feutana’i ai ma le ali’i kovana e tusa ai o lenei mataupu.

Na faailoa e le afioga a Laolagi i luma o le maota maualuga ananafi e fa’apea, ua mae’a ona tuuina atu lana tusi i le faatonusili o le Ofisa o le Paketi a le malo e tusa ai o le finagalo o afioga i senatoa, “ae foliga mai e le o matu’u mai le finagalo o le tama’ita’i fa’atonusili,” i se isi fa’aupuga, e le o taliaina e le tama’ita’i fa’atonusili le tusi sa tuuina atu i ai.

“Sa i ai lo’u manatu e fa’autagia mai e le tama’ita’i fa’atonusili se talosaga vaivai na auala atu i la’u tusi, ae foliga mai e tumau lava le fa’aiuga ua mae’a ona faia, o le mafua’aga lena ua ou talosagaina ai loa se fesoasoani a ta’ita’i o le fono, ma o lea ua taoto atu i le ali’i peresetene ma le fofoga fetalai le mataupu latou te feutana’i ai ma le ali’i kovana,” o le saunoaga lea a Laolagi.

Na fa’afetaia e Gaoteote Tofau Palaie le afioga a Laolagi e tusa i le tusi sa tuuina atu i le fa’atonusili o le ofisa o le paketi, ae foliga mai e le o fa’autagia mai e le malo le talosaga atu o le Fono.

“E lagona ai lava le fa’anoanoa i lenei mataupu, o le mafua’aga lea ua ma manatu ai loa ma le fofoga fetalai, o le a tu’uina atu sa ma tusi i le ali’i kovana e pei ona momoli atu i ai i le taeao nei, e fa’ailoa atu i ai atugaluga o le fono, fa’atasi ai ma le talosaga, e mana’o le fono e fia vaai i le tusi paleti, ae le o ni ‘disc,” o le saunoaga lea a Gaoteote.

Na fa’afetaia e Gaoteote le faigamalo e tusa ai o le tusi o le paketi ua mae’a ona tauaao e le fono i le vaiaso na te’a nei, peita’i i lona talitonuga, e le o aofia uma ai i totonu o le tusi lea fa’amaumauga auiliili o loo fia vaai i ai le fono.

Na tula’i le afioga i le ali’i senatoa ia Soliai T. Fuimaono ma ia fa’aalia lona agaga fa’anoanoa e tusa ai o le le taliaina o le talosaga sa tuuina atu a le fono, ma ia talosagaina ai loa le tatau lea ona fautuaina le faigamalo, ina ia tuu mai i le fono ripoti o tupe sa mafai ona maua e le malo i le tausaga tupe lenei, atoa ai ma lona fa’aaogaina.

O le taua o nei ripoti e pei ona saunoa Soliai, o le a mafai ai ona fuafua galuega a le fono mo le paketi o loo loma nei, aemaise ai o le tulaga tonu sa taoto ai tupe maua a le malo i le tausaga tupe atoa lenei.

Ae na saunoa le afioga i le ali’i senatoa ia Tuaolo M. Fruean e fa’apea, e i ai lona talitonuga e le tatau ona iloiloina fua e le maota maualuga le paketi a le malo, aua e le o se tiute lena o le maota maualuga.

“O le tiute lena o le maota o sui, o le faia o suesuega fa’asaga i le malo, ae o le maota maualuga, e le o sana galuega lena, e le faia e le maota lenei ni suesuega o ni mataupu fa’asaga i le malo, pau le galuega a le maota lenei e fai, afai e i ai ni tagata ua le faia fa’alelei ni a latou galuega, ona aami lea e o mai se’i otegia e le maota,” o le saunoaga lea a Tuaolo.

Sa ia taua fo’i e faapea, o le mafua’aga tonu lena e ala ai ona tofia le maota maualuga i tu ma aga fa’aleaganu’u, ma afai fo’i e saili se ta’ita’i o le maota maualuga i le Atua, e leai se mea e faigata i ana fa’aiuga fai.

“O le fautuaga i lau afioga i le peresetene, e leai se mea tatou te tau fesiligia ai fua le paketi a le malo, na o le fai lava i le kovana e aumai le paketi a le Fono, fa’apasia ma le paketi a le malo, ona tu’u lea o le galuega e o le malo e fai, ae o mai tatou e fai tatou galuega, aisea e le faia ai ni mea fou i lau nofoaiga lau afioga i le ali’i peresetene,” o le lu’i lea na fa’atula’i e Tuaolo ia Gaoteote, ae na saunoa le ali’i peresetene, “o le tofa lava e aumai i le tatou maota, o le tofa lena e mulimulita’i i ai le laulau.”