O le fa’aiuga o le vaiaso na te’a nei na mae’a aloaia ai le ta’amilosaga a le Asosi Baseball a Amerika Samoa - 2015 Summer Little Baseball League, lea sa fa’agasolo mai mo le 6 vaiaso ua tuana’i, ma le fa’amoemoe ina ia atina’e le ta’aloga Baseball i fanau laiti.

E silia i le to’a 200 fanau aoga sa auai i lenei polokalame, lea sa va’ava’alua ai le Asosi Baseball ma kalapu lotoifale sa latou lagolagoina malosi lenei fa’amoemoe, aemaise ai le fesoasoani a le Matagaluega o Paka ma Malaetaalo, lea sa latou fa’amatu’uina atu le malae o le Tony Solaita Baseball field mo le fa’aaogaina.

I le fa’ai’uina ai o le ta’amilosaga o lenei tausaga, ua tula’i mai ai le ‘au malosi a le Little Rascal’s i le siamupini i le vaega a le Major Divison, ina ua faiaina ai le siaumupini o le 2014, le ‘au malosi a le Westside, ae o le vaega a le Minor Division lea ua toe siamupini ai le ‘au a le Westside ina ua latou fa’ato’ilaloina le ‘au a le Central Clubs i le ta’alosaga e saili ai le siamupini.