O le iloiloga a le Komiti o le Faagaioiga o le malo a le Senate ma sui o le Faletupe a le ANZ Guam i le taeao ananafi, na maua ai le avanoa o afioga i ali’i senatoa latou te fa’aleoina ai i sui o le Faletupe le anoana’i o le mau fa’asea ma atugaluga mai le atunu’u, e tusa ai o le latou tautua i Amerika Samoa.

O ni isi o ia fa’asea e aofia ai tupe o loo totogi e tagata fai teugatupe i le ANZ, i soo se taimi e tala pe teu ai tupe. O isi fa’asea e fa’atatau i le uumi o taimi e fa’atalitali ai tagata fa’atoa maua se avanoa e fai ai sana mataupu, aemaisae ai fo’i o isi lava fa’asea i le umi ona fa’ata’amilo o le faagaioiga o tusi tupe fou, fai ma leaga ia masini  ATM, atoa ai ma le mafua’aga e fa’atapula’a ai le maualuga o tupe e mafai ona tala mai fafo o se teugatupe.

Na fesili le afioga i le ali’i senatoa ia Uti Petelo i le Pulesili o le Faletupe ia John Wade, pe aisea e totogi ai e le tagata e le fai teugatupe i le ANZ le $6 pe afai na te fa’aaogaina masini ATM a le ANZ e tala ai sana tupe, ae na tali le susuga a Wade, o tulafono lava a le kamupani ua leva ona i ai.

Na fesili Uti pe aisea e eseese ai totogi a le ANZ ma isi faletupe i le maualuga o le latou tau e totogi e le tagata, ae na toe tali Wade, o aiaiga lava ma tulafono a le faletupe ua leva ona i ai.

Ae ina ua toe fesili Uti ia Wade pe na te silafia e talafeagai le $6 o loo totogi e le tagata, na vave le tali a le ali’i Pulesili o le ANZ, “ioe e talafeagai,” ma, o lana tali lea na tali e ai afioga i Senatoa.

Na fesiligia foi e afioga i faipule le fesili lava fo’i lea i se iloiloga sa faia i le vaiaso na te’a nei i luma o le maota o sui, poo i ai se fuafuaga a le ANZ e toe tu’u i lalo le latou tau lea, ae na tali Wade, e leai, e tumau pea.

Saunoa Laolagi Fonoti Savali Vaeao, o se tasi o atugaluga o loo fa’asea i ai le atunu’u, o le uumi lea o taimi e nofonofo ai fa’atoa maua le avanoa e tali ai lana mataupu. Saunoa Laolagi e fa’apea, o le tele o taimi, e matua tumu lava totonu ma fafo o le faletupe, ae na o le to’alua lava tagata tali tupe o loo galulue, ae o isi uma fa’amalama o loo tapunipuni.

Na taua e se sui o le ANZ i le atunu’u sa auai fo’i i le iloiloga e fa’apea, o le taeao ananafi sa ia sainia ai le fa’aaoga o isi a latou tagata tali tupe fou e to’atolu e fesoasoani i le galuega, ma atonu o le a mafai ai ona foia le fa’afitauli.

Ae na saunoa Uti e fa’apea, o nisi fo’i taimi, e tatau ai i ta’ita’i o loo nonofo i totonu o le ofisa ona tuua o latou kesi ma nofoa, ae aga’i mai e vaavaai i le tulaga o loo i ai le auaunaga a le aufaigaluega.

“E tatau fo’i ona outou o mai e see i seevae o loo see ai le atunu’u, i le ova i le ta’i 3 itula o nofonofo ma fa’atalitali, ona outou lagonaina ai lea o le mafua’aga e ala ai ona fa’asea le atunu’u,” o le saunoaga lea a Uti.

Na fesili le afioga i le ali’i senatoa ia Magalei Logovi’i i molimau, pe aisea e fai ai ma leaga a latou masini ATM, ae o masini fou fa’atoa taunu’u.

Na fa’afetaia e Magalei ia sui o le ANZ mo a latou masini ATM fou fa’atoa uma ona fa’apipi’i, peita’i o le fa’aletonu ua tula’i mai i a latou masini fou e lua o loo i Tafuna, e na o le tasi lava le masina na lelei ai le isi masini ae toe leaga, ae o le masini e tasi o loo lelei, o isi taimi e ola ae leai ni tupe i totonu, ae a maua fo’i tupe ae ua leai ni lisiti.

O le umi o le fa’ata’amilosaga i le tatalaina o tusi tupe fou, o le mataupu lea na fesiligia e le afioga i le ali’i senatoa ia Mata’utia Afonotele. Saunoa le ali’i senatoa e fa’apea, e le iloa pe aisea e umi ai fua na fa’ata’amilo talosaga mo tusi tupe fou, ae i lona taofi, e leai lava ni faamatalaga tetele e maua mai i tagata o le atunu’u e ala ai ona faigata ma umi le faataliina o talosaga, ae na saunoa Wade, talu ai o tulafono a le faletupe, e tatau ai ona maua uma fa’amatalaga e faatatau i le tagata o loo talosaga mo se tusi tupe fou, ina ia o gatasi ma tulafono ma ta’iala a le faletupe.

Saunoa Soliai T. Fuimaono e fa’apea, e le tatau i le Faletupe ona fa’atamala i le latou pito laau e ala i le tautuaina o le atunu’u, ae tatau ona latou fai fa’alelei le atunu’u, aua le fa’apologaina le atunu’u i nei mau totogi fou ua latou fa’aee.