“TELE MALUMALU TAPUA’I AE UA TUPUTELE LE OLA PEPELO”

Tau le maua se to’a i le mafaufau o si Fafige Faikakala ina ua fa’ateia o ia i le tagi talatala a le isi olomatua matua lava fai mai, o si ona grand daughter le la ua ave i Niu Sila e taoto ai ina ua fiu e faatali se avanoa e ave ai i le Off Island Referral Program a le LBJ e le maua lava se avanoa, a’o lea ua maua faamatalaga e fa’afa ona malaga le Taitaifono o le Komiti Faafoe a le Falema’i i fafo mo ana talavai i lalo o le polokalame lea. “Ou ke ofo pe afai e mogi gei lipoki,” o le tala lea a le olomatua, “ae sei vaai i le kele o gei mau malumalu kapua’i e kuku solo i le akuguu, ae ese le ola kala pepelo o kagaka.” Fesili loa ma le Fafige Faikakala i le olomatua lea, “O le a la se mea lelei eke magao ouke faia mo oe,” tagi le olomatua ma fai mai, “Kakalo mai mo a’u.” O o loa i le Aso Sa la’a ma le Fafige Faikakala i le lotu, savali sa’o atu lava tootuli i le pito i luma o le malumalu ma tatalo loa ma loimata, “Le Alii e, ua e silafia nei tagata le alolofa, o loo oi le atunuu ma tagata lima vaivai i le pagatia ae tafili saunoa pea lava i latou i tupe o le Off Island Referral, fa’amolemole, fa’apei ona e fa’agugu lau auauna o Sakalia i lona le talitonu, ia fa’apena fo’i ona e fa’agugu i nei tagata i le ola pepelo ma le le alolofa, Amene.” Vaai le manaia.

“TATOU ALU INCORRECT AI PEA FA’APENA”

Te’i le Fafige Faikakala ina ua tatagi lana telefoni ananafi, ae tago atu e tali o le isi ana uo Faipule o loo vili mai i le Fale Fono, fai mai faatoa uma lava le latou iloiloga o le Paketi a le isi Ofisa o le malo. O le fia faitatala tele o si Fafige Faikakala i le tulaga o loo i ai le paketi a le malo, na mafua ai ona fesili i lana uo Faipule, pe i ai ni fa’aletonu o le paketi a ofisa o le malo, ae na te’i le Fafige Faikakala i le ata e e i luga o lana uo Faipule mai fai mai, “Se mau mea fa’alekogu o loo i ai,” oso atu loa ma le fesili fia iloa a le Fafige Faikakala, “O a la ga mea fa’alekogu,” ae tali mai lana uo Faipule, “E i ai le Road Marshall o loo totogi i tupe lotoifale e $28,000, ae o lana galuega o le alu e vaai ofisa a le malo i le EOB o loo ola faasoloatoa moli poo le ea malulu, ona ia logo lea o le Faatonusili o lea Ofisa e ta’u i ai le fa’aletonu. O le isi fa’aletonu, o le tupe lea e maua mai i le lafoga o le suauu, lea ua mae’a ona fa’atulafono e alu e fa’aleleia ai faleaoga, lea e maua ai le $1.5 miliona i le tausaga atoa, ua fa’aaoga e le malo e fa’a faigaluega ai le to’atele o tagata faigaluega, ae mala ai faleaoga ua leai se tupe e fa’atau ai vaega e fa’aleleia ai mea o loo fa’aletonu,” o le faamatalaga lea a le uo Faipule a le Fafige Faikakala. Fesili atu loa ma le Fafige Faikakala i lana uo Faipule, “O le a la se kala a le Fogo ua fai i gei mau mea se,” o le fesili fia iloa lea a le Fafige Faikakala i lana uo Faipule, ae na tei i le fai mai o le Faipule, “Pau lava faukuaga a Koeaiiga ua ave i ai, pule ia lakou i le lakou pakeki ae kakou alu incorrect ai pea faapea,” e le i uma lelei le tali a le uo Faipule ae toe oso atu ai le isi tala a le Fafige Faikakala, “O i, magaia kou faukuaga o loo ave i le malo, fa’afefea ga kakou o incorrect ai pea faapea, se ua ma’imau kupe o loo kokogi ai lou oe Faipule se.” Fai aku ai fo’i.

VA’A FOU MO MANU’A

E ofo le Fafige Faikakala ina ua ia maua le tala mai se tasi o ana uo o loo nofo i Manu’a, o le va’a o le Segaula lea na fa’atau mai e le malo e fealua’i i le va o motu o Manu’a, o loo tula’i mai ai pea se fa’aletonu i le tane vai, o le mafua’aga lea ua ala ai ona aapa le malo e fa’aaoga va’a alia e silia i le ta’i $100 le totogi e feoa’i ai i le va o le Luanu’u ma le Faletolu. Ae o le itu e sili ai ona malie fuafuaga a le malo mo le fa’atauina o va’a fou mo Manu’a, o lea fo’i ua fa’alauiloa, o le masina o Aokuso i le tausaga fou o loo faamoemoe e tatau ona oo atu i ai ua taunu’u le isi fo’i va’a fou lea ua fuafua le malo e fa’aaoga i femalagaaiga i le va o Tutuila ma Manu’a, ae o le va’a fo’i lea e mafai ona faia ai malaga i fafo atu o Amerika Samoa. Fai mai le tomumu a le isi toeina Manu’a i le Fafige Faikakala, “E faafefea oga fa’aalu e le malo gei mau kupe e fa’akau ai gei mau va’a e le ‘aia, ae la’u mai fo’i va’a e fa’alekogu lava. Ua kakau oga silasila koko’a le malo i gisi auala e fa’aalu sa’o ai le afu o le akuguu, leaga e ooga le afu.”