Ua pasia e le Senate sa latou i’ugafono, e talosagaina ai ma le fa’aaloalo le ali’i kovana ia Lolo Matalasi Moliga, ina ia fa’atula’i ese Mase Akapo ma Dr. Victor Tofaeono Williams mai le Komiti Fa’afoe a le Falema’i o le LBJ, ona o le molimau pepelo atoa ai ma le ta’ita’i seseina o le maota maualuga i a laua molimau.

I le tino o le iugafono a le senate o lo o taua ai e fa’apea, i ni iloiloga se lua sa faia e le Komiti o le Soifua Maloloina a le maota maualuga, sa fesiligia ai le tofa Mase, o ia lea o le taitaifono o le Komiti Fa’afoe a le LBJ, pe sa i ai se taimi na totogi ai e le polokalame e ave ai gasegase i fafo ana malaga, ae na tali le Mase, “e lei totogia e le polokalame ni ana malaga,” ae mulimuli ane faamaonia e se sui o le falema’i e le moni lea molimau, e fa’a fa ona malaga Mase i lalo o le polokalmae.

Ae ina ua fesiligia le ali’i foma’i ia Tofaeono i le mataupu lava lea e tasi, na fa’amaonia ai e Tofaeono, sa malaga o ia i fafo, e le gata o gasegase, ae o ia fo’i o se ofisa mo le falema’i. Ma sa fa’amaonia mai ai e le ofisa o le falema’i e fa’atolu ona malaga Tofaeono i lalo o le polokalame a le falema’i.

“O Akapo ma Dr. Williams, e le gata ina le talafeagai ma o la tofi le mea ua fai, o le tau faasese ma le le fa’aaloalo ia la molimau i luma o le maota maualuga, ma ua aafia ai ma ta’uvalea le tulaga fa’atuatuaina o le maota,” o se vaega lea o le i’ugafono a le Senate ua pasia.

“O le le amanaia o le Senate ma le le fa’aaloalo i le maota, ua lagona ai e Senatoa le leai o se fa’atuatuaga i sui nei e to’alua, e tau’ave ai o la tiute o ni totino o le komiti fa’afoe.”

“O le mea lea ua fa’aalia ai e le maota maualuga sana palota o le le fa’atuatuaina o le susuga a Mase Akapo ma Dr. Victor Tofaeono Williams e fai ai pea ma totino o le komiti fa’afoe a le falema’i. O a la gaioiga nei ua faia o le molimau pepelo, ua tatau ai ona aveesea loa mai le komiti fa’afoe,” o se vaega lea o le i’ugafono.

O le mataupu i se i’ugafono e talosagaina ai le alii kovana ina ia fa’atula’i ese Mase ma Tofaeono mai le toe avea ma sui o le komiti fa’afoe a le LBJ, na afua mai i felafolafoaiga a le maota maualuga i le vaiaso na te’a nei, i le mae’a ai lea o le iloiloga lona lua i le va o le maota maualuga ma le komiti a le LBJ.

O le afioga i le alii senatoa ia Tuaolo M. Fruean, o ia fo’i lea o le ta’ita’ifono o le Komiti o le Soifua Maloloina a le senate, sa ia fa’atula’i le mau ina ia fa’aulu se i’ugafono e talosagaina ai le fa’atula’i ese o sui ia e to’alua, lea fo’i na lagolagoina uma e afioga i senatoa.

Na faailoa e Tuaolo i luma o le maota maualuga e fa’apea, o le agaga o le maota, ia momoli le feau i le atunu’u, e le taliaina e le maota maualuga gaioiga faapenei le sa’o o lo o faia e i latou o lo o tuu atu i ai le fa’atuatuaga o le kovana ma le malo, latou te sailia auala e manuia ai le atunu’u.