Na fa’amaonia e le Pulesili o le Falema’i a le LBJ i luma o le Komiti Soofa’atasi a le Fono Faitulafono i le vaiaso na te’a nei, lona fesiligia lea o le amiotonu o totogi a ni isi o tagata faigaluega a le falema’i.

O lea saunoaga a Taufete’e John Faumuina, o lana tali atu lea ina ua fesiligia e le ali’i faipule ia Vesi T. Fautanu le ali’i pulesili, pe fa’afefea ona fa’atusatusa totogi o ni isi o tagata faigaluega a le falema’i, ma totogi o foma’i o lo o pau i ai le mamafa o le galuega.

Mo se fa’ata’ita’iga e pei ona taua e Vesi, e i ai le tagata faigaluega e $90,000 lona totogi i le tausaga, tusa lea ua sili atu lona maualuga nai lo le totogi o ni isi o foma’i.

Saunoa Taufete’e e fa’apea, “O le isi lena vaega o lea ua o toe fa’afo’iina atu o latou totogi i le Ofisa o Tagata Faigaluega a le malo, se’i fa’amalamalama mai le mafua’aga ua maualuga ai faapea totogi o nei tagata faigaluega.”

Saunoa Taufete’e e fa’apea, e musu o ia e soona fesiligia fa’aiuga sa faia e isi ta’ita’i ua mavae atu, ina ne’i fa’apea le aufaigaluega e eleelea lona loto i faaiuga ma totogi ua maea ona faatulaga, ae o lo o fa’atali sana fa’aiuga e fai i se ripoti mai le Ofisa o Tagata Faigaluega a le malo e uiga i lenei mataupu.

Na fa’ailoa e sui o le Komiti a le Fono ia Taufete’e e fa’apea, o le isi lea fa’afitauli ua tele tausaga o fetaia’i ma le Falema’i, o le maualuluga o totogi o tagata faigaluega nai lo Foma’i, ae o Foma’i o lo o mamafa i ai le fa’atinoina o le galuega.

Na fa’ailoa fo’i e sui o le Komiti Soofaatasi e fa’apea, e foliga mai o le isi lea mafua’aga e ala ai ona fa’aletonu le auaunaga a le falema’i, ona ua tele tupe e alu i totogi ae laititi i le fa’atinoina o ana tautua, e aofia ai ma le fa’atauina mai o vailaau ma fualaau e togafiti ai gasegase.

“Afai ae toe fetuu’una’i totogi nei ua fai si maualuluga, ou te talitonu o le a fa’asaoina mai ni isi vaega tupe e fesoasoani ai i le fa’atauina o vailaau ma fualaau mo le falema’i,” o le saunoaga lea a Vesi.

Na fa’ailoa atili e Vesi e fa’apea, sa ia fesiligia se tasi o foma’i i le vaiaso na te’a nei e uiga i vailaau ma fualaau, lea na fa’ailoa atu ai e le foma’i lea ia te ia, e le o lava sapalai o vailaau ma fualaaua le falema’i o lo o i ai.

Na fa’amanino e atili e Taufete’e e fa’apea, o le faafitauli o lo o tula’i mai, o lo o ia i pea lava aitalafu tuai a le falema’i e le i mae’a ona totogi i ni isi o kamupani o lo o faatau mai ai vailaua ma fualaau i fafo, o le mafua’aga lena e fai ai ma poloka le oka o sapalai e auina mai, pe afai ae fa’aletonu le totogiina atu o tupe mo sapalai.

‘E faigofie lava ona matou fa’apea atu i le kamupani o lo o oka mai ai sapalai, aua le popole o lea o le a totogi atu le tupe mo sapalai ma le aitalafu, ae a le maua loa e le falema’i le tupe e tatau ona totogi, ona fa’atoa tula’i mai ai loa lea iina o le fa’afitauli,” o le saunoaga lea a Taufete’e.

Saunoa avili fo’i le ali’i pulesili e fa’apea, afai e maua uma atu tupe mai le malo mo le falema’i, fa’atasi ai ma le lelei o le aoina mai o pili a le falema’i mai le atunu’u, oa mafai ai lava lea ona sologa lelei le okaina mai o sapalai mo vailaau ma fualaau.