[E toe fa’atalofa atu i le mamaluo le aufaitau i lenei aso, atonu sa outou maua se vaiaso fiafia ma le manuia, ae alo mai loa, o le toe sosooina lenei o le tatou fagogo, lea na gata mai i le vaiaso na te’a nei i le taimi lea ua fetilofa’i solo ai tagata o le aiga e fia iloa po o ai lea e le o auai i le ‘aiga fiafia a le ulugali’i fou.]

A o fetilotiloa’i solo le aiga e fia iloa po o ai e le o i ai i le fiafia mo le aiga fou, na mate uma ai le to’atele, o le tamaititi o Koso lea o lo o misi i le taimi lea, ae sa fa’amalosi ‘au atu pea matua o Silia i le ulugali’i fou, aua le manatu i se isi tulaga ina ua le vaaia Koso, ae alo pea e fa’amae’a le la fiafia, se’i maua se avanoa ona fesiligia lea o Koso i le mafua’aga o lona le auai. Ua aga’i atu i le leva o le po le fiafia mo le ulugali’i fou, e oo lava i tamaiti ma tupulaga laiti o le nu’u, ua tumutumu uma i le faletalimalo o lo o faia ai le fiafia mo le ulugali’i fou. O le mae’a ai o le fiafia i lena po, na taape uma ai le nuu i o latou aiga, ae ua aga’i atu fo’i le ulugali’i fou i lo la fale ma o la loto ua tumu i le fa’anoanoa, ina ua la le vaaia le tamaititi o Koso i lea po.

Sei o tatou asiasi atu i le tamaititi o Koso ma lona aumau ai i le ma’umaga na o ia. E lei malama lelei le taeao o le aso na sosoo ai ae ua leva ona sisina le afu o Koso i le faiga o lana lafo, atoa ai ma lana togalaau ‘aina lea ua amata ona fai, ona o le fa’amoemoe e saili ai tupe e fesoasoani ai i nai ona matua, aemaise o le fa’atauina o mea e mana’o i ai. Ua tuana’i le lua vaiaso talu ona aumau Koso i le fa’atoaga ma ua amata fo’i ona iloa e le to’atele o le tupulaga le suiga lea ua faia e le tamaititi o Koso, o le aumau to’atasi le fa’atoaga ma atina’e le fa’atoaga mo lona aiga, ma ua avea ai fo’i o se lu’itele o ni isi o tupulaga o le nu’u. O le masina muamua talu ona aumau Koso i lana fa’atoaga na faateia ai le ali’i ina ua ia vaaia isi ana uo ua amata ona fau a la faleoo i le nofoaga o lo o faia ai a laua ma’umaga, ma ua naunau fo’i i laua e aumau i totonu o a la fa’atoaga e pei fo’i o Koso, e sili atu lena nai lo le nofo i tai i le aai ae tiga ai le ulu i le tele o le mau vevesi ma fa’afitauli o lo o pisapisao ai le nu’u atoa.

Ua mautu le mafutaga a Koso ma ana uo i uta i le fa’atoaga, ua aave fo’i tala i le manaia o fa’atoaga a le au alii lenei, atoa ai ma togalaau ‘aina lea ua amata ona la’u e fa’atau i luga o le auala i le tele o afiafi, ma ua avea lea o se lu’itele i isi tupulaga o le nu’u e seasea aua ni avanoa e galulue ai i a latou fa’atoaga. I le isi afiafi ao nofonofo Koso ma ana uo i totonu o le faleoo ma talatalanoa i le suiga ua latou faia i tupulaga a le nu’u, na fa’ateia ai i latou ina ua latou vaaia ni tagata se to’alua o lo o aga’i atu i le vaega tonu o lo o latou i ai, ae ina ua manino i le latou vaai, na iloa ai e Koso o lona tuafafine o Silia ma lona to’alua o Keli lea ua aga’i atu ia te ia, o lea na fa’ailoa atu ai loa e le ali’i i ana uo, e sili pe a latou fa’amavae ae se’i maua se avanoa latou te talatalanoa ai ma si ona tuafafine ma lona to’alua lea ua aga’i atu.