O le taeao ananafi lea na amata aloaia ai le fa’amasinoga autu a le ali’i o Samuel Wright, lea o lo o to’atolu i ai ali’i o lo o tu’uaia e le malo i le fa’alavelave lea na osofaia ai le faleoloa o le Gold Conda i Fagaalu i le masina o Me 2014.

O isi ali’i to’alua o lo o a’afia fo’i i lenei mataupu, e aofia ai le ali’i o Falefatu Asi lea o lo o tuli i le toese i Tafuna i le taimi nei lana fa’asalaga fa’a falepuipui e 15 tausaga, ina ua ta’usala o ia e le fa’amasinoga i le moliaga o lona fesoasoani lea e fa’atino le solitulafono o le faomea, ma le ali’i o Alatuna Simi o lo o taofia pea i le toese i Tafuna i le taimi nei.

O le ali’i loia ia Russel Smith o lo o tula’i mo le malo, ae o le ali’i loia fautua ia Michael White o lo o tula’i mo Wright, lea foi o lo o taofia i le toese i Tafuna i le taimi nei, ina ua le mafai ona ia totogiina le $100,000 sa fa’atulaga e le fa’amasioga e tatala ai o ia i tua.

Ina ua fa’agasolo taualumaga o le fa’amasinoga autu a Wright i luma o le afioga i le ali’i fa’amasino sili ia Michael Kruse, ma ana fa’amasino lagolago ia Fa’amausili Pomele ma Muasau Tasina Tofili, sa vaaia le pisi o le ali’i i le tusitusiina i lalo ana fa’amaumauga, a o saofa’i i tafatafa o lana loia ma lona ofutino lima uumi ma lona fusiua.

O lo o tu’uaia fa’atasi ia Wright ma Simi i moliaga mamafa o le faomea i le tulaga muamua fa’apea ai ma le gaoi.

Na taua e Smith i le vaega iloilo iuga e fa’apea, o le mataupu e pei ona tu’uaia ai Wright na afua mai i le fa’alavelave lea na tula’i mai i le vaveao o le aso 1 Me 2014 i Fagaalu, ina ua latou taupulepule ma ni ali’i se to’atolu e osofa’i le faleoloa o le Gold Conda ma le fa’amoemoe e fa’atino ai i totonu se solitulafono.

O fa’amaumauga na maua e leoleo mai le masini pu’e ata sa i totonu o le faleoloa, o lo o afua mai ai tu’uaiga fa’asaga ia Wright, o ia lea sa ia fa’alala se tama’i fana i le fa’atauoloa, a o fusi ona foliga i se ofu.

I fa’amaumauga a le fa’amasinoga o lo o fa’ailoa ai e Simi i leoleo e fa’apea, i le po na tula’i mai ai le fa’alavelave, sa fa’ateia ai o ia ao i ai i le falema’i i Fagaalu ina ua vili atu Asi i lana telefoni e sau i luma o le auala la te fetaui ai, ae ina ua oso atu i totonu o le ta’avale a Asi, sa ia vaaia ai Wright o lo o nofo mai i le isi nofoa pito i tua o le ta’avale, ma fa’ailoa atu ai loa e Asi ma Wright ia te ia le latou osofaiga o le a alu i le faleoloa o le Gold Conda.

O le ta’avale lea a Asi o lo o tu’uaia e le malo sa fa’aaoga i le osofaiga, ina ua fa’atali atu Asi i totonu o lana ta’avale ae o Simi ma Wright i totonu o le faleoloa mo le fa’atinoina o le osofaiga.

Na faailoa e Simi i leoleo, o Wright sa ia ta’iina le fana i le fa’atau oloa, ae ina ua fesiligia e leoleo ia Wright, sa ia ioeina ai lona umia o le tama’i fana atoa ai ma lona ta’i o le tama’i fana i le fa’atau oloa.

Mai le tupe e $360 na fa’amaonia e leoleo sa leiloa mai i le osofaiga, na taua e Wright i Leoleo, e $120 lana vaega sa maua mai ai i lea tupe.

O ni isi o molimau ua fa’amoemoe le malo e valaau ao fa’agasolo ai taualumaga o lenei mataupu i le vaiaso nei, e aofia ai leoleo sa su’esu’eina le mataupu, fa’apea ai ma le tama’ita’i fa’atau oloa sa i ai i le taimi na fa’atinoina ai le solitulafono.