Na fa’amaonia e le sui fa’atonusili o le Matagaluega o Galuega Lautele a le malo ia Fa’alavai Ta’ase, i luma o le Komiti o Galuega Lautele a le maota o sui i le aso Lua na tea nei e fa’apea, o lo o i ai lava ni isi o vaega tupe o lo o nofo aitalafu ai le latou ofisa i ni isi o kamupani tua o lo o fa’a konekarate i le fa’atinoina o ni isi o galuega e aofia ai le fausiaina o auala i vaega eseese o le atunu’u.

E ui o lea fa’aletonu o lo o tau ponatia ai le naunau mai o kamupani tua e fa’atino la latou galuega fesoasoani i le malo, peita’i o lo o vaaia lava lo latou naunau atu e ofo atu lea tautua.

Mo se fa’ata’ita’iga e pei ona saunoa le susuga a Ta’ase o le kamupani fai auala a le McConell Dowell, lea fo’i sa latou fausia se vaega o le auala e aga’i atu i Aoloau i le silia ma le lua tausaga talu ai, peita’i e o o mai lava i le taimi nei e le i mae’a lava ona totogi e le malo le vaega tupe sa fa’aalu mo le fausiaina o lea auala, e ui o lea fo’i ua toe talosagaina e le malo le fesoasoani a le McConnell Dowell mo le fa’atinoina o ni isi o galuega, e pei o le fausiaina o le auala i Lepuapua atoa ai ma le tele lava o isi galuega tau auala i totonu o le atunu’u.

Na fa’afetaia e le afioga i le ali’i faipule ia Timusa Tini Lam Yuen le matagaluega ona o le tele o vaega o magaala ua uma ona fausia ma faaleleia, e ui i le utiuti o le itu tau tupe, ae o lo o galulue pea mo le mea sili e fesoasoani ai i mafatiaga o le atunu’u.

Pau le talosaga a le ali’i faipule, e manaia ae fai se fuafuaga alu mamao a le matagaluega i se auala e foia ai le fa’afitauli lea o lo o maitauina pea i le tele o taimi e leaga ai le tau, o le fiu lea o le matagaluega e tanu omoomo o le auala i uta oneone ae toe leaga fo’i.

“O le agaga autu o la’u fautuaga, e le o se fa’asea, ae o se auala ina ia umi atu ai se taimi e lelei ai auala a le atunu’u, nai lo le timu lava ma tanu i oneone, lona uiga e alu lava le tausaga o fai lea galuega”, o le saunoaga lea a Timusa.

Ae na saunoa le susuga a Ta’ase e fa’apea, o ni isi o taimi e maua fua mai ai e le ofisa uta oneone mai kamupani tua e tanu ai omoomo.

Sa ia taua fo’i le tele o galuega ua tu’u atu i kamupani tua latou te fa’atinoina e pei o le fa’atutumu o omoomo o le auala, atoa ai ma le fausia o auala fou i isi vaega o le atunu’u, ona o lea ua alo atu le matagaluega e fa’atino isi galuega e pei o le fausia o alavai ma auvai, ina ia fesoasoani ai i manaoga o lo o tutupu mai i vaega eseese o le atunu’u.

Toeitiiti o faipule uma na fa’aleo o latou finagalo e tusa ai o tulaga fa’aletonu i auala i itumalo ta’itasi, aemaise ai isi mataupu e pei o alavai, auvai, taligalu atoa ai ma fale fa’atalipasi.

Ae na manino i le saunoaga a Ta’ase i luma o le komiti e fa’apea, o le fa’afitauli numera tasi o lo o feagai ma le matagaluega i le taimi nei, e le o i ai se vaega tupe e fa’atino ai le anoanoa’i o manaoga o lo o fa’ailoa atu e afioga i faipule.

Pau vaega tupe o lo o maua e le matagaluega i le taimi nei e fa’atino ai galuega o auala, taligalu ma auvai, o vaega tupe o lo o maua mai i tupe o galuega tetele (CIP), atoa ai ma tupe o lo o maua mai i le vaega o lo o fa’atupeina galuega mo ala tetele i le atunu’u, ae afai e maua ni nai tupe lotoifale a le matagaluega, ona taumafai lea e fa’atino ai nai manaoga mai le anoanoa’i o manaoga o lo o ta’atitia i le ofisa.