E le gata na fa'afetaia e le afioga i le ali'i kovana ia Lolo Matalasi Moliga le mamalu o le aufai fa'atoaga na mafai ona tu'uina atu la latou sao i le fa'aaliga sa faia i le vaiaso na te'a nei, ae sa ia toe fa'amanatu foi i le aufai fa'atoaga ma le atunu'u atoa, o le laueleele o lo o tua i ai le tamaoaiga o le atunu'u, o le tofi lea o Samoa na aumai e le Atua, e tausi ma fafaga ai ona tagata.

Na fa'atumulia le malae o le Su'igaula a le Atuvasa i le mamalu o le atunu'u na mafai ona autova'a atu e molimauina le fa'ai'uina ma le manuia o le fa'aaliga a le aufai fa'atoaga i le vaiaso na te'a nei, lea fo'i sa auai ni isi o ta'ita'i o le malo, atoa ai ma le aufai fa'atoaga na fa'apitoa i ai le aso.

O se sauniga lotu pu'upu'u na taita'ia e Rev. Iopu Ta'avao, o le Ekalesia Metotisi i Malaeloa na tatalaina ai le sauniga, atoa ai ma viiga o le Atua na lagiina lava e le autalavou a le Ekalesia.

Na fa'amamafa e Rev. Ta'avao le tatau lea ona "toe susu'e le vao ma toe save'u le palapala", o iina o lo o taoto ai fa'amanuia a le Atua mo ona tagata.

Saunoa le ali'i faifeau e fa'apea, o le tele o fa'afitauli o lo o fetaia'i ma ni isi o le aufai fa'atoaga, e mafua mai i le lima tagovale o tagata paie e le galulue, ae fa'amoemoe lava i le gaoi o fa'atoaga a tagata galulue.

O le saunoaga a Rev. Ta'avao, na feso'ota'i ma le saunoaga autu a le afioga ali'i kovana i lea afiafi, lea na ia unaia ai tagata fai fa'atoaga uma o le atunu'u, ina ia fa'amalolosi e galulue ma fa'ato'a le lauelele, o le tofi lea o Samoa na fa'amanuia mai i ai le Atua.

"E sa'o le saunoaga a le ali'i faifeau, leai se mea tatou te tau saili ai fua i ni isi manuia mo tatou aiga, o lea ua uma ona aumai e le Atua fa'amanuiaga mo Samoa e ala i le laueleele, o lo tatou tofi lea, pau la tatou galuega e fai, o le fa'atoa ma galulue ae fa'atupu e le Atua mea uma o lo o tatou galulue ai", o le saunoaga lea a le ali'i kovana.

Na fa'afeia e Lolo le mamalu o le atunu'u na mafai ona autova'a atu e molimauina le tauvaga a le aufai fa'atoaga, aua o fua ia o galuega ua mafai ona latou fa'alauiloa e fa'ailoa ai fa'amanuiaga a le Atua i o latou olaga.

Saunoa atili fo'i Lolo e fa'apea, o le fuafuaina o le aso mo le fa'aaliga a le aufai fa'atoaga i le lona tolu lenei o tausaga, e le i fa'ataga faia, ae na manatu le malo, ia soso'o le aso o le fa'aaliga a le aufai fa'atoaga ma le Aso Fa'afetai i tausaga ta'itasi, ina ia mafai ai ona maua se avanoa e fa'afetaia ai e Samoa le Atua, e tusa ai o ana fa'amanuiaga e le mavae mo ona tagata.

Sa ia taua fo'i le foafoaga a le Atua i Etena, o iina na afua mai ai fa'atoaga ma lafu manu ma le fa'anaunauga o le Atua, o mea ia e tua i ai le tagata soifua ua ia faia.

"Fa'atoa vevesi nei lava i le feagaiga fou le Au Soo i faiga faiva ma isi galuega, ae o le foafoaga a le Atua i Etena na afua mai ai fa'atoaga ma lafumanu, o iina fo'i e taula i ai lo tatou fa'asinomaga, o le mea moni, ia tataou fa'afetaia le Atua i ana fa'amanuiaga ma mea ua ia aumai mo Samoa, ia tatou fa'amaoni fo'i e tausi ma puipui fa'amanuiaga a le Atua ua tu'uina mai mo tatou, e ala i le laueleele", o le saunoaga fa'ai'u lea a le alii kovana.

Na fa'ai'u le polokalame i le tufatufaina o fa'ailoga mo le tuuga fautasi o lenei tausaga, e fa'ai'u i ai le masina na fa'ataua ai ogasami ma le si'osi'omaga, le "2014 Fautasi Ocean Chellenge", lea na fa'atautaia e le Matagaluega o Fefa'atauaiga ma Alamanuia a le malo.

O le Sa mai le afioaga o Vatia, le Fuao na sola ma le siamupini o lenei tausaga, fa'atasi ai ma le fa'ailoga tupe e $9,000, ae o le Paepaeulupoo II mai le afioga o Aua na mauaina le fa'ailoga tupe e $8,000 mo le tulaga lua.

Na taua e le faatonusili o le Ofisa o Faatoaga ia Lealao M. Purcell i le Samoa News lona lagona fa'agae'etia ina ua mafai ona fa'ataunu'uina ma le manuia le fa'aaliga a le aufai fa'atoaga i lenei tausaga, ina ua vaaia le to'atele o le aufai fa'atoaga na mafai ona lesitala o latou suafa ma auai i le fa'aaliga.

"Pau le suiga o le fa'aaliga i lenei tausaga, ua tau le vaaia se talo ae ua tele atu fualaau 'aina na la'u mai e le aufai fa'atoaga, mafua lea tulaga ona o le tauvaga i le tausaga lenei, ua manatu e ave le fa'amuamua i fualaau 'aina, o le mafua'aga fo'i lena ua vaaia ai le tele o le fualaau 'aina ae fa'aitiitia tulaga o fua o fa'aeleeleaga e pei o le talo, fa'i, ufi ma ta'amu", o le saunoaga lea a Lealao.

Na faamaonia mai fo'i e Lealao i le Samoa News, o le aso Lulu o le vaiaso nei lea ua fa'atulaga e tufatufa aloaia ai fa'ailoga mo le aufai fa'atoaga uma na lautogia i le fa'aaliga o lenei tausaga, ma o fa'ailoga tupe ua sauni le Ofisa o Fa'atoaga e tufatufa atu i le aufai fa'atoaga.