faaliliu AF

Ao tau saili ai le tali o le fesili o loo tu’u fesili ai ni isi o le atunu’u, poo anafea na avea ai le afioga a Faoa A. Sunia ma Loia a le Teugatupe o le Litaea a le malo, na fa’amanino ai e le Pulesili o le Ofisa o le Litaea lea ua faamalolo mo le 30 aso e faapea, o Faoa na fa’a faigaluega e le Komiti Fa’afoe tuai ua mavae atu e avea ma Loia a le Litae.

O le susuga a Luatua Filisouaiga Taafua na amata fa’amalolo mo le umi e 30 aso mai ona tiute i le vaiaso nei, i lalo o se fa’aiuga a le Komiti Fa’afoe a le Litaea, fa’avae mai lea i luga o ni tu’uaiga i le le sa’o o fa’aiuga sa ia faia, atoa ai ma le sese ona fa’aaoga o tupe a le Litaea.

Ina ua taumafai le Samoa News e saili ni isi molimau e lagolagoina ai le molimau a le susuga a Luatua, na taua ai e le Pulesili le Tumau a le Litaea lea ua i ai nei ia Caroline Wendt i le Samoa News e fa’apea, o Faoa na fa’a faigaluega e le Komiti Fa’afoe ua mavae atu.

E ui fo’i e le’i mananao Wendt ma Luatua e fa’ailoa mai i le Samoa News le aofa’i o le totogi o Faoa o loo galue ai mo le Litaea, na fa’amaonia mai e ni isi o totino o le Komiti Fa’afoe i le Samoa News, e silia i le $80,000 le totogi o Faoa o loo galue ai i lana galuega o loo i ai nei.

O le mataupu lenei na mafai ona fa’amanino mai e Wendt ma Luatua, i le mae’a ai lea ona fesiligia e le to’atele o totino o le Teugatupe a le Litaea a le malo le Samoa News, poo anafea na avea ai Faoa ma loia a le Litaea, ae fia fo’i lona totogi o loo maua mai lana galuega o loo galue ai.

O finagalo mai ni isi o le atunu’u atoa ai ma ni isi sa fesootai mai i le Samoa News, na afua mai ina ua amata fa’asalalau tusitusiga a le Samoa News e fa’atatau i le mataupu sa tuuaia ai e le Komiti Faafoe ia Luatua, i lona faaaoga lea o le saini a le Taitaifono o loo i luga o le ‘Rubber Stamp’ e aunoa ma se faatanaga, faapea ai fo’i ma le totogiina o siaki i se kamupani e lei lesitalaina.

Ao faagasolo ai tusitusiga e uiga i lea mataupu, o iina na taua ai le suafa o Faoa, o le loia a le Litaea, ae ina ua fesiligia ni isi o sui o le Komiti Fa’afoe, sa latou taua ai e fa’apea, o Luatua na fa’a faigaluegaina ia Faoa.

Ae tusa ai o le saunoaga a Luatua lea ua fa’amalolo le tumau nei, o le afioga i le alii kovana ia Lolo Matalasi Moliga sa fautuaina le Komiti Fa’afoe i le amataga o le 2014 ina ia faa faigaluega sa latou lava loia, ona e pisi tele le Loia Sili a le malo i le fa’atinoina o ona tiute tauave, aemaise ai le tuuina atu o fautuaga i vaega tupe a le Litaea.

Saunoa atili Luatua ina ua fesiligia o ia, ina ua mae’a le fautuaga lea a le alii kovana, sa poloaina ai loa le Komiti ina ia oo atu i le Ofisa o le Kovana mo sa latou fonotaga taua, fa’atasi ai ma le Lutena Kovana, lea na toe fautuaina ai le Komiti Fa’afoe ina ia saili sa latou loia e gafa ma le fautuaina o tiute fa’atino a le Komiti.

Na taua e Luatua e faapea, ina ua mae’a le feiloa’iga lea, sa fono ai loa le Komiti Fa’afoe, ma pasia ai loa le tatau lea ona saili sa latou loia fautua, ma fa’asalalau ai loa le avanoa i luga o le Samoa News.

Ina ua fesiligia Luatua e uiga i le totogi o Faoa, sa ia taua ai e fa’apea, o totogi o loia mo isi fo’i vaega tumaoti a le malo e aofia ai le LBJ, ASPA, Faletupe o Atina’e faapea ai ma le ASTCA, sa iloilo uma lava i le taimi na iloiloina ai le tusi talosaga ma agava’a o le tagata talosaga, ma fa’atulaga ai loa le totogi talafeagai e pei fo’i ona i ai le totogi o le loia a le Litaea.

E tusa ai o se fa’amatalaga sa tuuina mai i le Samoa News, e le mafai ona fa’alauiloa le aofa’i o le totogi o le loia a le Litaea.

Na saunoa atili Luatua e faapea, soo se mataupu e fia malamalama i ai totino o le Teugatupe a le Litaea, latou te mauaina uma ia fa’amatalaga mai le Ofisa. Sa ia taua fo’i e fa’apea, o le konekarate a Faoa sa sainia ma aloaia e le Komiti Fa’afoe ua mavae atu, lea fo’i na sainia e le Taitaifono tuai sa i ai, le susuga a Aleki Sene Sr.

E talitonu le Samoa News, o le avanoa o Faoa sa faasalalau i le Samoa News i le masina o Me 2014.

Sa tuuina atu e le Samoa News ni fesili e tusa ai o le aso na amata galue ai o le loia a le Litaea, peita’i e lomia lenei ripoti i le aso Tofi na te’a nei, e le’i maua mai lava se tali mai ia Faoa.

I le tarmi nei, ua faaalia e ni isi o sui o le Litaea le tuuina atu lea e Faoa o se tusi i luga o lana imeli i le Taitaifono o le Komiti Faafoe o le Litaea faapea ai Totino o le Komiti Faafoe, e fa’ailoa i ai le fa’aagafua ese mai o ia mai lona toe a’afia i soo se mataupu lava e fa’atatau i le Litaea, atoa ai ma suesuega o loo faagasolo i le taimi nei e fa’atatau i le Pulesili o le Litaea.