E ui i le to’atele o tufuga ta pe’a ua i ai i ona po nei, e le gata o i latou o lo o faaaogaina le ‘au ae o isi foi ua latou faaaogaina masini, peitai o le talitonuga a le susuga Su’a Vaofusi Pogisa Su’a, o le tatau a Samoa e i ai lona amataga.

O le galuega o le taina o le tatau na aumai e tamaitai e toalua e pei ona malaga mai ma le ato ‘au lea e talitonu i ai nisi o le atunuu, ae leai se ata o se tatau na o mai ma i laua.

O le ata o le pe’a poo le tatau ua i ai nei, o mea lava na taumafai le aiga ta tatau e tuu faatasi, ma faaopoopo atu lea mamanu i le isi mamanu, ina ia talafeagai ma foliga aulelei le tatau, lea ua avea nei ma laei a Samoa, e le gata o le soga’imiti a alii ae o le malu foi a tamaitai.

“Ina ua faatoa tau afuafua le taina o le pe’a, sa ese lava ona foliga, a uma ona faasaga i tua ona faasaga lea i luma, ua le iloga se tulaga sa tau faavasega i ai e le aiga ta tatau le tulaga tonu o le pe’a ina ia ata mai ma manaia i le vaai, mulimuli ane, na mafai ai loa ona maua le pe’a e pei ona i ai nei,” o le saunoaga lea a Su’a.

“O ulua’i ‘au na o mai ma teine na aumaia le galuega, e talitonu le aiga ta tatau sa fai i ponaivi o tagata, fai mai o le ivi asoaso na fai ai le ‘au mono, o le ivi foe na fai ai le ‘au sogiaso ma le ‘au tapulu, e i ai foi le talitonuga o le mea sa palu ai le lama o le atigipoo o le tagata (tulou), ae o le ulua’i lama sa maua mai i le toto o le tagata na susunu, o mea ia na afua mai ai le amataina mai o le galuega, ai o le mafuaaga lena e satia ai e saualii se tagata pe a taoto i le taina o lana tatau i aso la, ona o mea sa faaaoga e faatino ai le galuega, peitai o aso nei, ua i ai suiga e pei ona molimauina e tagata,” o le saunoaga lea a Su’a.

Sa faamatala e Su’e, o le ausaga a tama’ita’i e toalua o Taema ma Tilafaiga na amata mai i Fitiuta i Manu’a, ona muamua lea tau i Falealupo ma a’e ai le faiva iina, peitai e le’i manatu mamafa i ai Falealupe le faiva a tamaitai, o lea na toe faaauau ai loa le ausaga a tamaitai ma oo atu i Salelavalu.

O le pine faamau e iloa ai o Falealupo na mua’i a’e ai le faiva a tamaitai, o iina o lo o i ai le igoa tufuga e taua o Mua’ifaiva, e faamanatu ai le ulua’i taimi na a’e ai le faiva a tamaitai.

Ina ua taunuu i Salelavalu le malaga a teine, sa leai se isi i le fale, ae na iite mai Su’a i uta i le vao, e foliga mai o lo o malotia lona fale i tai, e taunuu ane Su’a ua toe fo’i le faiva o teine, ona maua ai foi lea o le isi igoa tufuga i Salelavalu o Li’aifaiva, e faamanatu ai le taimi na iite mai ai Su’a i uta o lo o i ai le malaga a teine i tai.

Na faasolo le malaga a teine i Saleilua i Falealii, ma o iina na faatoa talia lelei ai loa le faiva e le tagata e igoa ia Tapu, o ia foi lena na tuu ai loa e tamaitai le kuluma poo le mea lea e ta’u e tagata o le ato sa tuu i ai totonu o ‘au.

Saunoa Su’a, o Tapu lea na tupuga mai ai le aiga ta tatau a Samoa, lea e aofia ai o ia, o le tupuaga lona 7 lea talu mai Taema ma Tilafaiga, ma o lo o ia faaauauina pea le galuega ma ni isi o ona uso e oo mai le taimi nei.

O le vaiaso nei lea ua faamoemoe e toe taliu atu ai i Apia Su’a ma lana aumalaga, i le mae’a ai o le faamoemoe e pei ona malaga mai ai i le teritori nei.