Ads by Google Ads by Google

O tala o le Vavau

O LE VAI I MATAVAI SAFUNE

O le isi lenei vavau e ese fo’i lona faamatalaina atoa ai ma lagona e tutupu mai ai, ona, e foliga mai e le gata o loo talanoa mai i le soifuaga o le tagata, ae o loo faapea fo’i ona vavala mai ai le olaga o meaola na faia e le Atua i le foafoaga. O se tala e uiga ese fo’i, ae o lea o le a tatou aga’i atu i ai mo le tatou polokalame o lenei vaiaso.

I le nuu o Matavai Safune i le motu tele i Salafai, o loo taoto ai i luga o le sami le vai lenei e taua o le “Mata o le alelo,” ma o se vai e malulu tele, e i ai ‘ai o lenei vai aua fai mai le tala a tagata o le afioaga o Matavai, soo se tagata fou lava e faamalu ai i le vai lenei, e seasea ona sao mai ai aua e gasegase ona o le malulu tele o le vai pe a taele ai. O le vai e tolu ona vaega, o le vai inu, o le vai e faamalu ai tama’ita’i, ma le vai e fa’amalu ai ali’i, ma o le vai fo’i, e seasea taeele ai nisi ona e i ai ona tapu, afai la ae le usita’i se tasi tapu o le vai, o le iuga o lea tagata o le gasegase ma i’u ai lava ina maliu.

O le tala e uiga i lenei vai, fai mai na mafua mai i le teine o Sina ma ona matua, lea sa nonofo i luga o le maugaloa i aso ua mavae, ma o le masani lava la a le tamaitai o Sina, o le alu lea i le vai e igoa o le Vaiolei’a e asu vai mai ai. Fai mai le tala ua oo i le isi aso, ao nofonofo matua o Sina i luga o le Maugaloa, sa alu loa Sina agai i lalo o le eleele  laugatasi i le vaega o loo i ai le Vaiolei’a  e asu vai mai ai. Ao alu atu Sina i le Vaiolei’a, sa ia maua ai se tama’i tuna, ona ia foi lea i uta i le maugaloa i ona  matua, ma ave le tama’i tuna lenei e fai ma ana fagafao, aua e leai se isi e tafao i ai, e oo i se uso poo se tuagane. Fai mai le mau a tagata Safune sa tausi ma le faamaoni Sina i lana fagafao lenei, e ala i le fafaga faalelei i aso uma.

Sa ia tuuina le tama’i tuna i totonu o se tama’i tanoa ma o iina na tausi ai e le teine lana fagafao. Fai mai le tala ua televave tele le tupu a le i’a lenei ma i’u ai loa ina ua le ofi i totonu o le tanoa sa tuu muamua ai, ona manatu lea o le tamaitai o le a ave lana fagafao e tuu i le tanoa tele ona ua le ofi, peitai fai mai le tala, e lei umi foi ona tuu le i’a i totonu o le tanoa tele ae e ofi ona manatu loa lea o le tamaitai o Sina, e sili ai loa ona ave e tuu i le Vaiolei’a atonu e ofi ai, peitai fai mai le mau a tagata Safune e lei umi lava foi ona tuu i ai le i’a i totonu o le Vaiolei’a ae tupu le faaletonu ia Sina ona ua ia vaaia foi e le taitai lava lea mo lana i’a ona ua tupe tele le i’a.

Ua  amata ona tupu le faaletonu ia Sina ona fai mai le tala, soo se mea lava e alu i ai, ua amata ona taumulimuli i ai le i’a, ma ua iloa nei e le tamaitai, o lana fagafao o le meaola ae amio faa tagata, ua amata foi ona ia iloaina, poo fea lava e alu i ai, e le toe misi le i’a ma ia aua o le a taumulimuli atu pea ia te ia, ona fefe ai loa lea o Sina ma sola ese, peitai sa le mafai lava ona foi ai le i’a i lona mulimuli atu pea ia Sina. Fai mai le tala ua amata le tuligasi’a a le tuna ma Sina seia oo atu loa i le vaega tonu o loo i ai le vai o le Mataolealelo, o iina na ita tele ai le tamaitai i lana tuna, ona faapea atu loa lea o ana tupu, “A’o mata ea la o le alelo,” fai mai le tala ma le mau a Matavai Safune o iina na faatoa maua ai loa le igoa o le vai, o le “MATAOLEALELO.” Soifua.