Ads by Google Ads by Google

Olaga Le Tumau

Vaega: 6

 

Tatou fa’afo’i pea le vi’iga ma le fa’afetai i le Atua Soifua, ona o Lana tausiga alofa ma lana pule fa’asoasoa mo i tatou e le mavae. E ao ai ona o tatou fa’apea ifo, “Le Ali’i e, ia e alofa foa’i mai mo i matou le loto maualalo, ina ia mafai ai ona o matou talia ma le onosa’i faigata ma mafatiaga o le soifuaga nei, a’o le vi’iga ma le fa’amanu matou te fa’afo’i atu i Lau Afio e fa’avavau, fa’avavau lava, Amene.

 

Fa’aauau pea lau faitau mo lenei aso, ae se i taumafai atu, po’o fea o le a o’o i ai le taunu’uga o la tatou tala. Manatua, o lea o lo’o fai le talatalanoaga a Keisi ma ana uo e to’alua o Lenina ma Keli i totonu o le fale’aiga, lea na teuteu e Keisi ma lana kamupani.

 

O lea la ua o’o le talanoaga i le ali’i o Lisati Mone, ona ua fai ane le tala a Lenina i a Keli ma Keisi, o le mafu’aga lea o lo’o tiga ai lona ulu. Ae fai mai le tala, o le ali’i lenei, na alu ane e su’e sana galuega i le kamupani a Keisi ma Lenina, a’o fai fa’atai. E le i mana’o Lenina e talia, ae sa talia e Keisi le ali’i lenei, ona sa i ai le manatu o Keisi, atonu lava e mafai ona maua se a’oa’oga lelei mo Lusati i totonu o le la kamupani ma Lenina.

 

O le kamupani sa galulue fa’atasi ai Lenina ma Keisi, o le kamupani lea latou te su’eina galuega mo tagata e fia maua ni galuega. Afai la ua maua e i la’ua se galuega mo se tagata, ona ave loa lea e fa’afaigaluega ai. Fai mai la le tala, ina ua fa’afaigaluega e Keisi ma Lenina le ali’i o Lisati Mone, ma ave i le ofisa o le kamupani o Haskins, na i ai le mea na tupu ai i le ali’i lenei. Ma na tuli ‘ese ai e le kamupani ma lana galuega, o le mea ua tupu, fai mai, ua foliga mai ua tu’ua’i e le ali’i o Lisati ia Keisi ma Lenina i le ave o ia i le ofisa o Haskins e faigaluega ai.

 

O lea la ua fa’amata nei e Lenina i a Keisi ma Keli, fai mai na fa’ate’ia o ia i le taeao lava lea, ina ua tatala mai lana faitoto’a ae o lo’o tutu lala’i atu ai le ali’i o Lisati. Fai mai le tala a Lenina, ua ‘ava’avau ane i a te ia ia Lisati, e tatau ona toe su’e e ia se isi ofisa e ave ia e faigaluega ai. Ae na fai i ai Lenina, e leai, ua uma lona taimi, e tatau ona alu ia e su’e sana galuega. Ae ua fa’ali’i le ali’i o Lisati e foliga mai o le a  po e Lisati lona gutu.

 

Na tali Keisi, “Lenina, malie lou loto, o a’u na fa’afaigaluegaina Lisati, e pau la i a te a’u le leaga, malie lou loto.” Ua le tautala Lenina, ae foliga mai ua maligi ifo ona loimata i lea taimi. “Keisi, ua e alu ‘ese ae tia’i na o a’u e faia le kamupani, ae ui i lea, e leai se mea o i ai, e lelei fo’i, se i o’u iloa ai le faigata, aua ou te tu’u atu lava i a te oe mea uma, fa’amagalo mai so’u se se, i mea uma lava.”

 

Na a’apa ane nei Keisi ma u’u le lima o si ana uo o Lenina, “Lenina, ‘aua e te tagi fa’apena, va’ai oe, o le tele ia o ou itu lelei, e i ai fo’i ou itu leaga, e fa’apea uma lava tatou, e leai se isi e sao mai ai, ae ia avea o tatou vaivaiga ma ala tatou te malolosi ai, o lo’o lelei lava mea uma mo tatou, ae ‘aua e te toe tagi fa’apena, e le mafai e se tagata e to’atasi ona faia se mea, ae a pulupululima fa’atasi, ona mama lea o se avega, ae va’ai mai i a ma’ua ma Keli.

 

E faia pea…