Vaega: 52

Tatou fa’afeataia pea le alofa ma le agalelei o lo tatou Matai oi le lagi, ona o Lana tausiga alofa ma Lona agalelei mo i tatou i aso uma o lo tatou ola. ia o tatou manatua pea, e leai se mea e faigata i le Ali’i, o a ma’i o le tino ma mafatiaga, o lo’o i a te ia le fa’amalologa sili mo i tatou. Ae alo maia, o le a toe fa’aauau atu la tatou tala e pei ona masani ai i lenei aso, ae ia manuia lou alo atu i faiva ma tiute o le a feagai ai.

Na tali Loleni, “Lulu, na o sina mea e fa’aaoga mo lenei taimi, ae se i ma’ea mea o lo’o galulue ai Loia, ona ou vala’au atu lea o oe.” E le i uma ane tala ia a Loleni, ae toe oso ane Lulu, ma fa’ailoa i ai, e le taitai ona lava tupe ia ua na tu’u ane mo ia.

A’o faia pea tau’upuga a le to’alua lea, o le taimi lea, o lo’o fa’ataitaio mai lava Keisi mai totonu o lona potu pogisa, “Se tu’u ia, ou te le fia fa’alogo i nei tala e fai, tu’u ia.” Ae paga lea, e le o lagona ane e Lulu po’o Loleni lea tulaga.

Fai mai, na tilotilo ifo nei Lulu i lona uso i lea taimi, ma na fa’ate’ia ina ua va’ai atu ua sui foliga o Keisi, “Loleni, va’ai fo’i la i foliga o Keisi.” Na fesili Loleni,“E a foliga o Keisi.” Na tali Lulu, “O lo’o lagona e Keisi a ta tala o lo’o fai, ou te masalosalo lava, o lo’o lagona uma e Keisi tala o lo’o fai.”

Na lagona lelei lava e Keisi le soso ane o lona to’alua o Loleni i talane o lona moega, ma atonu o lo’o tilotilo ifo i ona foliga. Na fa’alogo ane nei Keisi, o fa’apea le tala a Loleni i a Lulu, e sili ona alu ona o lo’o fa’atali mai lana tama ma lana uo i a te ia, ae o le tulaga tau tupe, se i galulue lana ofisa e fa’atino se tulaga ina ia mafai ai ona maua atu se isi tupe tele mo Lulu. Na lagona lelei fo’i e Keisi le savali ‘ese a lona uso mai totonu o lona potu, ae e le i fa’atofa ane i a te ia.

Ua fa’asolosolo pea aso, ma vaiaso, ma ua o’o i masina, o taoto pea Keisi Masela i luga o le moega i totonu o le falema’i i le a’ai. Ua lagona fo’i e le tama’ita’i, atonu lava e toe fo’i lona malosi i le mea sa i ai pe afai lava o le a taumafai pea o ia e fa’asolosolo ona mafaufauga e fa’aaoga ai lona mafaufau. O le isi itu na manatu i ai Keisi, ona o lea ua ia mautinoa nei, o lo’o i ai se tagata o lo’o taumafai e fasioti ia.

O le isi lea misitelio lilo o lo’o mafaufau pea i ai Keisi, po’o ai lenei tagata ua taumafai e fasioti ia, ae po’o le a fo’i le mafua’aga. Ua tau mafaufau Keisi, pe i ai lava se tagata sa ia agaleaga i ai, pei ai fo’i se tagata sa ia faia ai ai se uiga le alofa, ua mafua ai ona taumafai e fasioti  ia.

O mafaufauga la ia o Keisi, ua atili ai ona malosi lona loto, ina ia mafai ona toe fia gaioi, ia mafai ona toe pupula ma ia mafai ona toe fo’i i lona malosi sa i ai muamua, a’o le i tupu le fa’alavelave i a te ia.

E faia pea...