Vaega: 63

Fa’atalofa atu i lou alafa’i mai i le manuia i lenei taeao fou, o le alofa ma le agalelei o lo tatou Matai oi le lagi, e ao ai ona o tatou fa’apea ifo, “Le Ali’i e, ia e alofa ma foa’i mai ia i matou le loto maualalo ma le loto mama, aua o uiga ia ua E finagalo ia o matou faia, ae o le vi’iga e fo’i atu lava i Lau Afio e fa’avavau, fa’avavau lava, amene.”

Ae na fa’apea mafaufauga o Keisi, “O le uiga o lo’o sau ai Lenina, ina ia fa’ama’ea lana mea na fai i a te a’u.” E le o iloa e Keli ia mafaufauga ia o Kesi ma ta’oto’oto i luga o lona moega. Na saofa’i ifo nei i talane o Keisi ia Keli ma amata loa le lana tala. Ua fa’amatalatala nei e Keli ia Keisi i le tamaloa ua o la feoa’i.

E le o se gata leaga, o se tamaloa lelei, aua ua uma ona ia fa’amatalatala i ai le mea na tupu i a Mika, le to’alua muamua o Keli. O lea la ua fa’amatalatala nei e Keli ona manatu e uiga ia Sitani, Fai mai, o le taimi atoa na fa’amtala ai e Keli ia Kesi mea uma o lo’o tutupu i lona olaga, e le i loa ane e Keli le maligi ifo o loimata o Keisi i lea taimi.

Ua fa’aauau pea tala a Keli, “Keisi, ma’imau pe ana e malosi mai, se i e feiloa’i i a Sitani, o se tamaloa lelei, ua maliu loa to’alua, ma o taimi uma lava ma te fa’atasi ai, e lagona lava le filemu o lo’u loto ma lo’u mafaufau, o le isi itu ua ou manatu i ai, e pei lava ua ou agaleaga ia Mika, ona ua ou mana’o i a Sitani, o lea la Keisi, nofo maia i luga, se e fa’ailoa mai i a te a’u le mea e tatau ona fai.”

Fai mai, e fa’alogo ane Keisi, ua tagi Keli i lea taimi, “Keisi, ua ou mo’omia lava oe si a’u uo pele i lo’u olaga atoa, ua e iloa le Keisi, e leai lava se tasi ou te tua i ai, ua na o oe lava, Keisi, o le tele o taimi e foliga mai ua ou agaleaga fo’i i a te oe, ina ua ou alu ou te fiafia, a’o lea o o’o e taoto pea, e foliga mai ua ou le alofa i a te oe Keisi.”

E le o ilao ane e Keli manatu o Keisi, o lo’o fa’apea ane, “Keli, ua tatau ona alu e te fiafia, o le mea fo’i ua leva ona tatau ona fai, ia e maua le fiafia i lou loto, ae maise fo’i o se tasi e alofa i a te oe.”

“Kesi, ou te mana’o ia e iloa, ou te alofa i a te oe, ua ou misia lava oe, toe fo’i mai, ia e finau ina ia e toe malosi mai Keisi, e tele lava mea ou te fia talanoa atu ai i a te oe.”

E fai lava tala ia a Keli ma tu a’e loa i luga ma sogi atu i a Keisi, fai main a lagona lelei lava e Keli o lo’o tafe ifo loimata o Keisi i lea taimi. Ua tu nei Keli ma tilotilo ifo i lana uo mamae, “Kesi, ua e lagona mai a’u, o e lagona mai a’u tala, oi ta’i fa’afetai, Keisi, Keisi, ala mai i luga ta o i le fale nofo mai i luga ta o ‘ese atu ma lenei potu.”

E faia pea…