Vaega: 64

E i ai le fa’amoemoe, o lo’o manuia le atunu’u i lenei taeao fou, e ala i le tausiga alofa a lo tatou Matai oi le lagi, e ao ai ona o tatou fa’afo’i le vi’iga ma le fa’amanu i le Atua Soifua, aua o ia e ona mea uma lava. ia manuia lou alo atu i faiva ma tiute o le a feagai ai i lenei aso.

Ua na o le milimili nei e Keli ia lima o Keisi, ma tilotilo ifo i lana uo mamae. Na fai si umi o nofonofo Keli i totonu o le potu o Keisi, ma e le i iloa e Keli le taimi e moe ai Keisi. O lea na ia tula’i ai loa ma fa’amavae ane i lana uo ma savali loa i fafo.

Manatua, e le o iloa e Keisi, po’o po, po ua ao fo’i, o le mea lea o lo’o tupu nei, i le isi itu, manatua na lagona lava e Keisi tala a tagata o lo’o fai, ae e le mafai ona gaioi pe tautala ane fo’i. A’o lea fa’atoa iloa e tagata e lagona e Keisi tala ina ua uma ona fai su’esu’ega a ali’i foma’i ma ua mautinoa ai loa.

Na ala Keisi, ina ua lagona le maualuga o le leo o tagata o lo’o tautala ane i le TV, ma ia iloa ai loa, ua ao. Ona o le ta’aloga o lo’o sau i totonu o le TV o le ta’aloga lea o le “The Prize is Right”, po’o le mate atu o le tau sa’o o oloa o lo’o fa’atau.

E fa’alogologo ane Keisi, o le leo o le TV ae o lo’o sau ai i tua ma le leo o lona uso o Lulu. O lona uiga o lea ua alu ane Lulu e asi ane ia i lea aso. Fai mai e fa’alogo a’e Keisi, o ta’u e le tamaloa lea e fa’afoeina le polokalama lea i luga o le TV, e su’e ane le tau sa’o o le seti tapolo, pe fia le tau. Na fa’alogo ifo nei Keisi, o fa’apea ane lona uso o Lulu i a te ia, “Keisi, fa’alogo fo’i oe, o le seti tapolo lea e fia iloa le tau.

Na alu le peti a le tagata muamua fai mai e faselau le tau, sau le peti a le tagata lona lua fai mai, na alu atu ai fo’i ma le peti a Lulu, e faselau tala. Sau le peti a le isi tagata fai mai e fituselau tala, o le isi na peti e afe tala. Na lili ane nei Lulu ma fesili i lona uso o Keisi, pe fia le tau o le seti tapolo, ona ua ia iloa e iloa lelei lava e Keisi le tau o le seti tapolo. Na fa’apea mafaufauga o Keisi ma taoto lava, “Afai o se seti e lelei atoatoa ma malosi, o le tau e tatau ona i ai e afe onoselau tala le tau.”

Na fa’ailoa ane nei e le tamaloa o lo’o fa’afoeina le ta’aloga e fa’apea, “O le tau o le seti lenei, e afe, onoselau luasefulu tala.” Ma na malo ai loa le tama na maualuga lana peti o le afetala. Ua ‘ata Lulu ma tilotilo ane i lona uso ma fa’ape ane, “Ou te iloa Keisi, e tau tonu lava lau peti, ona ua e iloa le tau o seti tapolo, e pei ona a’oa’o ai oe e le ta tama, e sa’o a’u.?”

E faia pea…