Vaega: 32

Taeao manuia i le alafa’i mai i fanuga lelei o le atunu’u i lenei aso, e ao ai ona o tatou fa’afo’i pea le vi’iga ma le fa’ane’etaga i lo tatou Matai oi le lagi, ona o Lana tausiga alofa mo i tatou i aso uma o lo tatou ola. Ae alo maia, o le a toe fa’aauau atu la tatou tala mo lenei aso.

O lo’o faia pea su’esu’ega a le ali’i Leoleo o Keneti, ma o le taimi fo’i lea, o lo’o fa’alogologo lelei Keisi i tali ma fesili o lo’o fai nei i totonu o lona potu.

Na tali Keneti, “Ua e malamalama lelei lava, aua o oe o le loia, e tatau  ona ou fesiligia oe i le tulaga lea, aua o le to’alua o le tagata e muamua lava fa’asaga i ai masalosaloga i fa’alavelave fa’apenei.”

Ua fai nei le tautalaga a Loleni, “Keneti, ua ou iloa tulaga fa’apenei, ma e sa’o lelei lava lau tala, o le to’alua lava o le tagata e muamua fa’asaga i ai le ulu o le la’au, ae  o a’u, ou te le mana’o i mea ua maua e lo’u to’alua, ou te galue lava a’u e sa’ili mea lelei mo a’u, o a’u sa i lo’u ofisa i le aso atoa, ma e i ai tagata latou te fa’amaonia la’u tala lea, e o’o lava i le taimi o le ‘aiga o le aoauli, ou te le i alu ‘ese mai i lo’u ofisa…sa ou i lo’u ofisa lava i le taimi na vala’au atu ai le falema’i, e uiga i a Keisi.”

Na toe fesili Keneti, “O i ai se inisiua o le ola o Keisi.?” Na tali sasa’e ane i ai Loleni, “E leai.” Na toe fa’apea le tala a Keneti, e le o se tulaga ea lea e tatau ona e faia, ona o oe o se loia.?”

Na tali Loleni, “E i ai lava taimi e fa’atalale ai loia pe a o’o i mataupu tau i o latou lava aiga, ma le isi itu, o Keisi e malosi ma e leai sa ma fanau. Atonu sa i ai o ma manatu e tele lava le taimi ma te talatalanoa ai i tulaga fa’apea.” Fai mai, ua amata ona maligi ifo loimata o Loleni i lea taimi, ae na toe fa’apea ane lava lana tala i a Keneti, “Ana mafai ona fesuia’i o ma nofoaga ma lo’u to’alua, ou te faia, ou te alofa i lo’u to’alua ma e fa’amaoni lava lo’u alofa mai lava i le amataga se ia o’o mai i le taimi nei, e le mafai ona toe fa’aluaina lo’u loto mo se isi lava, ua na o Keisi lava, uma le lalolagi.”

Fai mai le tala a le isi lo’omatua o si o matou aiga, “E ta’i amui’a Keisi ia, e matua’i alofa fa’amaoni i ai lona to’alua o Loleni, always fa’alau soso’o, never fa’amotumotu, ia ka’ilo la’ia, kiga fakafaka.” Ae sau le tali a le toeaina o si o matou nu’u, “Susi, i come from ikona, sexy oe Nukualofa, i kill you.” Sina pa fo’i se i vavae ai foe mo lenei taimi.

Fai mai o le taimi lea, ua tata vale le fatu o Keisi, a’o ta’oto pea i luga o lona moega i totonu o le falema’i, na fa’apea mafaufaufaga o Keisi, “Talofa e, i si o’u to’alua, ioe Loleni, ou te alofa fa’amaoni i a te oe, ma e sili atu na i lo le mea o lo’o e iloa.” O mafaufauga ia o Keisi, na fai i lea taimi, ae paga lea, ua le mafai ona tautala atu i a Loleni e fa’ailoa ai lona alofa, ua le mafai fo’i ona faia se gaoioiga ina ia ta’u atu ai i lona to’alua o Loleni, e moni ma fa’amaoni lona alofa, ae ua nofonofo pea na o ia i lona nofoaga pogisa.

E faia pea…