Vaega 18

Fa’atalofa atu ma fa’afeiloa’i atu i le atunu’u i lenei aso fou, e i ai pea le fa’amoemoe, o lo’o aoina le masina i lou soifua i lenei aso. E ao ai ona o tatou fa’apea ifo, “Le Ali’i, ia avea pea la taulaga tutasi na e molia mo i matou, ia fai ma o matou malosi’aga i taimi ua vaivai ai ai o matou loto, i taimi ua leai so matou fa’amoemoe, ma taimi o mafatiaga, ae ia matou fa’afo’i atu lava le vi’iga ma le fa’afetai i Lau Afio i aso uma o lo matou ola, amene.

Fa’aauau pea lau faitau i la tatou tala, ae ia manuia lou alo atu i faiva ma tiute o lenei aso. Na muta mai la tatou tala, ina ua o’o ane Keli e aso lana uo mamae o Keisi, a’o lea o lo’o i ai le to’alua o Keisi, le tamaloa o Loleni. Ua fai nei fetufa’aiga a Keli ma Loleni, ae lilo i o la manatu o lo’o lagona uma lava e Keisi a la tala o lo’o fai.

Na tali Loleni, “ioe, Keli, ae o lo’o aulelei lava Keisi, ua sili atu le lalelei o Keisi nai lo se isi lava tama’ita’i i le lalolagi atoa.” A’o fai le tala lea a Loleni, ua pei o se ata i le fa’ata  i le mafaufau o Keisi, e fa’apea, ua maligi ifo nei loimata o lona to’alua, ina ua ia faia le tala lea.

“Loleni, ua ou le iloa le mea na tupu, sa le i ai so’u manatu o le a i’u fa’apea Keisi, o lo’u to’alua o Mika sa i le falema’i mo le lua masina, ona oti ai lea ina ua maua i le kanesa, lukimia, ua leai se mea e mafai ona fai i e se tasi, ae na o le va’ai atu, ua mou malie ese atu.” Na fa’alogo mai nei Keisi, o fa’apea le tala a lona to’alua o Loleni, “Keli, e le oti Keisi, ma e le mafai ona ou ave’ese le manava o lo’o ola ai nei Keisi, e le mafai, ou te alofa i si o’u to’alua i aso uma o lo’u olaga, e le mafai ona ou tu’ua Keisi fa’apea, o le a ou faia mea uma lava e gata ai lo’u malosi ae maise o le au mai o foma’i e togafitia Keisi, e le mafai ona ou tu’ua fa’apea Keisi.”

Fai mai na toe tuli tatao mai lava e Keli le tala lea a Loleni e uiga i le masini o lo’o fa’amanava ai nei Keisi, “Loleni, o ai na fai mai e ave’ese le masini, o ai na faia lea tonu.” Na tali Loleni, “Ua malilie fa’atasi ali’i foma’i, e le o le taimi lenei e ave ‘ese ai, ma e le o le taimi fo’i lenei e mafaufau ai se tagata e ave’ese le masini.”

Na toe tali ane Keli, “Ioe e sa’o, a’o ai na fai le tala e ave’ese le masini, e tatau ona faia le na tulaga Loleni, o lea lava e malosi Keisi.” Ua le tautala Loleni, ae na toe fa’apea ane i a Keli, “E te iloa na sau ia Lulu.”

Na fa’ate’ia Keisi, i le tala lea, ma na ia iloa ai, e sa’o lava na alu ane si ona uso e asi ane ia. Na fa’amatala nei e Loleni i a Keli le alu ane o Lulu, le uso o Keisi i le falema’i. E fa’apea la le fa’amatalaga a Loleni, “E te iloa Keli e le i o’o mai lava Lulu e asi mai Keisi talu mai le fa’alavelave. O lana tala na fai, e le mafai ona ia pupula atu i lona uso o taoto mai fa’apea, ae na vili mai i le telefoni ana po, e fia iloa pe o le a le tulaga ua o’o i ai Keisi, ma fai mai i a te a’u, pe o le a le umi ou te mana’o ai e tu’u Keisi fa’apea, ua le toe mafai ona toe fai i ai se togafiti.”

E faia pea…