Ads by Google Ads by Google

OLAGA POLOGA

[E toe fa’atalofa atu i paaga masani a le tatou polokalame i lenei fo’i vaiaso, malo le soifua laulelei, malo fo’i le onosa’i, ae o le toe sosooina lenei o le tatou fagogo, lea na gata mai i le vaiaso na te’a nei i le taimi lea na taunu’u ai le tamaititi o Lami i le latou fale, ona ia tu’u lea o le fa’atau i lona tina ma fai i ai, o le fa’atau lea e fai ai se latou meaai o le afiafi.]

 

“ ..... ma le tupe lea e fesoasoani i ni mea e mana’omia o le vaiaso .....”, na ona uma atu lava o upu ia a le tamaititi o Lami, nofo ifo loa i tafatafa o lona Tina ma tagi loa, ae o le fafine o Sei i le taimi lea, ua na o le fetilofa’i ma lona tuagane ma le latou aiga i luga o le laulau ‘ai lea o loo latou fa’afesaga’i ai e aunoa ma se isi e toe gagana, ae o le tamaloa o Tomasi i le taimi, ua na o le fa’atau pupula i le saofa’i mai o le tamaititi o Lami i tafatafa o lona Tina, ma ua lagona fo’i le momomo o lona loto i le alofa, ina ua ia vaai atu i lenei tamaititi laititi ma lona naunau e saili se tupe e tausi ai lona tina.

 

“Lami! Lami!, sole Lami,” o le valaau lea a Tomasi i le tamaititi o Lami, ae ua atili ai ona punou le tamaititi i lalo ma tagi, ona aapa atu loa lea o si ona Tina ua opo mai si ana tama ma fai atu i ai, “Sole Lami, o fea ete sau ai nei mea, o fea na aumai ai le tupe lea ma le fa’atau lea na e sau ma oe ...” o le fesili lea a Sei i si ana tama, ona ea lea o le tamaititi i lona, e le pupula sa’o i le aiga ae pupula aga’i i vae o le nofoa ma fa’amatala loa le tala atoa o lana taega atigifagu na alu i le vaveao, ona o lona manatu ua tatau ona saili se galuega e tausi ai lona tina, ma fesoasoani ai ia Tomasi i le tausiga o le aiga. “ ..vaai oe si o’u Kiga, e le mama ia ke a’u la’u folafolaga sa fai i lo’u Kama i le aso ga ka o ese mai ai, faikalia a’u kausi oe, o le mafua’aga lega ua ou magaku ai, ua kolu masiga kalu oga ka kaugu’u mai iigei ao legei lava e le’i kigo la’u folafolaga sa fai i lo’u Kama ..” o le talanoa atu lea a le tamaititi o Lami i le latou aiga, ae ua na o le fa’alologo o le aiga e aunoa ma se isi na toe pisa i lea taimi, ae o le tamaloa o Tomasi, na maligi lemu ona loimata i lona alofa i le tamaititi o le Lami ma lana fa’amatalaga lea ua aumai, ona fa’apea atu lea o le tamaloa i le tamaititi, “E a mai la lau galuega i lenei aso, sa i ai se fa’aletonu i lau taega atigifagu, ae sa i ai fo’i se isi na fesoasoani ia te ia,” ae na tali Lami ma fa’apea, “ .. e i ai le toeaina Leoleopo sa fesoasoani ia te a’u, o ia lena sa ia fesoasoani i le fa’atauina o a’u atigifagu i le faleoloa, ma maua mai ai le tupe lea na ou sau ma a’u, o se toeaina e loto fesoasoani ma agalelei ..” o le fa’amatalaga lea a Lami i lona aiga, ona talanoa fiafia ai lava lea o le tamaititi ma lo latou aiga i lea afiafi. E le i fa’ailoa e Sei i lana tama le momomo o lona loto i le alofa i le taimi na latou talanoa to’atele ai, ae ina ua na o laua lo la faleo’o i lena afiafi, na fa’atoa fa’asoa ai loa e le fafine lona agaga fa’afetai ia Lami e tusa ai o le galuega lelei sa ia faia mo le aiga.