[E toe fa’atalofa atu i paaga masani a le tatou polokalame i lenei fo’i vaiaso, malo le soifua laulelei, malo fo’i le onosa’i, ae o le toe sosooina lenei o le tatou fagogo, lea na gata mai i le vaiaso na te’a nei i le taimi lea na vili ai le foma’i a Feo ia Lami e fa’ailoa i ai tulaga fa’aletonu ua i ai le malosi o le toeaina.]

O le te’i tele o Lami i le tala a le tagata lea na fai atu i luga o le telefoni, na mafua ai ona toe fesili le tamaititi ma fa’apea atu i le tagata lea, “E a lau saunoaga fa’amolemole, o a mai Feo,” na toe tali mai le tagata, “Lami, o le foma’i lea a Feo, ua i ai se tulaga fa’aletonu i le soifua maloloina o si ona tama, o lo o ia mana’omia lava oe i le taimi lenei, fa’avave mai.” Na vaaia e Tema ma lona to’alua fa’apea ai fo’i Sei suiga i foliga o Lami ina ua uma ona ia talanoa i le telefoni, o le mafua’aga lea na fesili atu ai loa Sei isi ana tama pe i ai se mea ua tupu, ae o ai fo’i na vili atu i lana telefoni, ae na tali Lami, “O le foma’i lea na valaau mai ia te a’u, fai mai ou te fa’avave atu ua tulaga fa’aletonu le ma’i o si o’u Tama.” E fai lava tala a Lami ma fai atu ia Tema, “Fa’amolemole lava lau susuga Tema pe mafai ona ta o atu se’i momoli atu a’u i le falema’i, ou te fia vaai lava isi o’u Tama ae le’i tula’i mai ai se fa’aletonu i lona soifua”. E fai lava tala a Lami ma savali aga’i atu i le vaega tonu o lo o paka mai ai le ta’avale fou a le ulugali’i faipisinisi sa latou o atu, ma latou malaga fa’anatinati atu ai loa i le falema’i, a o alu le ta’avale, na pau lava le manatu o loo i le loto o Lami, ua tuai ona vaai atu i si ana uo, poo si ona Tama matua fo’i o Feo.

Na iloa mamao atu lava e Lami ma lona aiga le pisi mai o foma’i i le potu lea o lo o taofia ai le toeaina, ma ua atili ai ona oso a’e lagona o le tamaititi, ailoga e mafai ona la toe talanoa ma si ona Tama. “Foma’i, o lea ua matou o mai”, o le valaau atu lea a Lami i le ali’i foma’i tino lapo’a lea sa gafa ma le tausiaina o si ona tama, ma fa’asino ai loa e le foma’i Lami ma lona aiga e aga’i atu loa i totonu o le potu o lo o i ai Feo. Na iloa mamao atu e Lami foliga tigaina o si ona Tama a o taoto mai i luga o lona moega, ua le toe i ai fo’i ni ona foliga fiafia sa masani ona vaaia i soo se taimi na te ulufale ai e asi o ia. Na ona savali atu lava o Lami uu ma le lima o Feo ma fai atu i ai, “Feo, o a’u lea ua ou sau, o a mai oe si o’u Tama”. E fai saputu atu lava le mau fesili a Lami ma tago atu ua eu eu le ulu o si ona tama, ma taumafai e fafagu i luga, e lei umi, ae vaaia loa e Lami ma lona tina faapea le ulugali’i faipisinisi na latou o atu le minoi o le toeaina ua ala, ona ia taumafai loa lea e nofo mai i luga, peita’i sa toe fa’ataoto e Lami ma fai atu i ai, “Feo, aua ete popole, taoto pea oe ma talanoa mai, ona o lea ua ou vaai atu ua e tigaina.” Na ona tepa a’e lava o le toeaina i luga, tau atu ma lana vaai i le tamaititi o Lami o lo o tu atu i ona luma, tagi loa ma le toeaina o Feo, ma ua faigata ai ona gagana mai o ia i se upu.