E silia ma le 1,000 galuega fou na faamaonia e le pule o le kamupani o le Samoa Tuna Processors (STP) i luma o le komiti o le Paketi a le Senate i le taeao ananafi, ua fuafua le kamupani e ofoina atu i le teritori mo le tausaga tupe fou 2013, peitai o nei avanoa faigaluega e fuafua lava i le taimi e mae’a ai galuega mo le toe faaleleia o le nofoaga o lo o faaaoga e le kamupani, aemaise ai o le tula’i mai o ni manaoga mo le manaomia o ana oloa mai maketi i fafo.

O le tali lea a le alii pule o le STP, susuga Alfonzo P. Galea’i, o se lala o le kamupani a le Tri Marine, lea ua latou nofoia le nofoaga tuai sa i ai le kamupani i’a ua tapunia nei o le COS Samoa Packing, ina ua fesiligia e le taitaifono o le komiti o le Paketi a le Senate i le taeao ananafi, le afioga Lemanu Peleti Mauga.

O le autu o le iloiloga e pei ona valaauina ai e le komiti o le paketi a le senate, o le fia maua o se faamatalaga mai le kamupani, pe faapefea ona maua e le malo mai le latou kamupani faasiliga o ana tupe maua, mai lafoga a tagata faigaluega mo le tausaga tupe fou 2013.

O le taitaifono o le komiti o le paketi a le senate ia Lemanu Peleti Mauga, o ia lea na faatautaia le iloiloga.

Na fa’aalia e Galea’i, “ E toa 45, i latou o lo o galulue i le faamamaina o le aano o le i’a lea o lo o matou la’uina atu i maketi i fafo e faatauina ai.”

O le tautua lea a le kamupani na amata mai i le tausaga na tea nei, ma e lata i le 20 uta e mafai ona la’u e le kamupani i le masina i maketi i Iapani ma Kalefonia.

Na ta’ua foi e Galea’i, “O lo o fuafua e tatau ona maea le galuega i le ogatotonu o le tausaga tupe fou 2013, o le taimi foi lena o le a amata tatala ai loa avanoa faigaluega mo tagata.”

Ina ua fesiligia o ia pe fia ni galuega o loo fuafua e tatalaina atu i le atunuu, na tali le molimau, “o loo vaavaai i le va o le 1,200 ma le 1,500 galuega fou ua fuafua le kamupani e ofo atu mo le atunuu, peitai e fuafua lava le aofai i le manaoga e tulai mai.”

Na faailoa e Alo i le molimau, na te le tau faailoaina atu tulaga faaletonu ma le pagatia o loo feagai ma le malo i le taimi nei, ae foliga mai i le paketi a le malo mo le tausaga tupe fou, o lana kamupani le isi kamupani lea o loo faamoemoe i ai alagatupe maua, ae na tali le molimau, e le iloa e ia pe na faapefea ona maua e le malo le aofai o le tupe e maua mai i lafoga totogi a tagata faigaluega ia ua fuafua le kamupani e faa faigaluega, peitai o loo faia pea fesootaiga a le pulega o le kamupani ma taitai o le malo, mo le faailoaina atu i ai o fuafuaga alualu i luma a le kamupani mo le lumanai.

O le aano o le i’a ia o loo faatau atu e le STP i maketi i fafo, o loo maua mai i vaa fagota alia faapea ai ma vaa fagota lapopo’a i le atunuu.

O nisi o finagalo mai sui o le komiti, o le faailoa lea i le molimau o le autu e tasi na mafua ai ona ulufale mai le kamupani lenei i le atunuu, ina ia maua ai galuega a tagata ma fesoasoani ai i le tamaoaiga o le malo faapea ai aiga, ma e ui e lei iloga lava ona tino mai lea moemitiga, ae o se tala fiafia mo nisi o sui o le komiti, o lea ua agai atu ggaluega a le kamupani i le tulaga maea.

Na taua e Galea’i i le komiti, o loo i ai le faanaunauga a le komiti ia maea ane le tausaga fou 2013, ua oo atu i le toa 1,200 tagata faigaluega ua mafai ona faa faigaluegaina, peitai i le tulaga o tupe maua mo le malo mai galuega fou ua fuafua le kamupani e ofoina atu, e foliga mai faatoa manino mai lava tulaga ia i le kuata tou o le tausaga fou