Ua i luma nei o le Faamasinoga i Brisbane, Ausetalia le mataupu na tulai mai ai le gugulu ma le le malilie o nisi o tagata Samoa o lo o alala i lea atunuu, ona o le faatautaiga o le tauvaga mo le sailia o se Tausala Samoa Ausetalia. E pei ona lipotia mai i upega tafailagi ma nisi o le au tusitala i Samoa nei, o le po o le aso 10 o Iulai ina ua maea lea tauvaga, na faalauiloa aloaia ai le manumalo o le tamaitai o Afiogatuutasioaiga Jessica Taulaga i le pale o le Tausala Samoa Ausetalia, ma sa faapaleina ai lava o ia i lena po.

Peitai, o le tolu o aso talu ona maea lea tauvaga, sa toe logoina lea tamaitai e le komiti o le tauvaga e faapea, sa i ai se sese i le tuufaatasiga ma le faaopopoina o maka po o togi o le tauvaga, ma ua faaleaogaina ai lona manumalo, ae toe tuuina atu le pale i le tamaitai sa tulaga lua, o Tusipepa Sandra Lilomaiava. I se talanoaga a Tala Fou ma le tina o le tamaitai o Afiogatuutasioaiga Jessica Taulaga i le telefoni, na ia taua ai e faapea, ua tuuina atu nei lea mataupu i le Faamasinoga ma ua maea foi ona tuuina mai se tusi i le Faatonu ma le Komiti Faafoe o le tauvaga o le Miss Samoa o lo o faamatala mai ai lea mataupu.

Na faaalia e le tina, ua uma foi ona faamautu le avanoa a lona alo e tauva ai i Samoa nei ae lei faailoaina mai po o ai le kamupani e lagolagoina o ia. E lei manuia taumafaiga a Tala Fou e fesootai atu i sui o le komiti faafoe o le tauvaga o le Miss Samoa Ausetalia i se latou faamatalaga e uiga I lenei mataupu.