O se tasi o itu na malosi i ai fesili a le ali’i loia o lo o fautuaina James Barlow i lana fa’amasinoga iloilo o lo o fa’agasolo i le taimi nei, o le tulaga i le agava’a o leoleo sa latou faia le suega e fa’amaonia ai pe sa tagofia e Barlow le ‘ava malosi i le po o le aso 24 Oketopa 2011 lea na taofia ai o ia ma tu’uaia i le ‘ave ta’avale ‘ona.

Na taua e le ali’i leoleo ia D. Parker i lana molimau ananafi e fa’apea, o ia na fesiligia Barlow i le po lea na latou taofia ai ma isi leoleo e to’atolu le ta’avale na latou malaga atu ai ma isi ali’i e to’afa i luma o le faleoloa i Fogagogo, ma ia fa’alogoina ai le manogi pia sa sau mai le manava a le ua molia, o le mumu o ona mata, atoa ai ma le tau le manino o lana tautala.

Na taua e Parker i lana molimau e fa’apea, e tusa ai o agava’a sa a’oa’oina ai o ia i auala e sailia ai se tagata po o ia fa’afoeina se ta’avale ao fa’asua’ava, sa ia mautinoa ai i le po lea, sa tagofia e Barlow le ava malosi.

Sa ia fesili fo’i ia Barlow pe sa inu ni ana pia, ae na tali le ua molia, “ioe”.

E tusa ai o le molimau a Parker, o le leoleo ia Time Loia na fa’atinoina suega e tolu e sailia ai pe sa tagofia e le ua molia le ‘ava malosi, ma ina ua mae’a suega ia e tolu, na faia ai loa le fa’aiuga e taofia fa’apagota Barlow i le po lea.

Na fesili le loia a Barlow ia Parker pe sa ia fesili ia Barlow po o le a le taimi na amata inu ai, na tali le ali’i leoleo “e leai”.

Na toe fesili le loia a Barlow ia Parker pe sa ia fesiligia le ua molia po o le a le ituaiga ava malosi sa ia inu ai, na tali le ali’i leoleo, “na pau lava le tali a Barlow o le pia lana mea sa inu”.

MOLIMAU A ALI’I E TO’ATOLU NA A’AFIA

O le taeao ananafi na molimau ai isi ali’i e to’alua o lo o tu’uaia na faia i ai e Barlow uiga mataga.

O le isi ali’i sa 14 ona tausaga i le 2011 na tula’i mai ai le fa’alavelave, a o lea ua 17 ona tausaga i le taimi nei, ae o le isi ali’i ua 20 ona tausaga i le taimi nei ae sa 17 i le taimi na tula’i mai ai le fa’alavelave.

Na taua e le ali’i lea sa 14 ona tausaga i le 2011 i lana molimau e fa’apea, e ui o le fa’alavelave lenei na tula’i mai i le masina o Oketopa 2011, ae na fa’atoa ia ta’uina i leoleo i le aso 3 Mati 2012.

Na fesili le loia a Barlow i le molimau pe aisea na musu ai e ta’u i leoleo gaioiga mataga o lo o tu’uaia sa faia e Barlow ia te ia i le po na taofia ai o ia e leoleo, na tali le molimau, “sa lagona lo’u ma”, na toe fesili le loia i le molimau pe lona uiga sa ma i leoleo i le taimi lea ae le’i lagona sona ma i le taimi na matamata ai isi ali’i e to’alua ao la feusua’i ma Barlow i totonu o le potu, na tali le molimau, “ioe”.

Ae ina ua fesiligia e le loia a le itu tete’e le molimau a le ali’i lea ua 20 ona tausaga i le taimi nei, po o a ni mea na tutupu i totonu o le fale o Barlow i le po na tula’i mai ai le fa’alavelave, na taua e le molimau e fa’apea, ina ua ia ulufale atu i totonu o le fale i le po o le aso 24 Oketopa pe tusa o le itula e 8:00 i le afiafi, sa ia vaaia ai Barlow ma le isi ali’i e 14 tausaga o lo o inu la pia ma matamata i ata leaga o lo o ki i le T.V.

O lo o fa’agasolo pea lava i le taimi nei taualumaga o lenei mataupu i luma o le fa’amasino sili ia Michael Kruse.