E silia i le toa 50 i latou na mafai ona taofia e leoleo i le toese i Tafuna i totonu o le tolu vaiaso lea na faataunuuina ai sa latou tautua faapitoa, i le faamasia lea o tulafono i luga o le alatele i le polokalame e taua o le ‘Drive Sober or Get Pulled Over’, lea na faai’uina i le aso ananafi.

Mai le silia i le toa 50 na mafai ona taofia e leoleo i le toese, e toa 30 na taofia ma tuuaia i le ave taavale ‘ona, ma le silia i le toa 20 na taofia ona o isi solitulafono i luga o le alatele e pei o le le umia o se laisene ave taavale.

O loo aofia ai i le aofaiga lea alii e toalua na maua o la faafoeina ni taavale ao se’i e le faamasinoga a laua laisene ave taavale, ma ua molia nei i laua i le moliaga mamafa o le ave taavale a’o se’i le laisene, afai ae faamaonia, e ono faasalaina i laua i le toese mo le umi e le sili atu i le 5 tausaga, pe faasala i le salatupe e le sili atui le $5,000, lea e aofia ai le faamalosia ona tuli o aso e 90 i le toese i Tafuna.

O le tautua lenei a le Matagaluega o le Puipuiga o le Saogalemu Lautele, na amata mai i le aso 19 Aokuso ae faamuta i le aso 5 Setema 2012.

O le taitai o le vaega o le Traffic Division a le Ofisa o leoleo ia Captain Taaloloioufaiva John Cendrowski na faauluulu i ai lenei tautua, i le lagolagosua a le tamaitai Lutena ia Lt. Malia Leiato.

E silia i le 3,000 pepa sala sa mafai ona tuuina atu e leoleo i ave taavale na maua o latou soliina ma le usitaia tulafono i luga o le alatele, e pei o le le tu i faailoilo, ave taavale saoasaoa, faaopoopo o moli i luma o taavale, faapea ai ma isi lava ituaiga solitulafono i luga o le alatele e pei o le ave taavale ae le o i ai se laisene.

Na taua e le susuga Taaloloioufaiva e faapea, o se tasi o tulaga sa latou maitauina i le latou tautua faapitoa sa faia, e toatele naua fanau talavou na maua o latou faafoeina taavale, ae le o i ai se faatanaga e mafai ai ona o latou aveina se taavale, ma o nisi o faailoilo na mafai ai ona maua i latou, e le gata o le ave taavale saoasaoa, ae le tu tu foi i faailoilo o le auala.

Saunoa Taaloloioufaiva, e taua tele le tatau i matua o fanau nei ona avatu a latou fanau e auai i aoaoga mo le sailia o a latou laisene ave taavale, ina ia mafai ai ona o latou malamalama i tulafono i luga o le alatele.

I totonu o le tolu vaiaso na faatautaia ai le tautua faapitoa lenei a le matagaluega o leoleo, sa maitauina ai le toatele o leoleo e taamilo solo i faleoloa i tua faapea ai pa pia ma fale kalapu, mo le mataituina lea o pisinisi o loo latou faatauina atu sikaleti ma le ava malosi i fanau e laiti i lalo o le tulafono.

O nisi o i latou nei sa laei savili i le taimi o le po ao faatinoina ai la latou tautua, lea foi sa vaaia i nofoaga eseese i le atunuu e aofia ai faleoloa i le talafatai o le taulaga i Fagatogo, ma faasolo atu ai i afioaga e aofia ai Pago Pago, Aua faapea ai Utulei ma vaega eseese o le atunuu.

O se tasi o alii ave pasi na talanoa mai i le Samoa News, sa ia taua ai sana faasea ina ua tuuina atu e se alii leoleo se pepa sala ia te ia, i lona le tu lea i se tasi o ‘stop sign’ i luga o le auala.

Na taua e le alii ave pasi lea, ina ua taunuu atu i luma o le ‘stop sign’, sa ia vaaia o loo kilia le auala, e leai ma se taavale o sau mai le isi itu faapea ai ma le isi itu o le auala, o le mafuaaga lea na oso ai loa lana pasi i luga o le auala e ui e lei matua tu lelei i le ‘stop sign’, peitai na taua e Taaloloioufaiva e faapea, “a ta’u le stop sign’ o lona uiga e tatau ona matua tu lelei le taavale, ae le faapea o le alualu lemu i luma o le ‘stop sign.”.

Sa ia faafetaia nisi o ave taavale sa latou amanaiaina sa latou fautuaga sa tuuina atu i ai, ma amata ai loa ona latou faia le gaioiga o le tausisi i soo se tulafono e aofia ai ma faailoilo i luga o le alatele.

E ese mai i le faalavelave lea na maliu mai ai se tama matua i Nuuuli ina ua so’a e se pasi, e leai se isi faalavelave tau taavale matuia na tulai mai i le atunuu i le taimi o le tautua faapitoa a le matagaluega o leoleo.