O le vaiaso na te’a nei na pasia ai e le Fono Faitulafono le tulafono na fa’aulufale e le faigamalo a le ali’i kovana ia Lolo Matalasi Moliga, e talosagaina le fa’amatu’u mai o pone a le Pulega o le Atina’e o le Tamaoaiga o Amerika Samoa, ina ua pasia e afioga i senatoa i le palota e 13-0 le pili a le maota o sui.

O lea fa’aiuga a le maota maualuga e pasia lenei tulafono, na faia lea ina ua mae’a le iloiloga lona lua sa valaauina e le Komiti o le Sailiga o le Tamaoaiga o le malo a le Senate, lea na toe fesiligia ai le Komiti Fa’afoe o le Atina’e o le Tamaoaiga o Amerika Samoa (ASEDA), mo le toe fa’amaninoina o ni isi o vaega o le tulafono sa le malamalama i ai afioga i senatoa.

O se finagalo e toe fa’avae le komiti fa’afoe o le atina’e, o se faaiuga na faia e le faigamalo ua tula’i mai nei i le 2013, ina ua vaaia le tele o manaoga tau tupe ua tula’i mai i totonu o le atunu’u, mo le fia fa’atinoina o ni isi o atina’e.

O se tasi o moemitiga ua i ai i le alii kovana ma le komiti faafoe o le atina’e, o se avanoa lelei lenei e toe faatulaga lelei ai ma totogi aitalafu a le malo o lo o i ai nei, e pei o le aitalafu i le tupe a le Litaea a tagata faigaluega a le malo, atoa ai ma le aitalafu i le matagaluega o le Initeria a le malo tele.

O isi aitalafu a le malo o lo o i ai ua faamoemoe e tatau ona totogi i tupe o le pone pe a maua mai, o faaiuga a le fa’amasinoga fa’asaga i le malo, e aofia ai ma le mataupu i le mu o le Laufou.

O tupe o le pone e pei ona fa’amalamalama e se sui o le komiti o atina’e i luma o le senate ia Iulogologo J. Pereira, o le tu’uina atu lea e le komiti o vaega tupe e inivesi i totonu o maketi o fefa’atauaiga, lea o lo o inivesi ai tupe a le to’atele o tagata milionea i le lalolagi, ina ia mafai ai ona maua mai tupe tului e fesoasoani i le atina’e o le malo.

A o le i pasia e le fono lenei tulafono i le vaiaso na te’a nei, sa talosagaina e le peresetene o le Senate ia Gaoteote Palaie Tofau sui o le komiti fa’afoe, ina ia toe vaavaai i galuega lea ua fa’amoemoe e ave i ai la latou fa’amuamua i tupe e maua mai i le pone, ina ia faamuamua le fausia o se maota fono fou.

Saunoa Gaoteote e fa’apea, e le taitai fa’atusatusaina le maota fono a Amerika Samoa ma maota fono a Palemene a ni isi o atumotu o le pasefika e aofia ai ma Samoa, i le manaia ma le matagofie.

E o o lava fo’i i le tafatolu o le faigamalo a Amerika Samoa, e sili atu ona matagofie le maota o le malo i Utulei, le EOB aemaise ai o le Fale Fa’amasino ua i ai nei, nai lo le fale o lo o fa’aaogaina e le fono.

O lenei tulafono o le a taualoa vave i le taimi lava e pasia ai e le Fono Faitulafono ma sainia e le ali’i kovana.