E le i mafai e faipule e to’alua na palota ‘leai’ i le pili a le faigamalo e fa’amatu’u mai ai pone mo le fa’atupeina o atina’e o le tamaoaiga a le malo, ona taofia ai le maota o sui mai lo latou pasiaina o lenei tulafono taua i le taeao ananafi, i le palota e 16-2.

O faipule e to’alua na palota leai e aofia ai le afioga ia Larry Sanitoa ma le afioga a Taotasi Archie Soliai, o ni isi ia o faipule sa finau i le aso na faia ai le iloiloga a le maota o sui, i ni isi o tulaga fa’aletonu o lo o atagia mai i totonu o le tulafono, e pei o le aveesea lea o le malosi mai le Fono Faitulafono latou te iloiloina ai tulaga o tupe e fa’amatu’u atu mo pone.

O le faaiuga a le maota o sui e pasia ai lenei tulafono taufaaofi, na faia lea ina ua mae’a sa latou iloiloga sa faia i le aso Gafua na te’a nei, lea na fesiligia ai le loia a le Fono Faitulafono ia Nat Savali faapea ai ma se totino o le Komiti o le Atina’e, o le isi lea sui o le Fono Faitulafono, le afioga i le Sui Fofoga Fetalai ia Fa’afetai Talia I’aulualo.

Na taua e Vui Florence Saulo i le taimi o le iloiloga e fa’apea, o se tasi o mataupu o lo o atugalu i ai lona mafaufau ina ua ia faitau i le tulafono lenei, o le aveesea lea o le malosi mai le Fono Faitulafono latou te iloilo ma auiliili ai tupe mo pone.

O le atugalu lava fo’i lea e tasi na fa’aalia e afioga i senatoa i le taimi o le latou iloiloga, ma faia ai loa le fa’aiuga i le aso Gafua na te’a nei, e toe taoto atu le latou pili i le komiti mo le faia i ai o ni isi o suiga.

Na fa’amanino e le susuga i le loia fautua a le Fono ia Savali e fa’apea, e ui o lo o taua i se vaega o le tulafono le mataupu e pei ona atugalu i ai le tamaitai faipule, peita’i i lalo o le tulafono, o le fono lava e i ai le malosi latou te fa’amaonia ai soo se tupe ao lei fa’aaogaina e le malo.

“E le mafai ona aveesea le malosi o le Fono latou te faamaonia ma faasoasoa mai ai tupe e fia faaaoga e le faigamalo, e pei ona manino i lalo o le Fa’avae”, o le saunoaga lea a Talia e lagolago ai i le saunoaga a le ali’i loia.

“So o se tupe lava o pone e fia fa’aaoga, e muamu lava ona ui mai i le Fono e fa’amaonia atu ai le fa’aaogaina, ona fa’atoa mafai lea ona fa’aaoga e le Komiti o Atina’e mo le fa’aleleia o le tamaoaiga o le atunu’u”, o le saunoaga lea a Talia.

Ae na toe saunoa Vui e fa’apea, “pau le popolega o lo o i ai, ina nei afaina tulaga o atina’e ma galuega ua fuafua e faatino i tupe o pone ona a’afia atu ai lea o tupe a tagata ao lafoga a le atunuu, o tupe foi na o lo o faamoemoe i ai le faigamalo.

O le afioga i le alii faipule ia Sanitoa, Vailoata Eteuati Amituana’i ma Puleleiite Tufele Li’amatua isi faipule, na lagolagoina i le finagalo o Vui e faatatau i le mataupu e faatatau i le aveesea lea o le malosi o le fono e iloilo ai tupe o pone.

Saunoa Sanitoa e fa’apea, o tulaga o pone i setete e aofia ai Kalefonia, e tuu atu i tagata e palota i ai, ona o le manatu o tupe a tagata totogi lafoga o lo o alu ai, o le mafua’aga fo’i lena o lona popolega o lo o i ai i tulaga o pone nei, ina nei afaina i se taimi o i luma ona afaina atu ai lea ma tupe o lo o faamoemoe i ai le tamaoaiga o le atunuu, ae o le afu fo’i lea a nai tagata totogi lafoga.

I tulaga o galuega ma atina’e ua fuafua e fausia, na talosaga Sanitoa ina ia fa’amanino i luma o le maota nei atina’e, ina ia silafia e faipule ma le fono.

Na taua e Talia lona lagonaina o le taua o finagalo o sui faipule, i le tatau lea ona i ai se leo o le fono i soo se taimi e iloilo ai tupe mo pone, ma sa ia fa’ailoa i luma o le komiti e fa’apea, e ui o ia o se totino o le Komiti o le Atina’e ua tofia e le kovana, ae ao fo’i ona silafia e le komiti, o ia fo’i o se faipule, o se totino o le Fono Faitulafono, ma e le mafai fo’i ona ia faia se gaioiga e atagia mai ai le fa’atuatuana’i o le malosi ma le matafaioi tauave a le Fono o lo o fa’atulaga mai i lalo o le Fa’avae.

Mai totino e to’a 9 o le Komiti o le Atina’e, o le to’alua o i latou e filifilia mai i le Fono Faitulafono.

O le taeao ananafi na faitau muamua ai le pili a le maota o sui i luma o le senate, peita’i ua manatu le komiti o le Fa’agaioiga o le Faigamalo a le senate, ina ia toe aami le komiti faafoe o le Atina’e mo se isi a latou iloiloga i le taea nei, se’i fa’amanino atili ni isi o mataupu o lo o atugalu i ai afioga i senatoa.