E 15-0 i le palota na pasia ai e le Senate i le taeao ananafi tofiga a le afioga i le ali’i kovana mo le afioga ia Save Liuato A. Tuitele e avea ma Komesina o le Matagaluega o Leoleo.

O lea fa’aiuga a le maota maualuga, na faia ina ua mae’a se iloiloga pu’upu’u e fesiligia ai agava’a o le molimau e avea ai o ia ma Komesina o Leoleo, lea na fa’atautaia e le afioga i le ali’i Senatoa ia Faletagoa’i Tuiolemotu, o le ta’ita’i o le Komiti o le Puipuiga o le Saogalemu Lautele a le maota maualuga.

O le to’atele o afioga i senatoa na maua le avanoa e saunoa ai i le taimi o le iloiloga, sa latou taua le fa’amalieina o i latou i agava’a o le afioga Save e avea ai ma komesina o leoleo, sa latou fa’afetaia fo’i le ali’i kovana ina ua ia tofia lenei tamali’i o le atunu’u e tula’i mai i se tasi o Matagaluega taua a le malo.

O ni isi o fautuaga sa tu’uina atu e le komiti i le afioga a Save, e le gata ia fa’amoemoe mea uma i le Atua, a ia fai le galuega ma le toa ae aua le fefe e fai le mea moni ma le mea sa’o.

Saunoa le afioga i le ali’i senatoa ia Uti Petelo, ua ese suiga ua vaaia i le atunu’u i le taimi nei ina ua tutupu le tele o le mau fa’alavelave, o mea sa gata i ata tifaga a o lenei ua vaaia i lau fanua o Amerika Samoa.

“Ua amata ona le toe saogalemu le feoa’i a tagata o le atunu’u, ua lagona fo’i le fefe i isi taimi, e talosaga atu ai i lau afioga i le komesina tofia, afai ae pasia oe e le Fono Faitulafono, saili auala e puipuia ai le saogalemu o le atunu’u ma taofia ai le toe tutupu mai o fa’alavelave ua tutupu i le taimi nei”, o le saunoaga lea a Uti ia Save.

Na fautua le afioga i le ali’i senatoa ia Soliai Tuipine Fuimaono ia Save, ina ia a’oa’o leoleo talavou o lo o i ai i le matagaluega ia iloa ola fa’aaloalo i le va ma le atunu’u, aemaise lava i taimi latou te taofia ai ta’avale a le mamalu o le atunu’u i luga o le auala, ia latou iloa tautala ma le fa’aaloalo i tagata matutua.

Na toe fa’amanatu e Soliai ia Save sana saunoaga sa fai i le taimi o le fa’amaoniga o le Komesina na fa’atoa mavae atu a Leoleo ia William E. Haleck i le lua tausaga talu ai, lea sa ia saunoa ai e fa’apea, o se taimi muamua lenei ua tofia ai se taule’ale’a a fai ma Komesina, ae o se tasi lea o Matagaluega e pito sili ona taua ma aoga lana pito laau i le atunu’u.

“O le to’atele o tupulaga talavou o lo o i ai i le Matagaluega o Leoleo i le taimi nei, e le iloa saunoa fa’aaloalo i le atunu’u”, o le saunoaga lea a Soliai ia Save, ma ia toe fautuaina ai le komesina tofia ina ia fautua i leoleo talavou i le va feagai ma le atunu’u.

O se tasi o mataupu na saunoa i ai Soliai, o le tele o fana e le fa’ataga ona umia e le atunu’u ae o lo o vaaia le ta’atele i ni isi o tagata. Na talosagaina e Soliai ia Save ina ia galulue lona ofisa e saili se auala e ao mai ai laau malosi o lo o taape solo i le atunu’u, ona o le isi lea mafua’aga ua ala i ona tutupu fa’alavelave matuia, ua tofu fana le to’atele o tagata.

I le saunoaga a le afioga a Galea’i M. Tu’ufuli, sa ia fautuaina ai Save ina ia toe silasila i le Ofisa o le OTICIDE lea o lo o i lalo o le Matagaluega o le Puipuiga o le Saogalemu Lotoifale (HLS), e tatau ona toe tu’uina atu i lalo o le Ofisa o Leoleo, o iina tonu e tatau ona i ai le Ofisa lea.

O le taeao o le aso Faraile o le vaiaso nei lea ua fa’atulaga e iloilo ai e le maota o sui tofiga a le alii kovana mo le afioga a Save.