Ads by Google Ads by Google

Pasia Senatoa ma Faipule Paketi $454.8 miliona a le malo

Mai le $497 miliona na tuuina atu e le malo i le Fono Faitulafono e faatupe ai galuega mo le Tausaga Faaletupe 2013, i le vaiaso ua tuana’i.

O le Aso Tofi na pasia ai e Faipule la latou pili o le paketi i le faitauga faatolu ina ua fulisia uma faipule e lagolago a latou suiga, ae o le Aso Faraile na sosoo ai na faatoa pasia ai e le Senate la latou foi pili o le paketi, i le palota e 13-1.

E na o le afioga i le alii Senatoa ia Velega Savali Jr na palota leai ina ua faitau faatolu le pili o le paketi a le Senate. Na ia saunoa i le aso na iloilo ai e maota e lua suiga o le paketi, e le mafai ona pasia le paketi e faamoemoe i ai le taitaiga o le malo a Tutuila ma Manu’a mo le tausaga atoa, ae le o malamalama lelei i ai i suiga ua faia.

O ananafi na pasia ai e le Senate le pili a le maota o sui i le faitauga faalua ma le faamoemoe, o le taeao nei o le a faitau faatolu ai le tulafono taufaaofi.

O le suiga tele ua faia e le Fono i le paketi a le malo sa tuuina atu, o le faaitiitia lea o le paketi a le Faalapotopotoga o le Eletise ma le Suavai (ASPA) i le fa masina, atoa ai ma le aveesea o le $6.8 miliona sa valoia e le malo, o le a maua mai i le Maliliega o le Tapaa sa faia ma le Initeria (Tobacco Settlement).

Ua atagia mai i le faitiitia o le paketi a le ASPA, le finagalo o le Fono, o i latou o lo o i ai le malosi e faatulaga ai suiga i soo se paketi a le malo e aofia ai ma le ASPA, ae o le aveeseina o le $6.8 miliona, o loo faavae lea i ripoti na maua e le Fono mai iloiloga o le paketi, e le o i ai se tupe e $6.8 miliona o i totonu o teugatupe a le malo.

Na taua e le Faatonusili o le Ofisa o le Paketi o Malemo Tausaga i lana molimau, o se fasi pepa sa tuuina atu e le kovana ia te ia o lo o faamaonia atu ai, e maua e le malo o Amerika Samoa le $6.8 miliona mai le Initeria, ma o lea tupe ua i totonu o teugatupe a le malo, ae ina ua fesiligia le Teutupe a le malo ia Magalei Logovii e uiga i le tupe lea, na saunoa Magalei, “na te le iloaina se tupe, e leai foi se tupe o i totonu o teugatupe lautele a le malo.”

Ae i le molimau a le Loia Sili i luma o le Fono, sa ia faamaonia ai le maua e Amerika Samoa o le tupe lea mai le Initeria, peitai ua faamoemoe e totogi ai le nonogatupe a le malo o lo o i ai i le Initeria.

I le aveese ai la e le Fono o le $6.8 miliona mai totonu o le paketi a le malo, na faaulu ai loa i luma o maota e lua i le vaiaso na te’a nei se pili faaopoopo (supplemental) e faasoasoa mai ai e le Fono le faaaogaina o le tupe lenei, e faatupe ai gaioiga a nisi o ofisa ma matagaluega a le malo, e aofia ai ma le totogia o poloaiga a le faamasinoga faasaga i le malo.

O nei poloaiga e aofia ai le $150,000 e faatupe ai le faamasinoga i le va o le malo o Amerika Samoa ma Siaumau Siaumau Jr; maliliega i le va o le malo ma le kamupani tosovaa a le Marisco i Hawaii e $1 miliona; faapea ai ma le isi $1 miliona i le maliliega sa faia i le mataupu o le Laufou Shopping Center, lea

Na fesiligia e le afioga i le alii faipule ia Larry Sanitoa i le  Aso Faraile na te’a nei, pe faapefea ona faaulu e le maota o sui se pili e faasoasoa ai le $6.8 miliona, ae o lea ua faaali manino e le alii kovana i sana tusi i le Fofoga Fetalai, e le o i ai se vaega tupe faapea ($6.8 milona) i totonu o teugatupe a le malo.

Na saunoa Taotasi Archie Soliai, o le mafuaaga tonu lava lea na aveese ai e le Fono le tupe lea mai totonu o le paketi a le malo, ona e talitonu le fono e le o i ai se tupe faapea i teugatupe a le malo.

O le tusi o lo o faatatau i ai saunoaga a alii faipule, o le tusi lea na tuuina atu e Togiola Tulafono i taitai o le Fono i le aso Faraile na te’a nei, e faailoa atu ai lona teena o pili tupe e lua na pasia e le fono, e totogi ai poloaiga a le faamasinoga i le mataupu i le va o le malo ma Viiga Tuavale faapea ai le mataupu i le va o le malo ma le kamupani a le PIE.

Sa faamoemoe le fono e faatupe mai pili tupe ia i tupe totoe e lei faasoasoaina o le tausaga tupe lenei 2012, mai le Maliliega o le Tapa’a, peitai na taua e le kovana i lana tusi e faapea, e leai se teugatupe faapea o i ai i totonu o teugatupe a le malo.

E ui na fesiligia e alii faipule tulaga o le pili taufaaofi, ae na pasia lava e le maota i le faitauga faalua i le aso Faraile na te’a nei ma le faamoemoe, o le taeao nei e tatau ona faitau faatolu ai loa lenei tulafono.