Ads by Google Ads by Google

Penefiti tagata lautele pe a sui tulafono aitalafu laiti

Na fa’amaonia i luma o le komiti o le Paketi a le maota maualuga i le vaiaso nei e fa’apea, o le tulafono taufa’aofi lea sa talosagaina e le faigamalo, e si’i ai le maualuga o le aofa’i o aitalafu e mafai ona o o atu i le fa’amasinoga, o se fuafuaga lelei lea o le a fa’amanuiaina ai tagata nono tupe i faletupe i Amerika Samoa.

 

O le tulafono o lo o i ai nei, e $3,000 le maualuga o aitalafu tupe e mafai ona tu’uina atu i le fa’amasinoga, pe afai ua fa’atamala le tagata nono tupe e totogi lana aitalafu i se faletupe i totonu o le atunu’u, peita’i o le suiga e pei ona talosagaina e le malo, ia si’itia atu i luga i le $7,500.

 

Ina ua fesiligia e le afioga i le ali’i senatoa ia Galea’i M. Tu’ufuli le loia sili, i le mafua’aga e ala ai ona penefiti tagata nono tupe pe a sui le tulafono, na saunoa ai Talauega Eleasalo Ale e fa’apea, o le lelei o le tu’u i luga o le maualuga o talosaga e tu’u atu i le fa’amasinoga, e le tau mana’omia ai e le tagata nono tupe le tau totogi o sana loia pe afai e manatu le faletupe e ave le mataupu i luma o le fa’amasinoga.

 

Mo se fa’ata’ita’iga e pei ona saunoa Talauega i le auala e penefiti ai le tagata nono tupe, afai e manumalo le faletupe i le talosaga e tu’uina atu i le fa’amasinoga, e le gata ina fa’atonu e le fa’amasinoga le tagata nono tupe na te toe totogi le aofa’i o le tupe sa ia nono mai le faletupe, ae toe fa’aopoopo ai foi ma le totogi o le loia a le faletupe e tatau ona totogi e le tagata nono tupe.

 

O le suiga fo’i o le tulafono e pei ona saunoa le loia sili, e na o faletupe lava e agava’a ai, ae o isi kamupani nonotupe e le o aofia ai latou i lalo o suiga ia, ona o popolega ina ne’i fa’aaoga e ni isi pisinisi le tulafono e fa’apologa ai tagata nono tupe.

 

Ma sa tutusa lelei sunoaga a le loia sili ma molimau a sui o le faletupe o le ANZ, ina ua fesiligia e le maota o sui i le mataupu lenei.

 

Na taua e le pule o le faletupe a le ANZ Bank ia Terese Salumbides i luma o le komiti o le paketi a le maota o sui e fa’apea, o le suiga i le tulafono e penefiti uma ai le faletupe ma le tagata nono tupe.

 

I le itu e ala ai ona penefiti tagata nono tupe i le suiga o le tulafono e pei ona taua e Salumbies, ona o lea o le a siitia le maualuga o tupe nono ua le mafai ona totogi e mafai ona tu’u atu i le fa’amasinoga, mai le $3,000 i le $7,500.

 

Na taua e Salumbides e fa’apea, afai e totogi e le faletupe se loia na te tauaveina le mataupu i luma o le fa’amasinoga, e ono fa’aopoopo i le tagata nono tupe le $800 e o o atu i le $900 na te totogi, ma o lea tupe e fa’aopoopo i luga o le nonogatupe e tatau ona totogi e le tagata nono tupe, ma o se avega mamafa lea mo le tagata nono tupe.

 

Saunoa ni isi o faipule e fa’apea, o le taua o le suiga o le tulafono, o le a fesoasoani ai i tagata nono tupe i le atunu’u ina ia fa’amama tulaga o tupe e ono fa’aee atu e le faamasinoga latou te totogiina, pe afai e tu’uina atu e le faletupe sana tagi i le fa’amasinoga.

 

O le tulafono lenei na pasia fo’i e le maota o sui i le nofoaiga na se’i mavae atu nei, peita’i e le i faia i ai se fa’aiuga a le maota maualuga.

 

O le aso Faraile, Fepuari 13, na pasia ai e le maota o sui la latou pili i le faitauga fa’atolu, ma ua mae’a fo’i ona tu’uina atu la latou pili i luma o le maota maualuga, e fa’apena fo’i i le maota maualuga, ua mae’a fo’i ona pasia la latou pili i le vaiaso nei, ma ua mae’a fo’i ona taoto atu i le maota o sui mo sa latou fa’aiuga.