Ua i luma nei o le maota o sui se pili e fa’aopoopo ai le aofa’i o tupe e totogi atu i tagata litaea a le malo, ina ia fesoasoani ai i le tulaga ua i ai le tau o le soifuaga i le taimi nei, ma fa’afetaia ai e le malo la latou tautua mo tausaga e tele.

O le tulafono lenei pe afai ae pasia, o le a maua ai se fa’aopoopoga o tupe mo tagata litaea, e fesoasoani ai i le tausiga o latou aiga e ala i le tu’uina atu o ni isi si’itaga fa’alemasina i a latou siaki o lo o maua i le taimi nei.

O le tino o le tulafono e pei ona fa’amoemoe e toe suia ai, o lo o taua ai le maua e tagata litaea o le 4% o le fua fa’atatau o le totogi fa’aletausaga i taimi a o galue, ona fa’atele lea i le aofa’i o tausaga sa ia tautua ai i le atunu’u e o o atu i le maualuga e 30 tausaga.

Pe afai ae taualoa lenei tulafono, o i latou uma lava na amata litaea i le aso 1 Oketopa 2012 ma luma mai, o le a aofia i latou i lenei si’itaga. O le taimi nei e 2% e maua e tagata litaea.

Ina ua fesiligia e le maota o sui totino o le komiti fa’afoe o le litaea a le malo i se iloiloga sa faia i le vaiaso na te’a nei, na taua ai e le loia a le Litaea ia Faoa A. Sunia e fa’apea, o le tulaga o le teugatupe o lo o i ai i le taimi nei, e mafai ai ona maua ni isi si’itaga mo tagata litaea, pe afai e fa’aulu e le fono se tulafono e aloaia ai lea fuafuaga.

Na taua e le to’atele o faipule i le taimi o le iloiloga e fa’apea, o le tele o fa’amanuiaga ua tatou molimauina i le taimi nei, na afua mai lea i le tautua sa ofoina atu e tama ma tina matutua ua malolo litaea, i taimi ao tautua i latou i totonu o le faigamalo.

Talu mai le aso Tofi o le vaiaso na te’a nei, e $174 miliona le aofa’i o le tupe a le litaea sa i ai i totonu o maketi o lo o faia ai fefa’atauaiga, e pei ona fa’ailoa e le ta’ita’ifono o le komiti fa’afoe o le litaea a le malo ia Va’anatiu Tofala Iafeta i luma o le komiti o le litaea a le maota o sui, ma o lea aofaiga e pei ona saunoa Va’anatiu, e mafai ona si’itia i luga, fuafua lava i le lelei ma le malosi o le tulaga o lo o i ai le maketi i aso ta’itasi.

O le fesili pe gafatia ona toe fa’aopoopo ni isi vaega tupe mo tagata litaea, na taua e Va’anatiu ma Faoa i luma o le komiti, e gafatia e le teugatupe o lo o i ai ona fa’atino siitaga e pasia e le fono, peita’i, e tatau fo’i ona si’i i luga tupe o saofaga mai tagata fai saofaga ma le malo, ina ia mautinoa ai le tupu tupu pea i luga o le teugatupe o le litaea a le malo.

Ua taoto atu nei i le komiti o le litaea a le komiti o sui lenei tulafono mo le fa’atulagaina i ai o se iloiloga. O le aso Gafua, 14 Mati lea ua fa’atulaga e toe a’e mai ai le Fono Faitulafono mai lana malologa e lua vaiaso e pei amataina nei i le aso Gafua o le vaiaso nei.