O le taeao ananafi na faia ai se poloaiga a le afioga i le fa’amasino sili ia Michael Kruse i loia o lo o taulimaina mataupu i le va o le Faletupe o Atina’e, ma i latou na agava’a i fa’amanuiaga tau tupe mai le polokalame lea sa fa’atupe ai e le feterale le fausiaina o fale e nonofo mautotogi ai tagata e vaivai le tamaoaiga, po o le ‘1602’, ina ia aveese mai o ia mai le iloiloina o mataupu nei ae tu’uina atu i ni isi o ali’i fa’amasino.

Na taua e Kruse e fa’apea, talu ai e i ai lona so’otaga i ni isi o i latou o lo o a’afia i lenei mataupu, o le mafua’aga lea ua ia poloaina ai le le tatau lea ona auai o ia i le iloiloina o mataupu nei.

O Fepuari o le tausaga nei na faila ai e le loia a le Faletupe o Atina’e ni tagi i luma o le fa’amasinoga maualuga, fa’asaga ia i latou e silia i le to’a 10 na agava’a i lalo o le polokalame, e talosagaina ai se poloaiga a le fa’amasinoga e poloa’i ai i latou nei ina ia toe totogi vaega tupe sa tu’uina atu ia te i latou, ina ua latou le tausisia aiaiga ma tuutuuga o le polokalame, e ala lea ina ua tuana’i le aso na fa’amuta ai le polokalame ae le i mae’a le fausiaina o a latou galuega sa fa’atupe e le polokalame.

E lima la mataupu sa fa’atulaga e fofogaina i luma o le ali’i fa’amasino sili i le taeao ananafi, ma o ia mataupu e aofia ai le va o le Faletupe o Atina’e ma Leon Malauulu; Fred Sony Ahoia; Salamasina Miranda Leafaitulagi Schuster; Jane Neru ma Robert Toamalama Toelupe.

O loia na aofia i le iloiloina o lenei mataupu e aofia ai Sharran Rancourt lea na tula’i mo ni isi o i latou o lo o faia fa’asaga i ai lenei mataupu, fa’apea ai ma le ali’i loia ia Tasi Tuiteleleapaga lea na tula’i mo le Faletupe o Atina’e.

Na fa’ailoa e Rancourt i luma o le fa’amasinoga ina ua valaauina lenei mataupu, o le to’alua o i latou e to’alima o le a tula’i e le o i ai ni la loia, o i laua ia e aofia ai Namulauulu ma Ahoia, na o i laua fo’i mai le to’alima na auai i totonu o le potu fa’amasino mo lenei mataupu.

O le isi to’atolu e aofia ai Schuster o lo o malaga i fafo, ae o le isi to’alua ua uma ona tu’uina atu i ai tusi e poloaina ai le oo atu i le fa’amasinoga mo le iloiloina o lenei mataupu.

Sa valaauina e Kruse sa latou feiloaiga puupuu ma loia atoa ai ma Ahoia ma Namulauulu i luma o le laulau a ali’i fa’amasino, ma ia fa’ailoa i ai le tulaga o le a o o i ai lenei mataupu, ma ia poloaina ai loa loia ma i laua e to’alua na auai ina ia feso’ota’i ma le Failautusi o le Fa’amasinoga, mo le fa’atulagaina o se aso e toe fofogaina ai le isi iloiloga o lenei mataupu.

E silia i le $3 miliona le vaega tupe lea ua talosaga le Faletupe o Atina’e i le fa’amasinoga, e poloaina i latou nei e toe totogi atu.

O isi o lo o aofia i le tagi a le Faletupe e aofia ai le afioga i le ali’i senatoa ia Nuanuaolefeagaiga Nua ma lona faletua ia Usu Nua; Michael Tolmie; Andrew Sunia; Joe ma Eleanor Hollister; Komesina Afalava, o se tagata faigaluega o le Faletupe, ma Carlene Afalava.

O le fa’alua ai lea ona valaauina mataupu a le Faletupe o Atina’e i luma o le fa’amasinoga, talu ona faila e le Faletupe la latou tagi i le masina o Fepuari na te’a nei.