O lo o fa’aauau pea ona fetaia’i tagata o le itumalo o Manu’a ma tulaga pagatia i femalagaaiga i le sami ma le ea i le taimi nei, e pei ona taua e le afioga i le alii faipule mai le itumalo o Manu’a #2 i le o le maota o sui i le vaiaso nei, le tofa Toeaina Faufano Autele, e ui o lea ua taunu’u le va’a fou o le Segaula faapea ai ma le amata o le tautua a le kamupani va’alele o le Polenisia mo le Itumalo.

Saunoa Toeaina e fa’apea, talu lava ona mae’a le fa’apaiaina o le va’a o le Segaula i le vaiaso na te’a nei, e le i faia lana ni ana malaga mo Manu’a, e o o fo’i i le kamupani va’alele o le Polenisia ina ua amata lana tautua mo Manu’a, e le o mafai lava ona lele aga’i i Ofu.

“Sa i ai le manatu o le a ea le tulaga pagatia o le Itumalo ina ua taunu’u le va’a o le Segaula, ao lenei o lo o fa’aauau pea ona tulaga pagatia le itumalo o le Manu’a tele”, o le saunoaga lea a Toeaina i luma o le maota o sui, ma ia talosagaina ai loa le tatau lea ona fesiligia e le Komiti le Fa’atonusili o Pulega o Uafu ma Taulaga e tusa ai o lenei mataupu.

Na taua e se tasi o tama matua mai Ofu i le Samoa News e fa’apea, afai o se tagata mai Ofu e lele atu i le Polenisia, e le gata e totogi le pasese i le va’alele, ae toe totogi fo’i le pasese e alu ai i alia aga’i i Ofu i le aofa’i e $100 pe sili atu fo’i.

“Faapea o le a ea le pologa ao lenei o lea lava e amo”, o le saunoaga lea a lea tamali’i.

Talu mai le taimi na mae’a ai le faapaiaina o le vaa o le Segaula mo Manu’a, toe pau le vaega o lo o totoe ona mafai loa lea e le va’a ona ave lana pasese atoa, o le tuuina atu lea e le U.S Coast Guard o le faatanaga e aloaia ai le tauaveina o le pasese e to’a 33.

E na o le to’a 6 le pasese o lo o mafai e le Segaula ona la’u i le taimi nei.

Saunoa Toeaina e fa’apea, o le fa’afitauli lea o lo o fetaia’i ma tagata mai Ofu ma Olosega/Sili, a taunu’u le va’alele i le malae va’alele i Fitiuta, ona totogi lea e tagata va’a alia e malaga ane ai i tai.

O lo o i ai le talitonuga o ni isi o le itumalo i Manu’a, talosia ia lata mai le taimi e mafai ai e le Segaula ona la’u lana pasese ua fuafuaina.