Ads by Google Ads by Google

Polokalama - Taofi Fa’asauaina o Fanauiti

 O le polokalama fa’apitoa e fa’alauiloa ma fa’ataua ai le taofia o le fa’asauaina o fanauiti, sa fa’atautaia lea e Vasega Level K3, K4, K5, Level 1 - 4 i le Iakina Academy ma sa faia le fa’ai’uga aloaia o lea galuega fa’atino i le aso ananafi, i le fa’aleleaina lea o Paluni, o se fa’amaufa’ailo e ta’u mai ai o latou lagona sa’oloto ua i ai.

I le fa’ai’uga o lenei polokalama sa aufa’atasi atu ai le susuga le Faipule o le Tualauta, Larry Sanitoa, le vasega o leoleo o lo ’o latou gafataulimaina fa’afitauli fa’apea pe afai e fa’auia atu mata'upu tau soligatulafono tau le fa’asauina o fanau i totonu o aiga i la latou matagaluega o le puipuiga o le Saogalemu Lautele. E le gata i lea, ae sa auai atu fo’i le Matagaluega o Alamanuia mo Tagata Lautele, i lona vaega e va’aia aia tatau ma le tusiga fa’apitoa o fanau.

O vasega uma nei a le Iakina Academy sa iloga mai lo latou ofuina o le lanumeamata i le aso ananafi, ona o lanu ia fa’apito augafa i le polokalama. Na latou saunia se keke e sami ai le mae’a lelei o a’oa’oga i le fanau, i ala e mafai ona latou feso’ota’i ai ma se fesoasoani pe afai ae va’aia e i latou ua sasa tigaina se tamaitiiti, pe va’aia fo’i e i latou ni isi tamaiti ua fa’asauaina i o latou aiga, ae maise fo’i, pe afai ae tu’ua na’o se tamaitiiti i lo latou fale, e aunoa ma se tagata matua.

I le polokalama fa’asolo o le aso ananafi, sa tu’uina se avanoa i le susuga le Faipule mo sana tautalaga ma sa ia fa’amamafaina le tulaga o le fausia o tulafono pe toe fa’aleleia atili o tulafono e ala i maga fa’aopoopo ina ia mautinoa ua tausia lelei le aia tatau ma le tausiga lelei o fanau i totonu o latou aiga ma isi lava fa’alapotopotoga e auai fa’atasi i ai i latou i so ’o se taimi o o latou olaga.

Ina ua mae’a le saunoaga matagofie a le Faipule Larry Sanitoa, sa tu’uina loa le avanoa i le Matagaluega o Alamanuia mo Tagata Lautele ma sa suia mai lea e le susuga Sam ma Mina fa’apea Nash Yandall Ga’opo’a.

O vaega e lua o le fa’asauaina o fanauiti na talanoaina ma fa’amamafa i lea polokalama, e pei lava o le so’ona sasa o le fanau ae le o se mea e ono fa’apea ai ona fa’atonu i latou ma le tu’ulafoa’i, po ’o le tu’utia’i o i latou ua le puipuia lelei.

Peita’i, i le taimi o le DHSS e fa’ailoa ai ia a’afiaga, sa latou fa’aopoopoina i ai ma se tautalaga e tusa o le fa’asauaina fa’aleituaiga. E ui ina e le’i fa’alauiloa au'ili'ili i le saunoaga a le tina o Mina lea tulaga i le fanau, ae ua na’o na fa’aatagia ia i latou, ona o lo ’o itiiti pea lava tausaga o le soifua o i latou na aofia i le potu ma le fa’amae’aina o le polokalama na fa’atautaia fa’apitoa mo ala uma e nofo fa’asauaina ai le fanau i totonu o aiga, po ’o isi lava nofoaga e tausia pe a’oa’oina ai i latou.

O se feau taua lava mo i latou, “Afai e mana’omia se fesoasoani vave lava, vala’au le 911!”

O le solo na tusia ma saunia e le vasega a le fanau i Iakina ma o latou faia’oga, na soso’o ai lona faitauina e le tama’ita’i o Harmony Leo. O se tama’ita’i laitiiti lava o ia, ae o le solo sa tusia fa’apitoa i le gagana peretania, sa ia tolaulauina ma le toto’a. Na patipatia fo’i ona faiva ina ua mae’a le tiute sa ia fa’ataunu’uina, aua ua maofa lava i latou uma i lea fo’i matati’a ua ia ausia e ala i le polokalama fa’apitoa mo le fa’asauaina o fanau i totonu o aiga.

Ina ua mae’a o le vaega o leoleo, sa latou fa’ailo ai se fa’atulagaga i le fanau, aua o i latou ua avea ma Tavita, a’o i tatou uma o e nonofo i totonu o le atunu’u, o le lafu mamoe. Ua matua mautinoa e le fanau le numera e feso’ota’i ai ma Tavita, 911.

O le fa’aleleaina o paluni na fa’ai’u ai lea taeao matagofie ma sa latou faia lea i luga o le malae ta’alo o le a’oga i Iakina lava. O le fa’amoemoe, ia mafai fa’apea ona fa’ate’a 'ese tiga o lo ’o a’afia ai ni isi o le fanau ona o sauaga, po ’o le tu’u tia’ia i totonu o aiga ae le tausia lelei i latou ma sapaia a latou aia tatau, e ola fiafia ai.

O le fa’afetai a le A’oga a Iakina sa fofogaina i le amataga e le fa’atina o le a’oga, Sa’ilau Tua’ifaiva ma sa ia fa’apea ai, “E ui ina itiiti Iakina, ae fa’afetai ua afea i la outou polokalama nei ina ia fa’atautaia ai ma o se fiafiaga fo’i o lenei a’oga, lea fo’i avanoa e fa’ailoa ai i le fanau lo latou taua ma e o’otia fo’i lo tatou malo i ona vaega ua latou gafa taulimaina lo latou puipuigamalu, pe afai ae tutupu sauaga i totonu o aiga, a’oga ma isi lava fa’alapotopotoga e aofia ai i latou ma a’afia ai lo latou soifua sa’oloto ma le fiafia.”