Ua fa’aalia e le to’atele o afioga i Faipule o le maota o sui o latou popolega ua i ai, i le tulaga saogalemu o le soifua maloloina o le mamalu lautele o le atunu’u, ona o faguvai ua maua i ripoti o lo o la’u mai i atunu’u Asia ma fa’atauina i faleoloa eseese i totonu o Amerika Samoa.

O lenei mataupu na mafai ona alia’e i le taimi o le iloiloga a le Komiti o le Tamaoaiga a le maota o sui i le vaiaso na te’a nei, ina ua iloiloina le tulafono taufa’aofi lea ua taoto i luma o le maota o sui, e talosagaina ai le fa’ae’e o se lafoga e .05 sene i fagu vai o lo o ulufale mai i totonu o le atunu’u.

O le agaga o lenei lafoga e pei ona fa’aulufale e le afioga i le ali’i faipule ia Puletuimalo D. Koko, ia mafai ai ona fa’aleleia le auala e aga’i i le afu i Leone, ma fa’aleleia ai ni isi o mataaga o lo o i totonu o le afioaga e fesoasoani ai i le atina’e tau turisi i le atunu’u.

O se tasi o itu sa fesiligia i le taimi o le iloiloga, o le mafua’aga e eseese ai le tau o pusa vai o lo o fa’atauina i faleoloa eseese i le atunuu.

Na taua e moliau i luma o le komiti a le maota o sui e fa’apea, o pusa vai ia e taugata, o pusa vai lelei ia o lo o sapalai mai i Fiti, ua mae’a fo’i ona faia i ai suega ma ua fa’amaonia le saogalemu o ia faguvai mo le soifua maloloina o le atunu’u, ae o isi fagu vai o lo o ui mai i atunu’u Asia, e le o mautinoa po o faia i ai ni suega e fa’amaonia ai lo latou saogalemu mo le atunu’u lautele.

Saunoa le afioga i le tama’ita’i faipule ia Vui Florence Saulo i le taimi o le iloiloga e fa’apea, e tatau ona i ai se tulafono e puipuia ai le soona ulufale mai o pusa vai eseese i totonu o le atunu’u, ina ne’i avea ma itu e a’afia ai soifua o tagata i ni fa’ama’i.

Na lagolagoina e le afioga i le ali’i faipule ia Puletuimalo le finagalo o Vui, ma ia taua ai le tatau lea ona silasila toto’a le Fono Faitulafono i le mataupu lenei.

Saunoa Puletuimalo e faapea, o ni isi o pusa vai o lo o fa’atauina i ni isi o faleoloa Asia i le atunu’u, e amata atu lava i le ta’i $5 ma fa’asolo atu ai i luga i le $8.

Na taua e le afioga i le ali’i faipule ia Vesi Talalelei Fautanu Jr e fa’apea, o le popolega o lo o i ai, ina ne’i tuai se gaioiga a le Fono Faitulafono e faia ina ia foia ai lenei fa’afitauli ma itu e fa’aauau ai pea ona ulufale mai pusa vai mai Asia i le atunu’u, ma a’afia atu ai pea soifua o tagata.

Saunoa Vesi e fa’apea, o le masani a le tagata Samoa, na te fa’atauina lava le oloa taugofie e fuafua i le tupe o lo o i lana ato, ma afai e pito sili lava ona taugofie le pusa vai mai Asia, lona uiga o le a televave fo’i ona taulia ae le o mautinoa po o saogalemu nei fagu vai pe leai fo’i.

I le mae’a ai o le iloiloga, na taofi ai loa le fautuaga ina ia fesiligia se fautuaga mai le loia a le Fono Faitulafono, i se auala e fa’atula’i ai se tulafono e puipuia ai le soona ulufale mai o pusa vai eseese i le atunu’u, sei vagana ua fa’amaonia le faia i ai o ni suiga mo le saogalemu o le atunu’u.