Ads by Google Ads by Google

Popole Fono Faitulafono i ni tau fa’aopoopo ASTCA i ana auaunaga

O se tasi o atugaluga na fa’ailoa e afioga i Senatoa ina ua fesiligia e le Komiti So’ofa’atasi a le Fono Faitulafono, le paketi a le Ofisa o Feso’otaiga a Amerika Samoa (ASTCA) i le vaiaso na te’a nei, o tau fa’aopoopo e ono fa’ae’e e le ASTCA i le atunu’u, pe afai ae o o i le taimi e feso’ota’i ai uae’a mo feso’otaiga fou lea ua i ai nei mai le galuega a le “BLAST Project” i maota ma laoa o aiga, ona o lea ua maua i ripoti e lei mae’a ona fa’atino e sui o le kamupani a le Michels le galuega talu mai le taimi na amata mai ai i le tausaga na te’a nei.

 

Na faailoga e le afioga i le ali’i senatoa ia Magalei Logovi’i i sui o le ASTCA, o tala ua maua e le Fono, o lea ua toe fo’i atu sui o le kamupani a le Michels sa amataina le galuega, ae ua tu’u atu e fa’amae’a e tagata faigaluega a le ASTCA.

 

“O galuega nei sa fuafua e fa’atinoina e le Michels i lalo o le BLAST Project, ae o le tula’i ese atu o le kamupani ae le i mae’a le galuega, ua atula’i mai ai se popolega tele i le Fono ma le atunu’u, ina nei i ai ni tau fa’aopoopo e fa’ae’e e le ASTCA pe afai ae toe talosaga le atunu’u e fa’aauau le fa’apipi’iina o lenei tautua i maota ma laoa,” o le saunoaga lea a Magalei.

 

Na fa’amanino e le pulesili le tumau o le ASTCA ia Alex Sene Jr i luma o le Komiti So’ofa’atasi e fa’apea, sa i ai lava le fa’amoemoe o le kamupani a le Michels latou te fa’atinoina le galuega ma fa’amae’a, ae talu ai o le tuai mai o mea e fa’atino ai le galuega mai Amerika, fa’aopoopo ai ma le fa’aletonu lea sa tula’i mai i va’a oloa i le amataga o le tausaga nei, na mafua ai loa ona faia le fa’aiuga ina ia fa’aauau loa e le aufaigaluega a le ASTCA le tosoina o laina o feso’ota’iga mo maota ma laoa o aiga o le atunu’u e le i o o atu i ai le tautua.

 

Saunoa le afioga i le faipule ia Faimealelei Anthony Fu’e Allen, e le fesiligia e le Fono le fa’atino e alo o le atunu’u o lo o galulue i le ASTCA le galuega, pau le popolega o lo o i ai, ina ne’i avea le vaega lona lua o le galuega lea o le a fa’atinoina e le ASTCA ma itu e fa’ae’e atu ai i le atunu’u se isi totogi fou.

 

Saunoa atili Faimealelei e fa’apea, e tusa ai o ripoti ua ia maua mai lona itumalo, o le ‘fiber’ lea sa toso e le Michels, o lo o gata mai i luga o pou, ae le o mafai ona o o i totonu o maota ma laoa.

 

Na fesili Faimealelei ia Sene pe i ai se isi tau fa’aopoopo mo le fa’aauauina atu o le ‘fiber’ mai luga o le pou e aga’i atu i maota ma laoa o aiga, ae na tali Sene, “e leai se totogi fa’aopoopo, pau le fa’anaunauga a le ASTCA o lo o i ai i le taimi, o le toso fa’aauau lea o le galuega mo le atunu’u.”

 

O le isi mataupu sa fesiligia e sui o le komiti soofaatasi, o se tupe o lo o totogi aga’i i le kamupani o le American Samoa Hawai’i Cable (ASHC), e mafua mai i le uae’a o fesootaiga lea sa toso muamua mai i Amerika Samoa nei i ni tausaga ua mavae. Na taua e Sene e faapea, e silia i le $3 miliona o lo o totogi aga’i atu i le DS3 ma le ASHC.

 

Saunoa le ali’i faipule ia Larry Sanitoa e fa’apea, o le isi lea mataupu o lo o to’atele le atunu’u o lo o fia malamalama ai, ona e fai lava si tele o le vaega tupe a le malo sa totogi i le poloketi lea i le ulua’i taimi na o o mai ai i Amerika Samoa.

 

Sa fesili le ali’i senatoa ia Magalei molimau, pe ua toe totogi mai le $50,000 lea sa totogi atu e le Pulesili ua mavae atu ia Moefaauo Bill Emmsley i se aiga i Leone, mo le fa’aaogaina o se fanua sa fa’afesuia’i ma le malo, ae na tali Hall, e le i toe totogiina mai le tupe lea.

 

Saunoa atili Magalei e fa’apea, e taua tele le tupe lenei, e tatau fo’i ona toe vaavaai i ai le pulega a le ASTCA ina ia mautinoa e toe totogi atu lea vaega tupe.

 

O isi tulaga tau tupe a le ASTCA sa fesiligia e Magalei, o tupe o lo o fa’atupe ai malaga a le komiti fa’afoe i fafo i le tausaga, lea sa fesiligia e Magalei ia Hall pe fa’afia ona malaga sui o le ofisa ma le komiti fa’afoe i fafo, ae na tali Hall, “pei uma lava e fa’a lima ona malaga sui o le komiti i fafo mo fonotaga.”

 

Ae na toe saunoa Magalei e fa’apea, ua mafua ona ia fesiligia le tulaga lea, e na o le tolu malaga o lo o tusia mai i le paketi, ae le iloa la pe aisea ua le lisiina uma ai malaga e pei ona taua e Hall.

 

E $326,000 le aofa’i o le tupe o lo o taua i le paketi ua fuafua mo malaga i fafo, e aofia ai pasese ma tupe fesoasoani mo tagata faigaluega poo totino o le komiti fa’afoe o le a malaga.

 

O le isi vaega sa fesiligia e Magalei, o le $100,000 lea o lo o taua i totonu o le paketi, e totogi ai tupe fa’aalu a sui o le komiti fa’afoe e aofia ai tupe faasili.

 

Na fesili Magalei ia Hall po o a taimi e totogi atu ai tupe fa’asili (stipend) i sui o le komiti, ae na tali Hall, se’i vagana lava taimi e faia ai fonotaga faapitoa a le komiti.

 

Saunoa fa’aataata le afioga i le Tama’ita’i o le Ao ia Gaoteote Palaie Tofau, o ia fo’i lea o le peresetene o le Senate, ana taofia le totogiina atu o tupe fa’asili nei i le komiti fa’afoe a le ASTCA, atoa ai ma le taofi o a latou malaga o lo o alu soo i fafo, atonu ua tele se tupe ua fa’asao mo le tautua a le ASTCA.