O le atugaluga tupito sa fa’ailoa e ni isi o afioga i Senatoa i le tulafono e fa’ae’e ai le lafoga mo faletalimalo, o le ono avea lea ma auala e a’afia ai le atina’e tau turisi i le atunu’u.

E ui e to’atele afioga i Senatoa na o latou fa’aalia le taua o lenei tulafono mai le faigamalo a Lolo ma Lemanu, e na o le afioga lava i le ali’i senatoa ia LeAtualevao Asifoa na ia fa’aalia i le taimi o le iloiloga ma sui o faletalimalo, lona matua lagolagoina o lenei tulafono.

O le lafoga e 5% lea ua fuafua le faigamalo e fa’ae’e i luga o potu o faletalimalo, o lo o fuafua o le tupe e maua mai ai e fa’atupe ai galuega toe fa’aleleia mo le malae va’alele fa’avaomalo a le atunu’u i Tafuna.

Na fa’aalia e ni isi o senatoa lo latou popolega i lenei tulafono, ina ne’i a’afia ai taumafaiga a le malo e fa’aleleia le atina’e o turisi i Amerika Samoa.

Saunoa le Teutupe a le malo ia Ueligitone Tonumaipe’a i le iloiloga sa faia i luma o le Komiti o le Paketi a le Senate e fa’apea, o le finagalo o Lolo ma Lemanu ma le la faigamalo, ia maua se vaega e fesoasoani ai i le fa’aleleia o manaoga o lo o tula’i mai i le malae va’alele i tausaga ta’itasi.

“E pei ona silafia e le Fono Faitulafono, e silia i le $1 miliona e mumu ai le paketi a le Malae Va’alele i tausaga tupe ta’itasi, ona toe avatu fo’i lea o tupe mai le Teugatupe Lautele a le malo e tau fa’atumu ai, ae o le vaega tupe lea ua fa’amoemoe e maua mai i le lafoga lenei, o le a fesoasoani e foia ai lea fa’afitauli”, o le saunoaga lea a le Teutupe.

I se su’esu’ega sa faia i faletalimalo tetele e lua i le atunu’u, le Sadie’s by the Sea ma le Tradewinds Hotel e pei ona saunoa le Teutupe, e tusa ma le $200,000 le tupe e mafai ona maua mai i faletalimalo tetele ia e lua, ae le o aofia ai isi faletalimalo tetele ma feololo ane o lo o i totonu o le atunu’u.

Na fesili le afioga i le ali’i senatoa ia Galea’i M. Tuufuli i le teutupe, pe le afaina ai le atina’e o turisi i le tulafono lenei, ae na tali le teutupe e fa’apea, o le to’atele o tagata o lo o malaga asiasi mai i le atunu’u, aemaise ai lava i tagata fai pisinisi mai fafo, o i latou ia sa fautuaina le faigamalo e fai le lafoga lenei.

O lea fautuaga e pei ona saunoa le teutupe, e mafua mai i le fa’ateia o ni isi o tagata mai fafo o lo o malaga asiasi mai i le teritori, ina ua latou malaga mai ma iloa, e leai se lafoga o potu faletalimalo a Amerika Samoa o i ai, ae o lo o faia e le tele o atunu’u eseese o le lalolagi e aofia ai ma Samoa.

Na toe fesili le afioga i le ali’i senatoa ia Alo Fa’auuga i le teutupe, pe le afaina le atina’e tau turisi i le tulafono lenei, ae na tali le teutupe e fa’apea, “e leai ma se tupe a le malo o maua mai i turisi o lo o malaga asiasi mai i le atunu’u i le tele o tausaga”.

Ae ina ua toe fesiligia e le afioga i le ali’i senatoa ia Soliai T. Fuimaono le teutupe i le fesili lava lea e tasi, pe le avea le lafoga lea ma itu e afaina ai le atina’e tau turisi i le atunu’u, na tali ai loa le teutupe fai mai, “ailoga”.