O le vaiaso nei na finau ai i luma o le fa’amasinoga maualuga le Pule o le pisnisi o Le Aute i luma o le Fa’amasinoga Maualuga, ina ia fa’amanino e le malo a latou mau fa’amaonia o loo lagolago ai tu’uaiga ua faia fa’asaga ia te ia, i luma o se iloiloga fa’apitoa sa faia i luma o le afioga i le ali’i Fa’amasino Sili ia Michael Kruse.

O lea iloiloga fa’apitoa, sa finau ai le itu tete’e ina ia aua nei aofia i mau fa’amaonia o le mataupu fa’asaga ia Lefatia, le straw ma le paipa lea e finau mai le malo sa latou maua ai i totonu vaega o le pauta fa’asaina o le aisa, ina ua latou osofaia le nofoaga autu a Le Aute i Malaeloa.

E pei ona silafia, o moliaga o loo tuuaia ai e le malo ia Tumuatasi Lefatia na afua mai ina ua osofa’i e leoleo lona fale i le aso 19 Mati 2015, i lalo o se poloaiga sa saini e le fa’amasinoga, ina ia fa’ataga ai ona sailia lona fale.

I le talosaga lea ua taoto atu e le loia a Lefatia o Fiti Sunia i luma o le fa’amasinoga, o lo o finauina ai e Sunia e fa’apea, o le straw lea e finau mai leoleo sa i ai vaega o le aisa, lea sa maua i lalo o le sofa i totonu o le potu moe a Lefatia, faapea ai ma le paipa e ula ai le aisa, lea fo’i e finau mai leoleo sa maua i totonu o se ato e teu ai le tiu piliati, lea fo’i sa iai vaega o le aisa, o mea ia sa maua i fafo atu o vaega sa poloaina e le fa’amasinoga e tatau ona saili mai i lalo o le poloaiga sa sainia ma tuuina atu i leoleo.

Na finau Sunia i le fa’amasinoga e fa’apea, na pau vaega o loo taua i totonu o le poloaiga a le faamasinoga e saili ai le fale, e na o a’upega ma pulufana.

I se vaega o faamaumauga a le fa’amasinoga lea e pei ona taua i totonu o le pepa molia ua faia fa’asaga ia Lefatia, o loo taua ai e le malo e fa’apea, ina ua faia se suega faapitoa i pauta papa’e sa maua i totonu o le straw ma le paipa, sa fa’ailoa mai ai le vailaau oona lea e fa’amaonia ai, o vaega ia o le pauta fa’asaina o le aisa.

Ae na finau Sunia i le fa’amasinoga e fa’apea, o le vailaau lea e finau mai le malo sa maua e leoleo i totonu o le pauta pa’epa’e ina ua latou su’eina, e le mafai ona apalai i le ituaiga pauta oona lea e finau mai le malo sa maua i totonu o le straw ma le paipa.

O se tasi o itu na aofia i le fa’afinauga a le itu tete’e fa’asaga i lenei mataupu, o amioga a leoleo mai mataupu tuai sa latou taumafai ai e suesue Lefatia ma lana pisinisi, pe maua ai ni fualaau fa’asaina, e ui sa leai ma se fualaau fa’asaina sa latou mauaina ai.

Na fa’atepa e Sunia le alii leoleo o Det. Ioane Paselio, o ia lea sa auai i le isi fo’i osofaiga fa’asaga i le fale o Lefatia, i le sailiina o ni fualaau fa’asaina, ma o le mafua’aga tonu lava lea na ala ai ona naunau lava Paselio e saili pe maua ni fualaau fa’asaina i le fale o le ua molia i le taimi na latou osofaia ai.

Ao i ai Paselio i luga o le nofoa molimau, sa fesiligia ai o ia e Sunia na te fa’apupula i le fa’amasinoga le latou osofaiga sa faia faasaga i le fale o Lefatia, ae poo ai fo’i na mauaina le straw ma le paipa lea o loo finau mai le malo sa maua ai totonu vaega o le aisa.

Na taua e Paselio i lana fa’amatalaga, e le o ia na mauaina le straw ma le paipa, ae o le isi leoleo sa ia mauaina, ma tuu atu ai loa ia te ia mo le faia i ai o le suega.

Na taua e Paselio e faapea, ina ua tuu atu e le leoleo lea le taga e teu ai le tiu piliati, sa ia sailiina loa ma maua ai i totonu o le paipa lea sa i ai vaega o le pauta pa’epa’e, ae ina ua ia faia i ai le suega, o iina na faamaonia ai loa o vaega ia o le pauta fa’asaina o le aisa.

Na taua atili e Paselio i lana molimau e fa’apea, o le straw lea na maua ai i totonu vaega o le pauta fa’asaina o le aisa, sa maua i le taimi na latou sailiina ai fana ma pulufana i totonu o le fale. Na taua atili e le alii leoleo i lana molimau e faapea, o le straw na maua ina ua maua e leoleo se a’upega i lalo o le moega, ae ina ua latou siiina i luga le moega, ae maua ai loa ma le straw i le pito i lalo.

Ina ua fesiligia le alii leoleo pe sa faia se suega i le pauta sa maua i totonu o le straw, na tali Paselio, “ioe”, sa faia i le ofisa, ma i le faaiuga o lea suega, sa fa’amaonia ai o le pauta oona lea o le aisa.

Na fa’ailoa e Sunia i le fa’amasinoga e fa’apea, o le paipa ma le straw sa maua e leoleo, e le o mea ia na aofia i totonu o le poloaiga a le fa’amasinoga e saili mai i le fale o Le Aute, ae o mea ia sa mafai ona maua e leoleo “i tua atu” o vaega sa poloaina e le fa’amasinoga e saili.

Na finau malosi ia Sunia i le fa’amasinoga ina ia aua nei aofia vaega ia i totonu o mau fa’amaonia o lenei mataupu. Sa ia taua foi’ e fa’apea, e le solitulafono le maua e leoleo o le paipa ma le straw, ae o le taimi lava na faia ai e leoleo le latou suega faasaga i mea ia, o iina na fa’atoa solitulafono ai loa, ona e le o vaega ia sa poloaina e le fa’amasinoga i latou e saili.

Ae ina ua maua le avanoa o le malo e finau ai, sa taua ai e le alii leoleo ia Russel Smith o loo tula’i mo le malo e faapea, e leai se vaega o le galuega atoa a leoleo o fa’aletonu, poo faia fo’i e aunoa ma le faatonuga a le fa’amasinoga.

Na taua e Smith e faapea, o loo talafeagai le galuega a leoleo sa faia, aemaise lava leoleo ua maea ona aoaoina faapitoa i le sailiina o fualaau faasaina, aua o le taimi lava na te vaaia ai ni vaega e ono fesoota’i ma le umia faasolitulafono o fualaau faasaina, o le taimi lea e faia ai lana galuega.

Sa finau atili Smith e faapea, o mea sa maua i le fale o Lefatia e pei o fua e 3, straw e tipi tulimanu e silia ma le 300, faapea ai ma pea seleulu e 3, ua lava ia e fa’amaonia mai ai o le nofoaga lea o loo gaosi ma faatau mai ai fualaau faasaina.

Na finau foi Smith e faapea, o fualaau faasaina sa maua e leoleo i le taimi na latou sailiina ai fana ma pulufana, o tiute foi a leoleo sa faatinoina i lea aso, sa faia e tusa ai ma le poloaiga a le fa’amasinoga.

Ua taoto atu nei i se faaiuga a le fa’amasinoga le talosaga a le itu tete’e.

O afioga i ali’i fa’amasino lagolago ia Faamausili ma Muasau sa lagolagosua i le faamasino sili i le iloiloina o mau o lenei mataupu.