Ads by Google Ads by Google

SAAFIAFIAGA MO SFC PENELOPE M. VAI’AU

O le vaiaso nei na faamavae atu ai uo ma aiga tainane ai le malo ia SFC. Penelope M. Vai’au, e ala i ona toe sauniga faai’u sa faia a’o lumana’i ai le momoliina atu o lona Sa i lona oliolisaga tumau.

Na tuaa lenei olaga e SFC Penelope Melinda Vaiau i le aso 16 Iuni, 2012, i la’ua fale ma lona to’alua Ronald Mulitauaopele i le nofoaga a le US Army i Fort Lewis, Washington.

Na soifua mai o ia ia Tesema 24, 1980 i ona matua o Kitara Togiva Vaiau o Aunu’u ma Alofau ma lona tina o Etevise Ulugia Satele mai Vaiusu Samoa, ma ua atoa lelei le 31 tausaga o lona soifua i le taimi ua maliu ai. Na fa’ato’a to’ai taunu’u mai lona tino maliu i le afiafi o le aso Lua, Iulai 17, 2012 ina ua mae’a su’esu’ega a le Vaega ‘au i le afuaga o lona maliu.

Na molita’i lona va’a i le Maota Gasegase ma taoto ai ona fa’ato’a toe auina mai lea i tua i le aso Tofi mo ona sauniga mulimuli i le Ekalesia Katoliko i Lauli’i, i le malumalu St Peter & St.Paul i le itula e 9:00 i le taeao. Na tatalaina lona Sa mo maimoaga ma feiloa’iga a Aiga  ae maise i lana Ekalesia sa tapua’i mai ai o ia i lona talavou se’ia o’o ina tu’ua Amerika Samoa mo a’oa’oga maualuluga ma tautua i le Militeri a le Malo Tele.

I lona tulaga a’oa’oina, ua fa’amatalaina ai sa amata ana a’oga a’o ono tausaga le matua i Sterley Heights Elementary School i Okinawa Iapani a’o tautua matua i le Eafosi po’o le Fuva’alele a le Malo tele. Na toe fa’aauau mai lea o ana a’oga i Aunu’u Elementary i le tausaga e 1991 ma toe soso’o ai ma le ulufale i Matafao Elementary i Faga’alu ma fa’au’u ai le vasega 8.

O le a’oga maualuga a Fagaitua na ulufale i ai mo a’oga maualuluga, ma fa’au’u ai i le tausaga e 1998. Peita’i, na ia te’ena se avanoa e fa’asikolasipi ai i Hawaii, ae toe ulufale i le tatou Kolisi Tu’ufa’atasi ma sa ia pasia ai lona AA i le tausaga e 1999 ma na ia mauaina le tulaga Salutatorian pe tulaga lua i togi maualuluga.

Na fa’asikolasipi i le Iunivesite o Hawaii ma maua ai lona fa’ailoga o le Bachelor of Arts i le Business Management i le tausaga 2007. Na toe amatalia ana a’oa’oga fa’apitoa mo lona fa’ailoga Masters in Organizational Change ma e toetoe lava mae’a ae amia loa lona ola.

O ana a’oa’oga nei i fa’ailoga maualuluga, na fa’atautaia fa’atasi lava ma ona tiute ae ua mae’a tauto i le US Army, lea na mua’i tauto ai i le tausaga e 2001.

E tolu taimi na tauto ai e avea ma Unit Supply Sergeant mo le 25th Infantry Division lea na malaga ai i le tausaga 2004, 2007 ma le tausaga 2010 i le Iraqi Freedom Mission.

“E fautua lelei o ia, ma e maua mai ai le mapusaga i taimi e fia maua ai se fautuaga lelei i ata fa’ai’uga e faia i lo ta olaga.” O se molimau lea a lona uso la’ititi. I lona tama, sa ia molimau, “E tele na’ua mea sa manatu lenei tama’ita’i na te fia faia, ae le’i mae’a, lea ua uma le avanoa, ae le’i taunu’u. Fa’afetai Pene, o oe o se meaalofa uiga ese mo i ma’ua mai le Atua. Fa’afetai tele fai matua, ma te alolofa tele ia te oe!”

E le’i mafai e le tina ona molimau mo Penelope, aua e moni ai le tala o le tusi, “E pei o le loloto o le moana le alofa o le tina, ma e le mafai fo’i ona tineia e se mea e tasi, o lona naunau e fia mafuta pea ma lana tama na fanaua, ae o le saua lea o le oti, na te tu’ueseesea ai nei malosi’aga e lua!”