Ua i luma o le maota o sui se pili mo se tulafono sa fa’aulufaleina e le afioga i le tama’ita’i faipule ia Vui Florence Tuaumu Saulo, e fa’asoa atu ai le aofaiga e $100,000 mai le fa’aaogaina sa’o o lafoga mo meainu o lo o i ai le ava malosi (alcohol), e fausia ma fa’aleleia ai auala i le itumalo o Tualauta.

O le agaga autu o lenei taumafaiga e pei ona saunoa Vui, o le sailia lea o se auala tumau e foia ai fa’afitauli ua tele tausaga o fetaia’i ma le itumalo, o le fa’aletonu lea o ona auala.

I le fa’atomuaga o lenei tulafono o lo o taua ai e fa’apea, o le pili lenei o le a fa’asa’o ai le fa’aletonu tele o lo o aliali mai i le Tiute ma le fa’amalosia o aiaiga o meainu e i ai le ava malosi o lo o aumai i le teritori.

Ua i ai i le teritori le tulafono e fa’alafoga ai meainu o lo o i ai le ava malosi i totonu, peita’i e i ai isi ituaiga o meainu ua uma ona tu’u i ai le ava malosi ae le o fa’alafogaina e pei o le Smirnoff Ice, Jack Daniels Lynchburg Lemonade, Vodka Cruise, Impulse, Mike’s Hard Lemonade, ma le anoanoa’i o isi  meainu ua le mafai ona lisiina atu, ae ua uma ona tu’u i ai le ava malosi.

O meainu nei e le o aofia i totonu o le faauigaina o meainu ua i ai le ava malosi e pei o le pia, sipili ma le uaina, ae foliga mai fo’i e le o i ai lava se vailaau aoga o i totonu o nei meainu e ala ai ona fa’aagafua mai le fa’alafogaina.

O le mea moni lava, e tasi lava le auala e ala ai ona aumaia ituaiga meainu nei i le teritori, o le taumafaina lea o le ava malosi, ma, ua tatau ona fa’amuta le manatu lea, e le o ni meainu nei e i ai le ava malosi, ua tatau fo’i ona saili se auala e taofia ai le mama o lo o tula’i mai i le tulafono.

I le sefulu tausaga ua tuana’i atu, e le gata ua vaaia ai le fa’atupulaia o tagata ua aumau ma nonofo i le itumalo o Tualauta, ae ua maitauina fo’i le fa’atupulaia ma le to’atele o tagata moni lava o le itumalo, e le gata o tagata ua maua fanua e fa’atau ma nonofo ai, ae ua tele fo’i atina’e ua vaaia ai le itumalo.

O le mea moni lava, e le gata ua maitauina le aafia o tagata lautele o le atunu’u ona o le ava malosi, ae ua maitauina fo’i le fa’atupulaia o solitulafono eseese e mafua mai i le tagofia o le ava malosi, ma, o le isi lea mafuaaga e le tatau ai ona fa’aagafua lenei meainu mai le fa’alafogaina.

O le autu lea o le talosaga e pei ona taua i le tulafono, ina ia fa’aaoga le vaega tupe o le a maua mai i le lafoga lenei, e fa’asoasoa atu ai le aofaiga e $100,000 e fa’aleleia ai aualai totonu o le itumalo.

Tusa lava pe le atoa le 8% o le ava malosi i totonu o ituaiga meainu nei, o le a taua lava nei ituaiga meainu o meainu e i ai le ava malosi, ma, o ituaiga meainu ia o le a aofia i lalo o le tulafono lenei.

O lenei tulafono ua taoto atu nei i le komiti o le tamaoaiga a le maota mo le fa’atulagaina o se iloiloga e fa’atatau i lenei tulafono.

Na taua e le sui faatonusili o le Ofisa o Galuega Lautele a le malo ia Faalavai Taase i se iloiloga sa faia i le lua vaiaso talu ai, o le fa’afitauli numera tasi o lo o fetaia’i ma le malo i le taimi nei i tulaga o auala, e le o i ai se vaega tupe mai le feterale o fa’aagaga e fa’aleleia ai le tele o magaala i le atunu’u, se’i vagana ua fa’amoemoe i tupe lotoifale.