E o o mai lava i le taimi nei o lo o tau sailia pea e leoleo i latou na fa’atinoina se osofaiga i se faleoloa i Fagaalu i le vaiaso na te’a nei.

Na fa’amaonia mai e le komesina o Leoleo ia William E. Haleck i le Samoa News i le amataga o le vaiaso e fa’apea, o lo o fa’aauau pea su’esu’ega a leoleo e tusa ai o lenei mataupu, o lo o tau sailia fo’i ni molimau e ono feso’ota’i i le fa’alavelave sa tula’i mai.

“E o o mai i le taimi nei e le o i ai se tagata po o ni tagata ua masalomia pe tau masalomia fo’i i lenei fa’alavelave, ae o lo o fa’aauau pea su’esu’ega a leoleo,” o le saunoaga lea a Haleck e aunoa ma lona fa’alaua’iteleina o ni isi o tulaga o lo o aga’i i ai a latou su’esu’ega.

Na si’omia uma fafo o le faleoloa o le Gold Conda store i Fagaalu i lipine a leoleo i le taeao o le aso Tofi na te’a nei, a o fa’agasolo ai latou su’esu’ega, ma fa’atoa tatala ai le faleoloa mo fa’atauga pe tusa o le itula e 10:00 i le taeao.

O le osofaiga lenei na tula’i mai i se vaega o le po o le aso Lulu na te’a nei, fa’asolo atu i le vaveao o le aso Tofi, e pei ona fa’amaonia mai e ni molimau se to’alua i le Samoa News, e le i finagalo e fa’ailoa o la suafa.

Na taua e le isi molimau e fa’apea, e to’alua tagata na ufi o la foliga i ofu i le taimi na fa’atinoina ai le osofaiga, ma alu atu ai le isi to’atasi o i laua nei ma fa’alala le fana i le fa’atauoloa ae ave tupe sa i totonu o le masini tupe.

Na taua fo’i e le molimau e fa’apea, o se ta’avale lanu pa’epa’e sa malaga atu ai tagata nei mo le fa’atinoina o le solitulafono, sa fa’apea ona la toe sosola ese ai ma aga’i atu i le itu i sisifo o le motu nei i se vaega o Tafuna.

O lo o talosagaina fo’i ma le fa’aaloalo e le ofisa o leoleo le mamalu o le atunuu lautele, afai e i ai se tasi na te silafia ni fa’amatalaga e uiga i lenei mataupu, fa’amolemole ia vave fa’afeso’ota’i le ofisa o leoleo.