O le vaiaso na te’a nei na sainia ai e le afioga i le ali’i kovana ia Lolo Matalasi Moliga le tulafono o le pone na pasia e le Fono Faitulafono, e fa’ataga ai le fa’amatu’u mai o tupe o pone mo Amerika Samoa, ina ia mafai ai ona fesoasoani i le fa’aleleia o le atina’e ma le tamaoaiga o le atunu’u.

I se vaega o le tusi a Lolo sa tu’uina atu i ta’ita’i o le fono e fa’alauiloa ai lona sainia o le tulafono, e le gata o lo o ia fa’afetaia ai le fono i le pasiaina o lenei tulafono taua, ae sa ia taua fo’i le avea o lenei tulafono o se auala e fa’afaigofie ai i le komiti a le ASEDA ona ulufale atu e galulue i mataupu o pone i totonu o maketi o fefaatauaiga i le Iunaite Setete.

O le agaga autu o lenei mataupu e pei ona taua e Lolo, ia mafai ai ona fa’atonutonu le tulaga o aitalafu a le malo o lo o i ai, atoa ai ma le vaai mamao i le fausia o ni atina’e tetele mo Amerika Samoa.

O le tulafono o le pone (ASEDA) na afua mai i le faigamalo e pei ona tu’uina atu ai i le Fono, o se mataupu fo’i na taua e Lolo i lana ulua’i saunoaga fa’a kovana ina ua tatala aloaia tauaofiaga o le nofoaiga lona 33 lenei a le Fono Faitulafono i le masina o Ianuari 2013.

Talu ai le taua o lenei tulafono aemaise ai o le fa’anaunauga ina ia fa’atinoina loa lenei fa’amoemoe i se taimi vave lava, ua manatu ai ina ia taualoa vave loa lenei tulafono i le taimi lava e pasia ai e le Fono Faitulafono ma sainia e le ali’i kovana.

E ese mai i ni isi o atina’e tetele ua fa’amoemoe le malo e fausia i vaega tupe o le pone pe afai ae fa’amanuiaina ai Amerika Samoa, o le isi fa’amoemoe o le faigamalo o le totogiina fa’amae’a lea o aitalafu a le malo o lo o i ai, e aofia ai aitalafu na afua mai ona o poloaiga a le fa’amasinoga ina ia totogi e le malo, e pei o le mu o le Laufou Shoppiing Center ma isi, atoa ai ma nonogatupe a le malo o lo o i ai i le Teugatupe o le Litaea.

O ni isi o atina’e na taua i totonu o le tulafono o lo o fuafua le malo e fausia, e aofia ai se va’a mautu mo le itumalo o Manu’a, toe fa’aleleia ma le fausiaina o auala i totonu o le atunu’u, o tulaga i uafu mo va’a faila ma le uafu e taunu’u i ai va’a i tua o kamupani i’a, aemaise ai le toe fausia o se isi fale fono fou mo le atunu’u.

Na taua e le peresetene o le Senate ia Gaoteote Palaie Tofau i le taimi na valaauina ai le iloiloga lona lua a le maota maualuga ma le komiti o le atina’e a le malo e fa’apea, o le fausia o se isi fale fono fou, o se manaoga e matua tatau lava ona fa’ataunu’uina, ona ua maitauina le tulaga fa’aletonu o le maota fono a le atunu’u o lo o i ai nei.

I le faaiuga o felafolafoaiga e tatau i le mataupu o le pone, ua manino ai le tele o le avanoa e mafai ai ona fa’aleleia atina’e i le atunu’u pe afai ae manuia taumafaiga a le komiti o le atina’e i tulaga o tupe e maua mai i le pone.