O le alii lea o loo tu’uaia i lona talaina o ni siaki se ono, e fa’aaoga ai le teugatupe a se kamupani ua leva ona tapunia i le atunu’u, ua molia nei e le malo i moliaga mamafa e lua o le gaoi, atoa ai ma lona tu’uina atu lea ma lona iloa o ni siaki e leai se teugatupe e tala mai ai.

O le amataga o le vaiaso nei na pu’e fa’apagota mai ai e leoleo ia Walter Reid, ma molia ai o ia i luma o le fa’amasinoga fa’aitumalo i le aso Gafua na te’a nei, ae ina ua le mana’o le ua molia e fa’ataunu’u lana iloiloga i luma o le fa’amasinoga fa’aitumalo, ua tofu atu ai loa lana mataupu i luma o le fa’amasinoga maualuga, lea e pei ona ia tula’i ai i le taeao ananafi ma ia teena ai tu’uaiga uma fa’asaga ia te ia.

O le mataupu lenei na tofu atu i le Ofisa o Leoleo i Fagatogo, ina ua faila e le pule o le Faleoloa o le F L Samoa, Inc sana tagi i le ofisa o leoleo, e fa’atatau i ni siaki leaga se ono sa alu atu Reid ma tala i lona faleoloa.

O le aso 23 Setema 2014 na faila ai e le ali’i o Zhang Liren lana tagi i le ofisa o leoleo, ae o le aso 2 Oketopa 2014 na amata aloaia ai loa suesuega o lenei mataupu, lea na maua ai le avanoa o leoleo e fesiligia ai le pule o le faleoloa na a’afia e tusa ai o lenei mataupu.

Na taua e Liren i leoleo e fa’apea, e ono siaki na alu atu Reid e tala i lona faleoloa, amata mai i le va o le aso 29 Me e oo atu i le aso 5 Iuni 2014.

I fa’amaumauga sa tuuina atu e Liren i leoleo o loo taua ai e fa’apea, o le siaki muamua na tala e Reid i le faleoloa i le aso 29 Me i le aofa’iga e $700, sosoo ai loa le isi siaki i le aso 30 Me i le aofa’iga e $400, ma le isi siaki i le aso 31 o Me i le aofaiga e $150.

Mo le masina o Iuni, o le aso 1 o Iuni na tala ai e Reid le siaki e $400, sosoo ai loa ma siaki e lua i le aso 5 o Iuni i le aofaiga e $900 ma le $500, ona maua ai lea o le aofa’i e $3,050 o le tupe o loo tu’uaia e le malo le ua molia sa ia ave fa’agaoi mai le pisinisi na a’afia.

O siaki o loo tuuaia e le malo ia Reid sa ia talaina mai i le faleoloa na a’afia, o siaki a le kamupani o le Air Design, ae ina ua fesiligia e leoleo le pule o le pisinisi lea o le Air Design, na taua ai e le susuga a Lafaele Tauiliili le tapunia o lana pisinisi i le 2004, o le tausaga lava fo’i lea na tapunia ai ma le teugatupe a le pisinisi.

Na taua fo’i e Lafaele i leoleo, na te le’i tuuina atu se tusi siaki o lana pisinisi ia Reid, na te le iloaina fo’i pe na fa’apefea ona maua e le ua molia siaki o lana pisinisi.

Ae ina ua fesiligia e leoleo ia Reid i le aso 6 Ianuari 2015 e uiga i lenei mataupu, sa ia ioeina ai lona talaina o siaki ia e ono i le faleoloa na a’afia, e ui sa ia iloa ua leva ona tapuni le pisinisi.

Na fa’ailoa fo’i e Reid i leoleo, o le to’alua o le ali’i sa pulea le kamupani na tuuina atu tusi siaki ia te ia, ae ina ua fesiligia e leoleo le fafine e uiga i lenei mataupu, na teena ai e le fafine lona tuuina atu o se tusi siaki ia Reid, na te le iloaina fo’i pe na fa’apefea ona maua e Reid le tusi siaki.

Na taua e le fafine i leoleo e fa’apea, sa latou nonofo fa’atasi ma lona to’alua ma Reid, ae ina ua la tapenaina le latou fale i le isi aso, sa ia maua ai le tusi siaki.

O lo o taofia pea Reid i le toese i Tafuna, sei vagana ua ia totogiina le tupe e $20,000 ona fa’atoa mafai lea ona tatala o ia i tua e fa’atali ai taualumaga o lana ulua’i iloiloga, lea ua fa’atulaga e faia i le fa’aiuga o le masina fou o Iulai.