Na tu’ua e le ali’i atisi Samoa, Sau Ueligitone ma le faletua, Barbara Ueligitone, le atunu’u ina ua manatu i la’ua e o atu e alaala tumau i Hawaii ma tausia le tina o Barbara, peita’i, ua i’u ane, ina ua avea lea ma se filifiliga aoga tele mo i la’ua, ina ua faia ai la’ua talavai, ma ua fa’atasia ai ma le fanau ma latou aiga.

O le 20 tausaga lea na to’esea atu ai i la’ua, ua aoga tele fo’i i le tupulaga Samoa i Hawai’i, aua ua fa’atula’ia e i la’ua, fa’atasi ai ma nisi la’ua uo Samoa, le a’oga e a’oa’oina ai fanau i “Mamanu, latou uiga e fa’asino i le olaga o le Samoa Moni.” O lea a’oga “O le Fetu Ao.”

“O lea e faia lava le mea e tasi sa tautua ai a’o iinei, e le tu’ua fo’i le naunau ina ia fa’asoa atu le taleni i fanau talavou a le atunu’u, ina ia le vale tu’u lima fo’i lenei measina a le atunu’u,” o se tala lea a Ueligitone.

A’o iinei o ia, e tele na’ua ata sa ia tusia, ma sa matele ina va’aia ana galuega ua fa’alauiloa ma ua maimoaina i fa’aaliga o Tu ma Aga a le Atuvasa. Ua le gata i lea, ae ua auai fo’i o ia o se totino o le Ausiva Fa’afiafia a le Arts Council.

Sa asiasi mai i le atunu’u ona o le fa’aipoipoga a se tasi o le fanau, ae o lo’o ua olaola pea le taleni ma ua matua matagofie le tele o vaipanoa o le atunu’u ua tusia ai ata e fa’amatagofie ai, e le tama’ita’i atisi o Reggie Meredith ma le isi to’atele o fanau ua talenia i lea fo’i faiva.

“O se fiafiaga lea, aua e susu’e pea le fa’amalama ma tau fa’alologo mai i ni fafatala e avatu i alaata o televise, po’o nusipepa fo’i ma i si ala ua tapena i lenei vaitau, i mea uma ua faia e i latou ua talenia fa’atasi i matou i lenei faiva. Ua matagofie ata o lo’o ua tapena i le Malae Va’alele, e fa’ato’ai mai i ai femalaga’iga fa’avaomalo, o se mea matagofie lea,” o se tala lea a Ueligitone.

E tusa ai o lana fa’asoa i Hawaii ma le taumafaiga e fa’aolaola Mamanu Samoa Moni, ma fa’amatala ma a’oa’o ai tupulaga talavou o lo’o ua latou mafuta ma fetufa’i, i o latou fa’asinomaga, le aoga o le tamau lea a Samoa, ina ia le toe mamulu atu le agaifanua.

“O nei mamanu e aofaga uma i le malofie po’o le tatau a taulele’a Samoa, e matua tofu ma lo latou uiga ma le fa’asinomaga i le olaga o le tagata Samoa. So’o se mamanu o le malofie, e ao fo’i ina malamalama lelei i ai le ua taina, i lona uiga. O A’oga la ia o lo’o faia e Le Fetu Ao i le fanau Samoa ua matou a’oa’oina,” o Ueligitone lea.

E ese mai lena vala o le a’oa’oga, o le tautala fo’i i le gagana ua a’oa’oina, ina ia mafai ona tautala ma le malamalama i le fa’asamoa. “Afai e le malamalama le taule’ale’a i le gagana, toe le malamalama i le mamanu ma le malofie a le moamoafiti, e le tatau ona ia la’eia  le La’ei Samoa Moni!”

“O le to’atele [i Hawai’i] e igoa Samoa, fa’ai’u Samoa, ae misi atoa le tautala i le gagana Samoa. Peita’i, ua i ai papalagi ma latou fanau, ua matua pei ni Samoa lo latou olaga atoa, ua tautatala, tusitusi ma ua mafai fo’i ona failauga ai i le tatou gagana. O lea se lu’iga e ao ina tatou taumafai e fa’asa’o, ma soloia loa mai le toe tupu mai. Ua feololo mai lava nai fanau ua a’oa’oina, o le to’atele o matou tamaiti a’oga, o le fanau sa o’o atu e a’o’oga le gagana tautala.”

Ina ua fesiligia i le tele o pe’a ua teuteuina ai fo’i tino o le to’atele, ae sa ia fa’ailoa mai, “Ua matele ina kopi a tatou mamanu e le au ta pe’a, e le mafai ona taofia lea tulaga, peita’i, o le mamanu i lou tino ae e te le malamalama i lona uiga, e iloa ai e te le’i taina lea pe’a ma le agaga Samoa Moni ia te oe.”

O lo ua to’atele fo’i suli o le atunu’u o alaala tumau i Hawaii ua taina a latou malofie i Hawaii, ae ua mae’a iloa lelei le aotelega o latou malofie, aua ua mae’a a’oa’oina e Le Fetu Ao. “O se fiafiaga lea ia te’i matou, ua aoga se auaunaga mo le tupulaga talavou, ia o’o atu i o latou taimi, ua fa’asoa atu fo’i e i latou nei mea uma i fanau o le lumana’i.”

O le ata sili ona ta’uta’ua a lenei atisi i lona fo’i olaga tautua ai i le Arts Council, o le ata lea, “O le Fa’alavelave.” O lo’o va’aia ai le matai o lo’o lauga, ma le tele o mea o masi’i mai ma aiga, paelo, ietoga pusa apa ae maise le teutusi o tupe.

Ua fa’ailoa e ia, “O lo’o ua i ai nisi a’u ata, o lo ua ia toe avea i Hawaii se’i toe fa’aleleia, ma o le a fa’aaogaina fo’i e fa’alauiloa i nisi o nofoaga taua i Hawaii.”

O se tasi o ana galuega talu mai ona fa’atuina Le Fetu Ao, sa ia fa’ailoa mai, “O le matou Fa’aaliga sa faia mo le Fu’a a Samoa i le 2012, na aofia fa’atasi ai le fa’aaliga o mamanu, Siapo, Malofie ma le Malu, fa’atasi ai ma le isi itu sa ta mai ai le tatau, na matua iloga le to’atele i ai o e na maimoaina lea fu’a. Na asia fo’i le matou fa’aaliga e le to’atele ma sa talosaga mai ai e fa’atautau i le Faletusi a le UH mo le tausaga, ae o lo’o ua toe fa’aalia nei i le faletusi i Salt Lake ina ua ave’esea mai le faletusi a le UH i Manoa.”

“O a’u ou te agaga lava a’u i le atisi o galuega fa’atino, ia i ai ma lou agaga atoa i lau fa’atinoga, fa’aopoopo atu i ai ma lou iloa a’ia’i o mea o aofia i lau fa’atinoga,” o a Ueligitone lea.