Ua molimauina le aga’i atu o tapenaga a le ‘au ta’ito’a 15 a Amerika Samoa i se tulaga lelei ma le maopoopo, ao lumana’i ai nai vaiaso e lua o loo totoe ona amata aloia loa lea o le ta’amilosaga lea e faia i Papua Niu Kini, lea e tausinio ai Amerika Samoa fa’atasi ai ma isi ‘au e tolu mai le Pasefika.

O ‘au e tolu o loo aofia ai ma Amerika Samoa i lenei ta’amilosaga e aofia ai Papua Niu Kini, Solomona ma Tahiti, ma o se taimi muamua lenei ua tausinio ai Amerika Samoa i le ta’amilosaga ta’ito’a 15, talu ona avea o ia ma totino tumau o le Faalapotopotoga o Taaloga Lakapi a le Lalolagi (IRB) i ni nai tausaga e lei mamao atu.

O le taua tele o le ta’amilosaga lenei mo Amerika Samoa, na mafua ai ona faia e le Taitaifono o le Iuni Lakapi a le atunu’u (ASRU) ia Togiola T. A Tulafono le fa’aiuga, e taofi le au ta’ito’a 7 mai le tausinio i ta’aloga a le Pasefika sa faia i le masina na tea ‘nei i Papua, ae fa’asao le tupe ma tu’u le avanoa e malaga ai le ‘au ta’ito’a 15 a le atunu’u e tausinio i le ta’amilosaga lenei mo le taimi muamua.

E ui sa tele fa’asea mai ni isi o le atunu’u e uiga i lenei fa’aiuga, peita’i na fa’amanino e le afioga i le matua ia Togiola i le Samoa News e fa’apea, o loo i ai le taamilosaga ta’ito’a 7 a le Oceania ia Novema 2015, e toe maua ai fo’i le isi avanoa e toe tausinio ai le ‘au ta’ito’a 7 i lenei tausaga.

O le susuga a Leota Toma Patu mai le afioga o Leone lea ua tofia nei e avea ma faiaoga o le ‘au ta’ito’a 15, ma ua fa’amoemoe o le aso 18 Aokuso e tatau ona malaga ese atu ai le ‘au mo Papua, ao lumana’i ai le latou ulua’i ta’aloga i le aso 22 o le isi vaiaso.

Na maua le avanoa e asia ai e le Samoa News koleniga a le ‘au o loo faagasolo i le malae i Tafuna, ma molimauina ai tulaga lelei ma le maopoopo ua i ai tapenaga i le taimi nei.

E to’a 45 alii o loo i ai i le ‘au o loo koleni i le taiim nei ma le fa’amoemoe, e tatau ona oo atu i le vaiaso fou ua mautu le filiina o i latou e to’a 22 e malaga i Papua mo le ta’amilosaga.

O le aso Toona’i o le vaiaso nei lea fo’i ua fa’amoemoe e mae’a aloaia ai le ta’amilosaga to’ito’a 15 a le ASRU o loo faagasolo i le taimi nei, ma, o le isi lea auala o loo fesoasoani malosi ai i koleniga a le ‘au, o koleniga a kalapu ta’itasi o loo tausinio i le ta’amilosaga.

O le aso Toona’i na te’a nei na lu’i ai e Avele le Talita o loo umia e Pago Pago, peita’i e le’i manuia ina ua toe manumalo Pago Pago i se ta’aloga finau, ma ua sauni atu nei le ‘au malosi mai Nu’uuli latou te lu’iina le Talita i le aso Toonai nei, lea fo’i ua faamoemoe e tapunia aloaia ai ma le ta’amilosaga.