O le ali'i lea na ia ulufale fa'amalosi i totonu o le fale a se aiga i Pago Pago, ma fa'ao'olima i le tamaloa matua e ana le fale, ua toe tolopo i le vaiaso fou le fofogaina o le latou maliliega ma le malo lea na faatulaga e tolaulau i luma o le fa'amasinoga i le taeao ananafi, ina ua manatu le fa'amasinoga e i ai ni isi o vaega e tatau ona fa'amanino atili e tusa ai o lenei maliliega.

E lua mataupu na molia ai e le malo le alii o Arona Amituana'i, ona o le faalavelave lea na ia osofaia ai le fale o Selila Patane i Pago Pago i le aso 18 Novema 2013, ona o le manatu e fia mafuta i le tama'ita'i sa fai ma ana paaga na faigaluega teu fale i le fale a le aiga na a'afia.

I se vaega o le maliliega na sainia e Amituana'i ma le malo lea na fofogaina i luma o le faamasinoga, o lo o taua ai le sauni o le ua molia e tali ioe i moliaga mamafa e tolu e aofia ai le talepe fale i le tulaga lua, fa'ao'olima i le tulaga lua, atoa ai ma le tete'e atu i leoleo a'o taumafai e taofia faapagota o ia.

Na taua e le malo i lana talosaga, afai loa e talia e le faamasinoga moliaga mamafa e tolu e pei ona tali ioe ai le ua molia, ona talosaga loa lea i le faamasinoga mo se avanoa e solofua ai isi moliaga mama o lo o totoe ai i le pepa otagi na faaulu faasaga i le ua molia, lea e aofia ai le moliaga mama o le faaoolima i le tulaga tolu ma le faatupu vevesi i nofoaga faitele mo le mataupu muamua, ae o le moliaga mamafa o le faaoolima i le tulaga lua atoa ai ma le moliaga mamafa o le fa'atupu vevesi i nofoaga faitele.

I se vaega o le maliliega ua maea ona sainia e le ua molia ma le malo, ua ia sauni ai e tali ioe i le moliaga o le talepe fale i le tulaga lua, fa'ao'olima i le tulaga lua, atoa ai ma le tete'e atu i leoleo a'o taumafai e pu'e faapagota o ia.

Na taua e Amituanai e faapea, i se taimi o le aso 18 Novema 2013, na ia ulufale faamalosi ai i le fale o Patane i Pago Pago, e ala i lona kiki o le faitoto'a o le fale, sosoo ai ma lona futi mai o le ulu o se tamaita'i sa i ai i totonu o le fale, sosoo ai loa ma lona fa'ao'olima ia Patane i le taimi na alu atu ai Patane o lo o lafi mai o ia i totonu o le potu pito i tua o le fale.

Na taua i vaega o le maliliega e faapea, ina ua ulufale le pule o le fale i totonu, sa ia maitauina ai, e foliga mai o lo o i ai se tagata i totonu o le fale, o lea na ia savali sa'o atu ai i totonu o le isi potu o le fale, ma ia vaaia ai Amituana'i o lo o lafi mai i tua o le solo taele o lo o tautau i totonu o le potu, o le taimi fo'i lea na oso atu ai loa le ua molia ma osofa'i loa le pule o le fale i se tama'i naifi ma ia faaoo ai manu'a ia te ia.

Na toe ioe fo'i lea o Amituana'i i le isi mataupu e pei ona tu'uaia ai o ia e le malo e fa'apea, i se taimi o le aso 27 Iuni 2013 i Nuuuli i Amerika Samoa, na ia tete'e atu ai i ni alii leoleo a o latou taumafai e pu'e fa'apagota o ia, ona o solitulafono ua tu'uaia ai o ia e le malo.

O ali'i leoleo e to'alua ia Lomu Mosese ma Salefasa Matatule na agai' atu e faataunuu le poloaiga a le faamasinoga na sainia i le aso 15 Fepuari 2013, e pu'e fa'apagota mai ai Amituana'i ina ia molia i luma o le tulafono, ona o le mataupu na tula'i mai i Pago Pago o lo o tuuaia o ia e le malo, lea na ia osofaia ai se fale ma ia fa'ao'olima ai i se tagata e ana le fale.

Ina ua latalata atu ali'i leoleo i le fale o le uncle a le ua molia o lo o lafi ai, sa faafuase'i ona oso atu le ua molia i ali'i leoleo ma taumafai e faia uiga mata'utia e tetee atu ai i la gaioiga, ina ua mae'a ona fa'ailoa i ai e ali'i leoleo, o laua o leoleo, o lo o aga'i atu e fa'atino se poloaiga a le fa'amasinoga e pu'e fa'apagota ai o ia.

Na tautino Amituana'i i se vaega o lea maliliega e faapea, sa ia tu'iina le mata o le ali'i leoleo ia Mosese ma manu'a ai, sosoo ai loa ma lona tamo'e i le atoa ma fiu ai leoleo e tuli o ia i le aso lea.

O le a tautino Amituana'i i luma o le fa'amasinoga e pei ona taua i se vaega o le maliliega e fa'apea, o lana gaioiga sa faia i le aso 18 Novema ma le aso 27 Iuni sa le i tusa ai lea ma ala o le tulafono.

Ua mallige itu e lua o lenei mataupu e finau i le fa'amasinoga mo se fa'asalaga mama mo Amituana'i, peita'i ua malamalama le ua molia, tusa lava pe finau loia i le fa'amasinoga mo se fa'asalaga mama mo ia, e pule le fa'amasinoga pe talia pe teena ia fa'afinauga.

Ua ia malamalama fo'i, e le mafai ona toe suia lana tali ioe ua sauni e tu'uina atu i le fa'amasinoga, pe afai e aumai se fa'asalaga a le faamasinoga ae le tusa ai ma lona mana'o.

O lo o taofia pea Amituana'i i le toese i Tafuna e aunoa ma se tupe ua fa'atulaga e totogi e tatala ai o ia i tua, e fa'atali ai le aso lea ua faatulaga e toe fofogaina ai lana mataupu i luma o le fa'amasinoga.

E pei ona silafia, e le o se taimi muamua lenei ua ta'usala ai Amituanai i luma o le fa'amasinoga. I ni nai tausaga e le i mamao atu, na faasala ai o ia i le falepuipui i Tafuna mo le umi e 20 minute, ina ua faatolu ona ta'usala o ia i le moliaga mama o le faaoolima i le tulaga tolu, lea e mafai ona avea ma solitulafono mamafa pe afai e silia ma le fa'atolu ona molia ma ta'usala ai se tasi i le toese.

E faatolu ona molia ma ta'usala Amituanai i le moliaga mama o le faaoolima i le tulaga tolu, e mafua mai i le faalavelave lea na ia faaoolima ai i lana uo tama'ita'i, e aofia ai ma le isi taimi lea na ia faaoolima ai ia te ia, ma i'u ina pau ai ma lona ma'itaga.