Ua fa’alauiloa e le alii kovana ia Lolo Matalasi Moliga i le fonotaga a le kapeneta i le vaiaso na te’a nei, le sauni o le malo e totogi atu ia totogi fa’aopoopo mo tagata faigaluega i se taimi e le o toe mamao, i le mae’a ai loa ona ripoti o le tulaga lelei ua i ai tupe ao fa’alotoifale a le malo i le tausaga tupe ua mavae.

Saunoa le ali’i kovana e fa’apea, e i ai nai vaega laiti o lo o galulue i ai le malo e fa’amautu muamua, ona fa’atoa faia ai loa lea o le fa’aiuga e tu’uina atu si’itaga fa’aopoopo mo tagata faigaluega uma a le malo.

Na mafua ona taofi e le kovana si’itaga fa’aopoopo (po’o increments) o totogi mo tagata faigaluega a le malo, o se taumafaiga ina ia fa’amalosi atili tulaga o tupe ao fa’alotoifale a le malo talu mai le 2013.

I le saunoaga a Lolo ina ua tatala aloaia le ulua’i tauaofiaga a le Fono Faitulafono i le masina na te’a nei, sa ia fa’ailoa ai i le Fono ma le atunu’u tulaga manuia ua i ai tupe ao a le malo, ina ua mafai ona ao e le malo mo le ulua’i taimi le silia i le 100 miliona o tupe fa’alotoifale.

O le vaiaso na te’a nei na pasia ai e le maota o sui sa latou i’ugafono malilie fa’atasi, e talosaga ai le afioga i le ali’i kovana mo le fa’amatu’uina atu o si’itaga o totogi a tagata faigaluega, atonu e unaia ma fa’amalosia ai i latou e galulue pea fa’amaoni mo le malo.

Na taua e Lolo i le fonotaga a le kapeneta e fa’apea, e ui o lea ua galulue le malo e toe totogi atu increment, peita’i e tumau pea lo la talitonuga ma le afioga ia Lemanu Peleti Mauga, e tatau lava fo’i ona galulue le malo e saili ni isi galuega fa’aopoopo mo le afe ma afe o tagata o le atunu’u e le o maua ni galuega.

“Ma te le talitonu i le faia o mea nei o si’itaga ma si’itaga i lea tausaga ma lea tausaga mo tagata faigaluega a le malo, ae o lo o fa’aauau pea ona safa isi tagatanu’u i le le maua o ni galuega, atoa ai ma nai aiga lima vaivai o lo o manaomia se fesoasoani”, o le saunoaga lea a Lolo i le kapeneta.

O ni isi o suiga na faia e le faigamalo e pei ona taua e le ali’i kovana, o le faia lea o si’itaga i totogi o tagata faigaluega uma a le malo sa i le la’asaga muamua (level 1) o tulaga o totogi i le aofa’iga e silia i le $9,000 i le tausaga, ao lea ua si’i i luga o le tulaga lua (level 2) i le aofaiga e $10,400 talu mai le 2013.

“O le ma talitonuga lava ma Lemanu, ia aua ne’i gata ia i tatou nei ua maua galuega le avanoa e galulue ai, a ia tatou sailia ni isi galuega fou mo nai o tatou uso o lo o tapua’i mai, aemaise ai fanau aoga ua i’u mai ae leai ni galuega e o aga’i i ai”, o le isi lea saunoaga a Lolo, ma ia fa’afetaia fo’i le tali mai a le kamupani o le Tri-Marine, lea ua mafai ai ona maua isi galuega fa’aopoopo mo le atunu’u ma le malo.

Sa fautuaina e le ali’i kovana sui o le kapetena, aemaise lava fo’i i Ofisa o lo o maua mai ai fa’amanuia tau tupe mai le feterale, ina ia silasila toto’a pea i auala e fa’aaoga tatau ai tupe mai fafo mo le atina’e o le atunu’u, ma ia mautinoa fo’i e mulimulita’i i ta’iala ua fa’atulaga mai mo le fa’aaogaina o ia tupe.

O le vaiaso i ona tua atu e pei ona saunoa Lolo i le kapeneta, sa latou fono ai ma i latou uma o lo o galulue i le itu tau tupe a le malo atoa ai ma Lemanu, mo le va’ava’aia lea i ni isi auala e saga fa’amalosia ai le tamaoaiga o le atunu’u i le taimi nei, ona o ni isi o a’afiaga o lo o tula’i mai i solo tete’e ma a’afia ai va’a la’u oloa o lo o ulufale mai i le atunu’u, ua avea fo’i lea ma itu ua a’afia atu ai ma tupe maua lotoifale i le taimi nei.

“O le auto moni lava o lea fonotaga, ia mautinoa, ia aua ne’i ova atu tupe tatou te fa’aalu nai lo tupe o lo o tatou maua mai, e le gata i tupe lotoifale ae faapena fo’i i tupe feterale, ma ia tatou iloa lelei fo’i o lo o fa’aaoga tatau nei tupe”, o le isi lea saunoaga a le ali’ kovana, ma ia fa’alauiloa ai loa lona teena o talosaga sa tu’uina atu e ni isi o Ofisa a le malo, mo le sainiaina o a latou ‘T.A’ (travel annoucement).

E ui e le i fa’ailoa e le alii kovana le igoa o le matagaluega e ana le talosaga ua ia teena, peita’i sa ia taua e faapea, o T.A ua ia teena e fa’aalu ai le silia i le $9,000 mo se fonotaga e faia i le laumua i Uosigitone mo le na o le tasi le itula le umi o le fonotaga.

Saunoa le ali’i kovana e fa’apea, e le talafeagai i lona manatu le fa’aalu o se $9,000 mo se fonotaga e na o le tasi le itula le umi, ae tatau ona fa’aaoga tatau lea tupe i ni isi manaoga ma atina’e i totonu o le malo.

Na fa’ai’u le saunoaga a Lolo i le mataupu e a’afia ai le tamaoaiga o le malo, i lona fautuaina lea o sui uma o le kapeneta, o le latou matafaioi le silasila toto’a i a latou tupe fa’aalu ina ia mautinoa, e le avea lo latou fa’amatala ma itu e amo ai e le malo le mamafa tu o le avega.